نمیبیا میں چار بچے آنکھ مچولی کھیلتے ہوئے فریزر میں بند ہو کر ہلاک ہو گئے

شمال مشرقی نمیبیا میں پولیس نے منگل کو بتایا کہ چار کمسن بچے ہائیڈ اینڈ سیک یا چھپن چھپائی کا کھیل کھیلتے ہوئے ایک ناکارہ فریزر میں پھنس جانے سے ہلاک ہو گئے۔

زمبیزی کے علاقائی پولیس کمانڈر آندریاس شیلیلو نے اے ایف پی کو بتایا کہ بچے، جن کی عمریں تین سے چھ سال کے درمیان تھیں، پیر کو فریزر پر چڑھ کر اس کے اندر کود گئے اور اندر سے لاک ہو گئے۔

شیلیلو نے کہا، "فریزر پر ایک ہک لگا تھا جسے صرف باہر سے کھولا جا سکتا تھا۔" "وہ تقریباً ڈیڑھ گھنٹے تک اس میں پھنسے رہے اور ان کا دم گھٹنے لگا۔"

صوبائی پولیس سربراہ نے کہا کہ دو بچے فریزر کے اندر ہی دم توڑ گئے جبکہ دوسرے دو "نیم بے ہوشی کے عالم میں تھے لیکن جب وہ ہسپتال پہنچے تو انہیں مردہ قرار دے دیا گیا۔"

بچوں میں سے ایک کی والدہ نے یہ لرزہ خیز انکشاف اس وقت کیا جب اس نے اپنے بیٹے کو پکارنے کے بعد کوئی جواب نہ ملنے کے بعد اس کی تلاش شروع کی۔

اس رپورٹ کا مواد اے ایف پی سے لیا گیا ہے۔