|
ویب ڈیسک -- امریکہ کے منتخب صدر ڈونلڈ ٹرمپ آج امریکی وقت کے مطابق صبح 11 بج کر 47 منٹ پر اپنے عہدے کا حلف اُٹھائیں گے۔ وہ امریکہ کے 47 ویں صدر ہیں اور اسی مناسبت سے ان کی حلف برداری کے لیے اس وقت کا انتخاب کیا گیا ہے۔
امریکی صدور کی حلف برداری کئی تقریبات اور روایات کا مجموعہ ہوتی ہے اور اسی مناسبت سے پیر کو بھی حلف برداری کی مرکزی تقریب کے علاوہ واشنگٹن ڈی سی میں کئی ایونٹس ہوں گے۔
نو منتخب صدر دن کا آغاز وائٹ ہاؤس کے قریب واقع سینٹ جونز ایپسکوپل چرچ میں ایک سروس میں شرکت سے کریں گے۔
حلف برداری سے قبل امریکہ کے نو منتخب صدور کی وائٹ ہاؤس کے نزدیک واقع اس چرچ کی سروس میں شرکت بھی ایک روایت ہے۔
سروس کے بعد منتخب صدر وائٹ ہاؤس کے قریب واقع صدارتی مہمان خانے بلیئر ہاؤس جائیں گے۔ اس کے بعد جو بائیڈن اپنی اہلیہ جل بائیڈن کے ہمراہ منتخب صدر ڈونلڈ ٹرمپ اور اُن کی اہلیہ کا وائٹ ہاؤس میں استقبال کریں گے اور چائے پر ملاقات کریں گے۔ یہ تقریب روایتی طور پر نئے صدر کے استقبال کے لیے منعقد کی جاتی ہے۔
وائٹ ہاؤس ٹی کے بعد منتخب صدر ڈونلڈ ٹرمپ کیپٹل ہل کے لیے روانہ ہوں گے۔ ٹرمپ کی حلف برداری کی تقریب کیپٹل ہِل کے کینن روٹنڈا ہال میں ہو گی۔
امریکی صدور کی حلف برداری کی تقریب روایتی طور پر کیپٹل بلڈنگ کے باہر 'نیشنل مال' پر ہوتی ہے جس میں لاکھوں لوگ شریک ہوتے ہیں۔ مگر اس بار سخت سردی کی وجہ سے یہ تقریب بلڈنگ کے اندر منتقل کر دی گئی ہے۔
تقریب میں پہلے نائب صدر جے ڈی وینس حلف اُٹھائیں گے جس کے بعد ٹرمپ امریکہ کے 47 ویں صدر کے طور پر عہدے کا حلف لیں گے۔ حلف برداری کے بعد ڈونلڈ ٹرمپ اپنا پہلا صدارتی خطاب کریں گے۔
حلف برداری کے دن کی ایک اور روایت صدر کی جانب سے اپنی کابینہ کے وزرا اور دیگر اعلیٰ حکام کی نامزدگیوں اور ایگزیکٹو آرڈرز پر دستخط کرنا ہے۔
اس مقصد کے لیے حلف برداری کی تقریب مکمل ہونے کے بعد امریکی صدر اور نائب صدر کو کیپٹل ہِل کی بلڈنگ میں واقع امریکی صدور کے لیے مخصوص کمرے میں لے جایا جائے گا جہاں ٹرمپ بطور صدر اپنے اولین حکم ناموں پر دستخط کریں گے۔
اس تقریب کے بعد ٹرمپ اور نائب صدر کیپٹل ہِل میں اراکینِ کانگریس کی جانب سے دیے گئے ظہرانے میں شرکت کریں گے۔
ظہرانے کے بعد صدر اور نائب صدر فوجی پریڈ کا معائنہ کریں گے۔ اس کے بعد ٹرمپ اور خاتونِ اول میلانیا ٹرمپ واشنگٹن ڈی سی کے 'کیپٹل ون ارینا' جائیں گے جہاں وہ حلف برداری کی تقریب کے دوسرے حصے یعنی پریڈ میں شرکت کریں گے جس میں ان کے حامیوں کی بھی بڑی تعداد شریک ہوگی۔
شام کو ڈونلڈ ٹرمپ وائٹ ہاؤس پہنچیں گے جہاں وہ اوول آفس میں مزید صدارتی حکم ناموں پر دستخط کریں گے۔
پیر کی شب نومنتخب صدر اور خاتونِ اول اپنے اعزاز میں ہونے والی تین مختلف تقریبات میں شریک ہوں گے۔