دنیا کی مشہور مائیکروبلاگنگ ویب سائٹ 'ٹوئٹر' کے صارفین کا 'ایڈٹ' کے فیچر کے لیے طویل عرصے سے کیا جانے والا انتظار ختم ہونے کو ہے کیوں کہ کمپنی کی جانب سے اعلان کیا گیا ہے کہ وہ آنے والے مہینوں میں نئے ایڈٹ فیچر کی آزمائش شروع کر دے گی۔
ٹوئٹر صارفین اکثر یہ شکایت کرتے نظر آتے تھے کہ پلیٹ فارم پر ایڈٹ کا فیچر نہ ہونے سے انہیں کسی بھی غلطی کی صورت میں یا تو اپنا ٹوئٹ ڈیلیٹ کرنا پڑتا تھا یا اس غلط ٹوئٹ پر ہی سمجھوتا کرنا پڑتا تھا مگر اب ایسے صارفین کی مشکل حل ہونے کے قریب ہے۔
کمپنی نے بدھ کو جاری ایک بیان میں کہا ہے کہ آنے والے مہینوں میں نئے ایڈٹ فیچر کی آزمائش شروع کردی جائے گی۔
2/ Edit has been the most requested Twitter feature for many years. People want to be able to fix (sometimes embarrassing) mistakes, typos and hot takes in the moment. They currently work around this by deleting and tweeting again.
— Jay Sullivan (@jaysullivan) April 5, 2022
ٹوئٹر کی جانب سے یہ اعلان ایسے وقت میں سامنے آیا ہے جب ایک روز قبل ہی ٹوئٹر کے سب سے بڑے شراکت دار اور ٹیسلا کمپنی کے سی ای او ایلون مسک نے ایک پول کرایا تھا کہ صارفین کو ایڈیٹ بٹن چاہیے یا نہیں۔
اس پول میں 44 لاکھ سے زیادہ صارفین نے رائے دی جس میں سے 73 فی صد نے ہاں جب کہ 26 فی صد نے نہیں میں ووٹ دیا تھا۔
Do you want an edit button?
— Elon Musk (@elonmusk) April 5, 2022
البتہ ٹوئٹر نے اپنے بیان میں بغیر کسی کا نام لیے یہ بھی وضاحت کی کہ ہم نے پول سے یہ خیال نہیں لیا ہے۔
ٹوئٹر کے کنزیومر پروڈکٹس کے سربراہ جے سولیوان نے ٹوئٹ کیا کہ کمپنی گزشتہ برس سے ایڈٹ آپشن پر کام کر رہی ہے جس کا کئی برس سے ٹوئٹر پر مطالبہ کیا جا رہا ہے۔
جے سولیوان نے کہا کہ اس فیچر کے ٹھیک سے سامنے آنے میں وقت لگے گا کیوں کہ جس چیز کو ایڈٹ کرنا ہے اس سے متعلق وقت کی حدود، کنٹرول اور شفافیت کا سوچے بغیر ایڈٹ کو عوامی گفتگو کے ریکارڈ کو تبدیل کرنے کے لیے غلط استعمال کیا جا سکتا ہے۔
اس فیچر کے حوالے سے ان کا مزہد کہنا تھا کہ کمپنی ایڈٹ فیچر کو متعارف کرانے سے قبل اس پر حمایت اور مخالفت دونوں رائے لے گی۔ ان کے بقول ہم احتیاط اور غور و فکر کے بعد اس فیچر پر پہنچیں گے اور اس بارے میں اپ ڈیٹس سے آگاہ کرتے رہیں گے۔
— Twitter Comms (@TwitterComms) April 5, 2022
دوسری جانب ٹوئٹر کمیونیکیشن نے ٹوئٹس میں بتایا کہ ٹوئٹر آنے والے مہینوں میں اس فیچر کی آزمائش ٹوئٹر بلیو لیبس پریمیئم سبسکرپشن میں شروع کرے گی تاکہ یہ جانا جا سکے کہ ''کیا کام کر رہا ہے، کیا نہیں اور کیا ممکن ہے۔''
خبر رساں ادارے 'رائٹرز' کے مطابق ٹوئٹر بلیو ممبرز کو ماہانہ سبسکرپشن سے پریمیئم فیچرز اور ایپ کسٹمائزیشن تک رسائی حاصل ہوتی ہے۔
ٹوئٹر کمیونیکیشن نے اپنے ٹوئٹ میں یکم اپریل کے ٹوئٹ کا بھی حوالہ دیا اور لکھا کہ ہم مذاق نہیں کر رہے تھے۔ ساتھ ہی ایک مختصر ویڈیو بھی شیئر کی جس میں ایڈٹ فیچر کا آپشن کہاں ہوگا دکھایا گیا ہے۔
اس خبر میں شامل بعض معلومات خبر رساں ادارے 'رائٹرز' سے لی گئی ہیں۔