اسکوئڈ گیم کے تیسرے اور آخری سیزن کی ریلیز کا اعلان

ویب ڈیسک—معروف کورین سیریز 'اسکوئڈ گیم' کے تیسرے اور آخری سیزن کی ریلیز کا اعلان کر دیا گیا ہے۔

آن لائن اسٹریمنگ پلیٹ فارم نیٹ فلکس نے جمعرات کو 'نیکسٹ آن نیٹ فلکس' کے ایونٹ کا انعقاد کیا جس میں نیٹ فلکس پر آنے والے شوز کا اعلان کیا گیا۔

ایونٹ میں اسکوئڈ گیم کے تیسرے سیزن کا بھی اعلان کیا گیا جو رواں برس 27 جون کو ریلیز کیا جائے گا۔

خبر رساں ادارے 'رائٹرز' کے مطابق ڈرامہ، تھرل اور ایکشن سے بھرپور سیریز اسکوئڈ گیم کو 2021 میں دنیا بھر میں پذیرائی ملی تھی۔ ریلیز ہونے کے ایک مہینے کے اندر ہی یہ نیٹ فلکس پر سب سے زیادہ دیکھی جانے والی سیریز بن گئی تھی۔

شوبز کی خبریں دینے والے امریکی جریدے 'ورائٹی' کے مطابق اسکوئڈ گیم کے سیزن ون کو ایمی ایوارڈ کے لیے 17 نامزدگیاں ملی تھیں۔

سیریز کی کہانی ایک جان لیوا کھیل کے گرد گھومتی ہے جس میں تمام مقروض افراد حصہ لیتے ہیں۔ تاکہ وہ کھیل سے جیتنے والی رقم سے اپنا قرضہ اتار سکیں۔

چھبیس دسمبر 2024 کو اسکوئڈ گیم کا دوسرا سیزن ریلیز ہوا تھا۔ دوسرا سیزن سات قسطوں پر مشتمل تھا اور اسے بھی خوب پسند کیا گیا تھا۔

اب رواں برس جون میں سیریز کا تیسرا اور آخری سیزن ریلیز ہوگا۔ سیریز کے تیسرے سیزن کے پوسٹر پر لکھا ہوا کہ 'آخری گیم کے لیے تیار رہیں۔'

تیسرے سیزن میں کیا ہو گا؟ اس کی تفصیلات جاری نہیں کی گئی ہیں۔