بھارت کی ریاست چھتیس گڑھ کے ضلع بجاپور میں ماؤ نواز باغیوں سے جھڑپ کے دوران بھارتی سیکیورٹی فورسز کے کم از کم 22 اہلکار ہلاک ہو گئے ہیں۔
اتوار کو بھارتی حکام نے تصدیق کی کہ ہفتے کو چھتیس گڑھ میں ماؤ نواز باغیوں کے خلاف ایک آپریشن کے دوران سینٹرل ریزرو پولیس کے کوبرا یونٹ، ڈسٹرکٹ ریزرو گارڈ اور اسپیشل ٹاسک فورس کے اہل کاروں کو نشانہ بنایا گیا۔
یہ حملہ رواں سال باغیوں کی جانب سے کیے گئے بدترین حملوں میں سے ایک قرار دیا جارہا ہے۔
دوسری جانب بھارتی ذرائع ابلاغ کے مطابق جھڑپ کے دوران 31 اہلکار زخمی بھی ہوئے ہیں جب کہ ایک اہل کار اب بھی لاپتا ہے۔
ہفتے کو دو ہزار سے زائد سیکیورٹی فورسز کے اہلکاروں نے ماؤ نواز باغیوں کے مضبوط گڑھ سمجھے جانے والے بجاپور اور سکما اضلاع کے نواحی جنگلات میں ایک بڑا آپریشن شروع کیا تھا۔
آپریش کے دوران گھات لگائے ماؤ نواز باغیوں اور فورسز کے درمیان تین گھنٹے سے زائد تک جھڑپ جاری رہی۔
انسپکٹر جنرل پولیس پی سندر راج نے بتایا کہ سیکیورٹی فورسز سے جھڑپ میں کم از کم نو باغی بھی ہلاک ہوئے ہیں، جن میں ایک خاتون بھی شامل ہے۔
اتوار کو بھارت کے وزیرِ داخلہ امت شاہ نے ریاست چھتیس گڑھ کے وزیراعلیٰ بھوپیس باغیل سے رابطہ کیا اور صورتِ حال سے متعلق معلومات حاصل کیں۔
انہوں نے سینٹرل ریزرو پولیس فورس کے ڈائریکٹر جنرل کلدیپ سنگھ کو ہدایت کی کہ وہ چھتیس گڑھ کا دورہ کریں۔
I bow to the sacrifices of our brave security personnel martyred while fighting Maoists in Chhattisgarh. Nation will never forget their valour. My condolences are with their families. We will continue our fight against these enemies of peace & progress. May injured recover soon.
— Amit Shah (@AmitShah) April 4, 2021
وزیرِ داخلہ نے ایک ٹوئٹ میں چھتیس گڑھ میں ماؤ نواز باغیوں کے ساتھ لڑائی میں ہلاک ہونے والے اہل کاروں کو خراجِ تحسین بھی پیش کیا۔
مذکورہ واقعے پر بھارت کے صدر رام ناتھ کووند نے بھی افسوس کا اظہار کیا ہے۔
The killing of the security personnel while battling Maoist insurgency in Chhattisgarh is a matter of deep anguish. My condolences to the bereaved families. The nation shares their pain and will never forget this sacrifice.
— President of India (@rashtrapatibhvn) April 4, 2021
بھارت کے وزیرِاعظم نریندر مودی نے گزشتہ روز ایک ٹوئٹ میں کہا تھا کہ میرے دل ان تمام اہل کاروں کے اہل خانہ کے ساتھ ہیں جو چھتیس گڑھ میں ماؤ باغیوں سے لڑتے ہوئے مارے گئے۔
My thoughts are with the families of those martyred while fighting Maoists in Chhattisgarh. The sacrifices of the brave martyrs will never be forgotten. May the injured recover at the earliest.
— Narendra Modi (@narendramodi) April 3, 2021
مائو نواز باغی بھارت کی 20 سے زائد ریاستوں میں سرگرم ہیں۔ تاہم یہ چھتیس گڑھ، مہاراشٹر، مغربی بنگال جیسی ریاستوں میں زیادہ متحرک ہیں اور ان علاقوں کے جنگلات اور دوردراز کے علاقوں میں یہ اپنا اثر و رسوخ رکھتے ہیں۔
یہ محروم اور پسے ہوئے طبقات کو حقوق دلانے کے لیے مسلح جدوجہد پر یقین رکھتے ہیں۔
یہ تحریک 1960 کی دہائی میں مغربی بنگال کے نکسل باڑی گاؤں سے شروع ہوئی تھی اور اسے بھارت کے محروم اور پسے ہوئی طبقات میں پذیرائی حاصل ہوئی۔
بھارتی حکمران اس تحریک کو ملکی سلامتی کے لیے خطرہ قرار دیتے رہے ہیں جب کہ عوامی سطح پر ان کے خلاف سخت کارروائی کے مطالبات سامنے آتے رہے ہیں۔