برطانیہ کے عوام کا ملکہ الزبتھ کو خراجِ عقیدت

طویل ترین عرصے تک تخت نشین رہنے والی برطانوی فرماں رواں ملکہ الزبتھ دوم جمعرات کو 96 سال کی عمر میں بیل مورل میں انتقال کر گئی ہیں۔ وہ شاہی خاندان میں ایک ڈرامائی تبدیلی کے بعد 1953 میں تخت نشین ہوئی تھیں۔

ملکہ الزبتھ کی وفات پر برطانیہ میں سوگ

ملکہ البزبتھ کی وفات پر برطانیہ بھر میں سوگ کا عالم ہے جہاں سرکاری عمارتوں پر قومی پرچم سر نگوں کر دیا گیا ہے۔

ہزاروں افراد عقیدت کا اظہار کرنے بکنگھم پیلس پہنچے جہاں انہوں نے بڑی تعداد میں پھول رکھے اور ملکہ کی رہائش گاہ کی تصاویر لیتے رہے۔

ملکہ کی وفات کی خبرشاہی محل کے مرکزی دروازے پر چسپاں کی گئی ہے جب کہ حکومت نے ملکہ برطانیہ کی وفات پر 10 روزہ سوگ کا اعلان کیا ہے۔

ملکہ الزبتھ کی وفات کے بعد ان کے بڑے بیٹے چارلس برطانیہ کے نئے بادشاہ بن گئے ہیں۔

برطانوی نشریاتی ادارے بی بی سی کے مطابق ایک بیان میں بادشاہ چارلس نے کہا ہے کہ "میری والدہ کی موت میرے اور تمام اہلخانہ کے لیے انتہائی شدید اداسی کا لمحہ ہے۔ ہم ایک محبوب حکمران اور بہت زیادہ پیار کرنے والی ماں کی وفات کا غم منا رہے ہیں۔ میں جانتا ہوں کہ ان کی موت کا نقصان پورے ملک اور دولتِ مشترکہ کے علاوہ دنیا میں لاتعداد لوگ محسوس کررہے ہوں گے۔"

شاہ چارلس کا کہنا ہے کہ غم اور تبدیلی کے اس دور میں ان کے لیے اور ان کے خاندان کے لیے یہ بات باعثِ سکون ہے کہ ملکہ کو کس احترام اور پیار سے یاد کیا جا رہا ہے۔

۔

نائن الیون کی 21 ویں برسی، بائیڈن نے یادگار پر پھولوں کی چادر چڑھائی

صدر جو بائیڈن نے 11 ستمبر کے حملوں کی 21 ویں برسی کے موقع پر پینٹاگان میں مسلسل بارش کے دوران منعقدہ پھولوں کی چادر چڑھانے کی ایک تقریب میں شرکت کی۔

بائیڈن نے ان "غیر معمولی امریکیوں" کو خراج عقیدت پیش کیا جنہوں نے امریکہ کے سیاہ ترین دنوں میں سے ایک پر اپنی جانیں قربان کیں ۔

اتوار کی تقریب ڈیموکریٹک صدر کی جانب سے افغانستان کی اس طویل اور مہنگی جنگ کے خاتمے کے ایک سال سے کچھ زیادہ عرصے بعد منعقد ہوئی، جو دہشت گردی کے حملوں کے جواب میں شروع کی گئی تھی ۔

ایسو سی ایٹڈ پریس کے مطابق بائیڈن نے کہا کہ امریکہ کے افغانستان چھوڑنے کے بعد بھی ان کی انتظامیہ گیارہ ستمبر کے حملوں کے ذمہ داروں کا تعاقب جاری رکھے ہوئے ہے۔

بائیڈن نے اگست میں اعلان کیا تھا کہ امریکہ نے القاعدہ کے اس لیڈر کو ہلاک کر دیا ہے جس نے حملوں کی منصوبہ بندی میں مدد کی تھی۔

روس کے یوکرین میں بجلی گھروں اور انفرا اسٹرکچر پر حملے

روس نے اتوار کے روز پاور سٹیشنز اور دیگر انفراسٹرکچر پر حملہ کیا، جس سے یوکرین میں بڑے پیمانے پر بجلی بند ہو گئی ، جب کہ کیف کی افواج نے ایک تیز جوابی کارروائی کی جس نے ماسکو کی فوجوں کو شمال مشرق میں اپنے قبضے والے علاقوں سے باہر نکال دیا ہے۔

ایسو سی ایٹڈ پریس کے مطابق بمباری سے خار کیف کے مغربی مضافات میں ایک پاور اسٹیشن میں زبردست آگ بھڑک اٹھی اور کم از کم ایک شخص ہلاک ہوگیا۔

صدر ولادی میر زیلنسکی نے شہری اہداف کے خلاف "دانستہ اور مذموم میزائل حملوں" کو دہشت گردی کی کارروائی قرار دیا۔

یوکرین کا دوسرا سب سے بڑا شہر خارکیف اتوار کی رات بظاہر بجلی سے محروم رہا ۔ کاریں تاریک گلیوں سے گزر یں ، اور چند پیدل چلنے والوں نے اپنا راستہ روشن کرنے کے لیے فلیش لائٹ یا موبائل فون کا استعمال کیا۔

اس کے علاوہ، روس کے زیر قبضہ جنوب میں زاپورژیا نیوکلیئر پاور پلانٹ کے قریب لڑائی چھڑ جانے کے نتیجے میں اسے تابکاری کے کسی سانحے سے محفوط رکھنے کے لیے مکمل طور پر بند کر دیا گیا ۔