اسرائیل کی فضائیہ نے شام کی فوج کی کئی تنصیبات پر بمباری کی ہے جب کہ اسرائیلی فوج نے گولان کی پہاڑیوں میں مبینہ طور پر بارود نصب کرنے کی ایک کوشش بھی ناکام بنانے کا دعویٰ کیا ہے۔
شام کے سرکاری خبر رساں ادارے 'سانا' کے مطابق اسرائیل کے ہیلی کاپٹرز نے جنوبی شام کے علاقے قنیطرہ میں پیر کی شب شامی فوج کی پوزیشنز کے قریب میزائل داغے۔
رپورٹ کے مطابق فضائی حملے میں صرف تنصیبات کو نقصان پہنچا لیکن وہاں موجود افراد محفوظ رہے۔
اسرائیلی افواج نے کہا ہے کہ اس کے جنگی جہازوں اور ہیلی کاپٹرز نے شام کے ان فوجی اہداف کو نشانہ بنایا ہے جہاں سے گولان کے پہاڑی سلسلے میں بارودی مواد بچھانے کی کوشش کی جا رہی تھی۔
اسرائیلی فوج نے ایک بیان میں کہا ہے کہ جن اہداف کو نشانہ بنایا گیا ان میں نگرانی کے لیے قائم چوکیاں، خفیہ معلومات جمع کرنے کا نظام، اینٹی ایئر کرافٹ توپ خانہ اور شام کی فوج کے کمانڈ اینڈ کنٹرول نظام سے متعلق تنصیبات شامل ہیں۔
واضح رہے کہ حالیہ کچھ عرصے میں شام اور اسرائیل میں کشیدگی میں اضافہ ہوا ہے اور اسرائیل تواتر سے شام میں مختلف اہداف کو نشانہ بنا رہ اہے۔
گزشتہ ماہ بھی اسرائیل نے القنیطرہ میں ہی فضائی کارروائی کی تھی۔ اسرائیلی ہیلی کاپٹرز نے سرحد پار ہونے والی فائرنگ سے اسرائیلی تنصیبات کو پہنچنے والے نقصان کے بعد شامی اہداف پر حملے کیے تھے۔
دریں اثنا اسرائیل کی فوج نے دعویٰ کیا ہے کہ اس نے گولان کی پہاڑیوں میں بارود نصب کرنے میں ملوث چار عسکریت پسندوں کو ہلاک کردیا ہے۔
This is the moment when four terrorists attempted to plant explosives near the security fence between #Israel and #Syria last night......and the moment we stopped them.We will continue to defend Israel%27s borders from all enemy threats. pic.twitter.com/bQPGPiJFlg
— Israel Defense Forces (@IDF) August 3, 2020
اسرائیل کی فوج کے ایک ترجمان نے صحافیوں کو ٹیلی فونک پریس بریفنگ میں بتایا ہے کہ چاروں افراد شام کی حدود میں تھے اور انہوں نے حفاظتی باڑ عبور نہیں کی تھی۔
ترجمان کے بقول اسرائیل کے کمانڈوز نے اسنائپرز اور رائفلز سے اتوار کی شب گیارہ بجے کارروائی کا آغاز اس وقت کیا جب ان افراد نے در اندازی کی کوشش کی۔ بعد ازاں جنگی طیاروں کی مدد سے فضائی کارروائی بھی کی گئی۔
اسرائیل کے وزیرِ اعظم بن یامین نیتن یاہو نے پیر کو ایک بیان میں کہا کہ فوج نے شام سے ہونے والے ایک حملے کو ناکام بنا دیا ہے۔
ان کا مزید کہنا تھا کہ اسرائیل ان سب پر حملہ کرے گا جو اسرائیل پر حملہ آور ہوں گے یا اس پر حملہ کرنے کی کوشش کریں گے۔
In response to an attempted IED attack near the security fence between Syria & Israel last night, we just struck SAF targets in Syria including:🎯 observation posts🎯 intel collection systems🎯 anti-aircraft artillery 🎯 command & control systemsWe hold Syria responsible.
— Israel Defense Forces (@IDF) August 3, 2020
واضح رہے کہ حالیہ دنوں میں اسرائیل نے لبنان کی سرحد سے بھی در اندازی کا الزام لگایا تھا۔ اسرائیل نے کہا تھا کہ لبنان کی عسکری تنظیم حزب اللہ کے جنگجووں نے اسرائیل میں داخلے کی کوشش کی تھی جسے ناکام بنا دیا گیا تھا۔ تاہم حزب اللہ نے ایسی کسی بھی کارروائی کی تردید کی تھی۔
اسرائیل کی فضائیہ نے اتوار کو غزہ میں بھی فضائی حملے کیے تھے۔ اسرائیلی فوج نے دعویٰ کیا تھا کہ حماس کے زیرِ انتظام غزہ سے اسرائیل پر میزائل حملہ کیا گیا تھا جس کے جواب میں اس نے کارروائی کی۔
In response to the rocket that was fired at #Israel from #Gaza earlier this evening, our fighter jets & aircraft just struck subterranean Hamas terror facilities in Gaza. We hold Hamas responsible for all activity emanating from Gaza.
— Israel Defense Forces (@IDF) August 2, 2020