پرتھ میں بھارت کے خلاف کھیلے جانے والا تیسرا کرکٹ ٹیسٹ میچ آسٹریلیا نے ایک اننگز اور 37 رنز سے جیت کر چار میچوں کی سیریز میں تین، صفر کی فیصلہ کن برتری حاصل کر لی ہے۔
اتوار کو میچ کے تیسرے روز مہمان ٹیم اپنی دوسری اننگز میں محض 171 رنز بنا کر آؤٹ ہو گئی۔
آسٹریلیا کی طرف سے ہلفنہاس نے چار، سڈل نے تین اور سٹارک نے دو کھلاڑیوں کو آؤٹ کیا۔
بھارتی ٹیم نے اپنی پہلی اننگز میں 161 رنز بنائے تھے جس کے جواب میں میزبان ٹیم 369 کے مجموعی اسکور پر آؤٹ ہو گئی تھی۔
میچ میں بھارت کی طرف سے سب سے زیادہ رنز بنانے والے کھلاڑی کوہلی کو دونوں اننگز میں سڈل نے آؤٹ کیا۔ اُنھوں نے مجموعی طور پر 119 رنز بنائے۔
آسٹریلوی بلے باز وارنر کو میچ کا بہترین کھلاڑی قرار دیا گیا ہے جنھوں نے 180 رنز بنائے تھے۔
ٹیسٹ سیریز کا آخری میچ 24 جنوری کو ایڈیلیڈ میں کھیلا جائے گا۔
