|
ویب ڈیسک—ہالی وڈ کی رومینٹک کامیڈی ڈرامہ فلم 'انورا' نے بہترین فلم سمیت پانچ آسکرز ایوارڈز اپنے نام کر لیے ہیں۔
امریکی شہر لاس اینجلس کے ڈولبی تھیٹر میں اتوار کو 97ویں آسکرز کی تقریب منعقد ہوئی۔ امریکی نشریاتی ادارے 'اے بی سی' پر یہ تقریب براہِ راست نشر کی گئی۔
رواں برس کے آسکرز انتہائی غیر متوقع رہے اور مبصرین کے لیے بہترین فلم اور بہترین اداکار و اداکارہ سمیت نمایاں ایوارڈ کی پیش گوئی کرنا خاصا مشکل رہا۔
آسکرز کی 23 کیٹیگریز کے لیے ہونے والے مقابلے میں فلم 'انورا' نے پانچ، دی بروٹلسٹ نے تین جب کہ وکڈ ، امیلیا پیرز اور ڈیون پارٹ ٹو نے دو، دو ایوارڈز اپنے نام کیے۔
آسکرز کی شام سب سے زیادہ ایوارڈز لینے والی فلم انورا نے بہترین فلم کے ساتھ ساتھ بہترین ہدایت کار، بہترین اداکارہ، بہترین ایڈیٹنگ اور اوریجنل اسکرین پلے کے ایوارڈز حاصل کیے۔
بہترین فلم کی کیٹیگری کے لیے انورا کے ساتھ آ کمپلیٹ ان نون، کونکلیو، ڈیون: پارٹ ٹو، آئی ایم اسٹل ہیئر، نکل بوائز اور دی سبسٹینس ریس میں شامل تھیں۔
فلم دی بروٹلسٹ نے تین ایوارڈز اپنے نام کیے جن میں بہترین اداکار، اوریجنل اسکور اور سنیمیٹوگرافی کا ایوارڈ شامل ہے۔
فلم 'وکڈ' نے کوسٹیوم اور پروڈکشن ڈیزائن کے ایوارڈز اپنے نام کیے۔
ہسپانوی فلم 'امیلیا پیرز' نے بہترین معاون اداکارہ اور اوریجنل سونگ کا ایوارڈ حاصل کیا۔
اس کے علاوہ ڈیون: پارٹ ٹو کو وژول ایفکٹس اور بہترین ساؤنڈ کا ایوارڈ ملا۔
آسکرز کی شام کی نمایاں کیٹیگریز کے فاتحین کی فہرست پر نظر ڈالتے ہیں۔
بہترین فلم
بہترین فلم کی کیٹیگری کے لیے انورا کے ساتھ آ کمپلیٹ ان نون، کونکلیو، ڈیون: پارٹ ٹو، آئی ایم اسٹل ہیئر، نکل بوائز اور دی سبسٹینس ریس میں تھیں۔
تاہم بہترین فلم کا آسکر 'انورا' کے نام رہا۔
بہترین ہدایت کار
فلم 'انورا' کے ہدایت کار شون بیکر کو بہترین ہدایت کار کے ایوارڈ سے نوازا گیا۔
اس کیٹیگری میں فلم انورا کے ساتھ ساتھ دی بروٹلسٹ، آ کملیٹ ان نون، امیلیا پیرز اور دی سبسٹنس کے ہدایت کاروں کے درمیان مقابلہ تھا۔
بہترین اداکار
بہترین اداکار کا ایوارڈ 'دی بروٹلسٹ' کے ایڈریئن بروڈی کو ملا۔
اس کیٹیگری میں ایڈریئن کے علاوہ ٹمیتھی شیلیمے، کولمین ڈومنگو، رالف فائنز اور سیبیسٹین اسٹین کو بھی ایوارڈ کے لیے نامزد کای گیا تھا۔
ایڈریئن بروڈی اس سے قبل 2003 میں بھی آسکر ایوارڈ اپنے نام کر چکے ہیں۔
بہترین اداکارہ
بہترین اداکارہ کا ایوارڈ 'انورا' کی مائیکی میڈیسن کو ملا۔
اس کیٹیگری میں مائیکی میڈیسن کا مقابلہ کارلا سوفیا، سنتھیا اریوو، ڈیمی مور اور فرنینڈا ٹورس سے تھا۔
بہترین معاون اداکارہ
ہسپانوی فلم امیلیا پیرز کی اداکارہ سوئے سلڈانیا کو بہترین معاون اداکارہ کے ایوارڈ سے نوازا گیا۔
اس کیٹیگری کے لیے ان کے ساتھ آریانا گرینڈے، مونیکا باربرو، ایزابیل روسیلینی اور فلیسیٹی جونز نامزد تھیں۔
بہترین معاون اداکار
بہترین معاون اداکار کا ایوارڈ فلم 'آ ریئل پین' کے کیرن کلکن نے اپنے نام کیا۔
اس کیٹیگری کے آسکر کی دوڑ میں اداکار گائے پیئرس، ایڈورڈ نورٹن، جرمی اسٹرونگ اور یورا بوریسوو بھی شامل تھے۔
بہترین ڈاکیومینٹری کا ایوارڈ 'نو ادر لینڈ' کے نام رہا۔ یہ ڈاکیومینٹری اسرائیلی اور فلسطینی فلم سازوں نے مشترکہ طور پر بنائی ہے۔
نو ادر لینڈ فلسطینی آبادیوں کی مسماری کے خلاف جدوجہد کرنے والے ایک فلسطینی ایکٹوسٹ کے گرد گھومتی ہے۔
فلم کی عکس بندی 2019 سے 2023 کے درمیان کی گئی تھی۔
فورم