سابق وزیرِ اعظم عمران خان کی حکومت کے خاتمے کے خلاف ملک کے مختلف شہروں میں پاکستان تحریک انصاف (پی ٹی آئی) کے کارکنوں نے ریلیاں نکالیں اور شدید احتجاج کیا۔ دوسری جانب پاکستان ڈیموکریٹک موومنٹ (پی ڈی ایم) میں شامل جماعتوں کے کارکنوں نے جشن منایا اور مٹھائیاں تقسیم کیں۔
پاکستان کے چاروں صوبائی دارالحکومتوں سمیت کئی چھوٹے بڑے شہروں میں اتوار کا دن سیاسی اعتبار سے خاصا گرم رہا۔ کہیں احتجاج ہوا اور کہیں مٹھایاں کھلا کر ایک دوسرے کو مبارکبادیں دی گئیں۔
سابق وزیرِ اعظم عمران خان کی کال پر پی ٹی آئی کے کارکن بڑی تعداد میں اپنے قائد سے یکجہتی کا اظہار کرنے کے لیے اتوار کو شب سڑکوں پر نکلے جن میں خواتین اور بچوں سمیت کارکنوں کی بڑی تعداد نے شرکت کی۔
ملک کے سب سے بڑے شہر کراچی، لاہور، اسلام آباد، پشاور، حیدرآباد، سکھر، رحیم یار خان، سیالکوٹ، اوکاڑہ، خانیوال، ایبٹ آباد، ہری پور، بنوں، لوئر دیر سمیت دیگر کئی شہروں میں احتجاج کیا گیا۔
مظاہرین نے سابق وزیراعظم عمران خان کے ساتھ اظہار یکجہتی کیا اور ان کے خلاف متحد ہونے والی اپوزیشن جماعتوں کے خلاف نعرے بازی کی۔
یاد رہے کہ پاکستان کی قومی اسمبلی نے ہفتے کی شب عمران خان پر عدم اعتماد کا اظہار کیا تھا جس کے بعد وہ آئینی طور پر وزارتِ عظمیٰ کے عہدے سے فارغ ہو گئے تھے۔ قومی اسمبلی میں عدم اعتماد کی کارروائی سے قبل ہی عمران خان نے آٹھ اپریل کو اپنے حامیوں سے اپیل کی تھی کہ وہ اتوار کو نمازِ عشا کے بعد سڑکوں پر نکل کر پر امن احتجاج کریں۔
Testimonial for #ImranKhanAwesome thing is the political awareness in common Pakistanis! #امپورٹڈ_حکومت_نامنظورpic.twitter.com/RuDdGRcsKV
— PTI (@PTIofficial) April 10, 2022
دارالحکومت اسلام آباد میں پی ٹی آئی کی ریلی زیرو پوائنٹ سے ایف نائن پارک پہنچی۔ جہاں پی ٹی آئی کے رہنماؤں نے مظاہرین سے خطاب کیا۔
ریلی میں موجود کارکنوں نے ہاتھوں میں پی ٹی آئی کے جھنڈے اور عمران خان کی تصاویر اٹھا رکھی تھیں جب کہ اسپیکرز پر پی ٹی آئی کے ترانے بجائے جا رہے تھے۔
صوبۂ پنجاب کے دارالحکومت لاہور میں پی ٹی آئی کی جانب سے کارکنوں کو لبرٹی چوک پہنچنے کی ہدایت کی گئی تھی۔
Your browser doesn’t support HTML5
اس موقع پر لاہور کے علاقے گلبرگ میں واقع لبرٹی چوک کو جانے والے تمام راستوں پر ٹریفک جام تھا جب کہ پی ٹی آئی کے کارکن اپنی گاڑیاں قریبی علاقوں میں پارک کر کے مظاہرے میں شرکت کر رہے تھے۔
ملک کے سب سے بڑے شہر کراچی کے راشد منہاس روڈ پر پی ٹی آئی کے حامیوں کی بڑی تعداد جمع ہوئی جب کہ مرکزی اسٹیج ڈالمیا روڈ پر لگایا گیا۔ کارکنوں کی تعداد اتنی زیادہ تھی کہ اس سے راشد منہاس روڈ پر ٹریفک کی آمد و رفت شدید متاثر ہوئی۔مظاہرین نے پی ٹی آئی کے جھنڈوں، مختلف اقسام کے پوسٹرز سمیت عمران خان کی تصاویر اٹھا رکھی تھیں۔
This is Karachi, the city of lights totally lighted up for #ImranKhan! Imported Government completely rejected. #RevolutionBlackedOut #امپورٹڈ_گورنمنٹ_نامنظور pic.twitter.com/CBO7eKtJ54
— PTI (@PTIofficial) April 10, 2022
صوبۂ خیبر پختونخوا کے مرکزی شہر پشاور میں پی ٹی آئی کے کارکنوں نے اپنے لیڈر عمران خان سے اظہار یکجہتی کے لیے ریلیاں نکالیں اور احتجاج کیا۔
اس موقع پر مظاہرین نے جمعیت علما اسلام (ف) کے سربراہ مولانا فضل الرحمٰن کے خلاف نعرے بازی بھی کی جب کہ مظاہرے میں پی ٹی آئی کی صوبائی قیادت بھی شریک تھی۔
خیبر پختونخوا کے علاقے لوئر دیر کی تحصیل تیمر گرہ میں بھی مظاہرین نے عمران خان سے اظہار یکجہتی کے لیے احتجاج کیا اور عمران خان کی حکومت کے خاتمے پر اپوزیشن جماعتوں کے خلاف نعرے بازی کی۔
بلوچستان کے شہر کوئٹہ میں کارکنوں کی بڑی تعداد سڑکوں پر نکل آئی اور عمران خان کے حق میں نعرے لگائے۔
عمران خان کا اظہار تشکر
تحریکِ انصاف کے سربراہ عمران خان نے ایک ٹوئٹ میں کہا کہ ملکی تاریخ میں اس سے پہلے اتنی بڑی تعداد میں لوگوں کو خود سے باہر نکلتے نہیں دیکھا۔
میں نے اپنی ملکی تاریخ میں اس سے پہلے اتنی بڑی تعداد میں لوگوں کو خود سے باہر نکلتے نہیں دیکھا جو ڈاکوؤں کی امپورٹڈ حکومت کو مسترد کرنے کیلئے آج نکلے۔pic.twitter.com/YWrvD1u8MM
— Imran Khan (@ImranKhanPTI) April 10, 2022
عمران خان کا ایک اور ٹوئٹ میں کہنا تھا کہ وہ اہل پاکستان کے مشکور ہیں۔
یکجہتی کےاظہار+امریکی حمایت سےمقامی میرجعفروں کے بل پرحکومت بدلنے+ضمانتوں پررہا ڈاکوؤں کےبےحمیت ٹولےکواقتدار دلوانےکیخلاف جذبات سےبھرپوراحتجاج کیلئےبڑی تعدادمیں نکلنےپرمیں اہلِ پاکستان کامشکور ہوں۔اس سےثابت ہوتاہےکہ ملک وبیرونِ ملک مقیم پاکستانیوں نےاسےپوری شدت سےمستردکردیاہے
— Imran Khan (@ImranKhanPTI) April 10, 2022
اپوزیشن جماعتوں کا جشن
اس سے قبل ہفتے اور اتوار کی درمیانی شب سابق وزیراعظم عمران خان کے خلاف قومی اسمبلی میں پیش کردہ تحریک عدم اعتماد کامیاب ہونے پر متحدہ اپوزیشن جماعتوں نے جشن منایا اور اپنے کارکنوں میں مٹھائیاں تقسیم کیں۔
تحریک عدم اعتماد پر ووٹنگ ہونے اور اس کی کامیابی کے بعد ملک کے مختلف شہروں میں آتش بازی کا مظاہرہ کیا گیا اور ریلیاں نکالی گئیں۔ لاہور اور ملتان سمیت مختلف شہروں میں مسلم لیگ (ن) کے کارکنوں نے مٹھائیاں تقسیم کیں۔
Public opinion #noconfidencemotion pic.twitter.com/aHfojSvyJ3
— PMLN Punjab (@PMLNPunjabPk) April 10, 2022
متحدہ اپوزیشن کے کارکن قومی اسمبلی کے باہر بھی اکٹھے ہوئے جہاں انہوں نے ڈھول کی تھاپ پر رقص کیا اور مٹھائیاں تقسیم کیں۔
اس موقع پر پاکستان مسلم لیگ نواز کے کارکنوں نے لندن میں مقیم اپنے قائد میاں نواز شریف کی رہائش گاہ کے باہر جشن منایا اور ڈھول کی تھاپ پر بھنگڑے ڈالے۔
مسلم لیگ نواز کی نائب صدر مریم نواز نے ٹوئٹر پر کارکنوں کے جشن منانے کی ویڈیو بھی شیئر کی۔
Dhol outside MNS residence 🎊🎉😀 pic.twitter.com/kAkbI8qHkN
— Maryam Nawaz Sharif (@MaryamNSharif) April 10, 2022
کراچی میں بھی بلاول ہاؤس پر پیپلز پارٹی کے کارکنوں نے آتش بازی کا مظاہرہ کیا۔
اسی طرح جمعیت علما اسلام (ف)کے کارکنوں نے بھی صوبۂ خیبر پختونخوا کے مختلف علاقوں میں جشن منایا اور مٹھائیاں تقسیم کیں۔