اسلام آباد —
وفاقی دارالحکومت اسلام آباد میں یوں تو نئی، پرانی اور منفرد گاڑیاں سڑکوں پر دوڑتی نظر آتی ہیں لیکن "ونٹیج اینڈ کلاسک کار کلب آف پاکستان" نے اس شہر میں تین درجن سے زائد تاریخی گاڑیوں کو ایک ہی جگہ اکٹھا کر کے شائقین کے ذوق کی تسکین کے لیے ایک اچھوتا موقع فراہم کیا۔
ان گاڑیوں میں نواب آف بہاولپور کے زیر استعمال 1948 کی برطانوی ساختہ 'جیگوار' اور امریکی ساختہ کیڈلک خاص توجہ کا مرکز تھیں۔ کیڈلک سابق صدر ایوب خان کے زیر استعمال رہ چکی ہے۔
یہ کلب ہر سال کراچی سے پشاور تک ان تاریخی کاروں پر بذریعہ سڑک سفر کرتا ہے جس کا مقصد ممبران کے بقول جہاں ان نایاب گاڑیوں کے شوق کو اجاگر کرنا ہے وہیں بیرونی دنیا کو پاکستان کے ایک مثبت پہلو سے روشناس کروانا بھی ہے۔
