ٹینس کے عالمی نمبر ون کھلاڑی نواک جوکووچ کی جانب سے خاتون ریفری کو بال مارنے کا واقعہ ابھی تک زیر بحث ہے۔ اگرچہ جوکووچ نے معافی مانگ لی ہے، لیکن اس کے باوجود سوشل میڈیا پر اُنہیں تنقید کا سامنا کرنا پڑ رہا ہے۔ تاہم بہت سے مداح اُن کی حمایت بھی کر رہے ہیں۔
اتوار کو یو ایس اوپن کے میچ میں سربیا سے تعلق رکھنے والے نواک جوکووچ کا مقابلہ اسپین کے کھلاڑی پابلو کیرینو بستا سے تھا، جو ان سے ایک پوائنٹ آگے تھے۔
اس دوران مایوسی کے عالم میں جوکووچ نے ایکسٹرا بال جیب سے نکال کر اپنے عقب میں ہٹ کی، تو وہ خاتون ریفری کی گردن پر جا لگی۔
جوکووچ کی اس حرکت پر میچ آفیشل نے طویل مشاورت کے بعد اُنہیں ایونٹ سے باہر کر دیا۔
عالمی نمبر ون کھلاڑی کو اس طرح ایونٹ سے باہر کیے جانے پر ان کے مداح تنقید کر رہے ہیں، جب کہ سوشل میڈیا پر بعض افراد اس اقدام کی حمایت کر رہے ہیں۔ اس کھیل سے وابستہ ماہرین کا کہنا ہے کہ جوکووچ ٹینس کے سخت قوانین کی زد میں آئے ہیں۔
پاکستان کے ٹینس اسٹار عقیل خان نے وائس آف امریکہ کو بتایا کہ چند سال قبل ٹینس کی عالمی تنظیم نے اس سلسلے میں سخت قوانین بنائے تھے۔
اُن کے بقول قانون کے تحت کھیل کے دوران اگر ریکٹ یا بال کسی کو لگ جائے تو کھلاڑی کو قصور وار قرار دیا جاتا ہے۔
SEE ALSO: میچ آفیشل کو بال مارنے پر جوکووچ یو ایس اوپن سے باہرانہوں نے کہا کہ بال لگنے کے بعد خاتون ریفری جس طرح زمین پر گریں اور درد سے کراہتی رہیں، اس پر دیگر ریفریز نے جوکووچ کے خلاف سخت فیصلہ دیا۔
عقیل کہتے ہیں کہ بال لگنے کے بعد اگر خاتون ریفری اس طرح کا ردِعمل ظاہر نہ کرتیں تو شاید جوکووچ اس سزا سے بچ سکتے تھے۔
ماضی میں بھی اس طرح کے واقعات میں ریفری سخت سزائیں دیتے رہے ہیں۔ امریکی ٹینس اسٹار سرینا ولیمز نے بھی کھیل کے دوران ریفری کو دھمکی دی تھی جس پر اُنہیں نکال دیا گیا تھا۔
عقیل خان کا کہنا ہے کہ ریفری کو بال لگنے کے واقعہ کے بعد جوکووچ نے بھی معذرت کا رویہ اختیار کیا ورنہ وہ پریس کانفرنس کر کے اس معاملے کو طول دے سکتے تھے۔
سوشل میڈیا پر صارفین کا ردِ عمل
ٹوئٹر پر ایک صارف میتھیو ولز نے ایک ویڈیو شیئر کی ہے جس میں جوکووچ میچ آفیشل کے ساتھ محو گفتگو ہیں اور واقعے پر افسوس کا اظہار کر رہے ہیں۔
Pretty clear audio of Djokovic and the umpire/supervisor/referee’s discussion pic.twitter.com/KYXiENtwc6
— Matthew Willis (@MattRacquet) September 7, 2020
مارک برمن نامی صارف نے لکھا ہے کہ یو ایس اوپن انتظامیہ کو موجودہ حالات میں ٹینس کے نمبر ون کھلاڑی کو اتنی سخت سزا نہیں دینی چاہیے تھی۔
US Open needed to show more compassion during these times before handing out Novak Djokovic%27s excessive punishment #USOpen https://t.co/Vt36i3BNnj
— Marc Berman (@NYPost_Berman) September 7, 2020
ذرائع ابلاغ کی بعض رپورٹس کے مطابق خاتون ریفری لورا کلارک کو اس واقعہ کے بعد دھمکیاں بھی مل رہی ہیں۔
ایک صارف مائیک ڈکسن نے لکھا ہے کہ خاتون ریفری واقعہ کے بعد سے ہی ہوٹل میں ہیں اور ڈاکٹرز اُن کی دیکھ بھال کر رہے ہیں۔ تاہم اُنہیں سوشل میڈیا پر تنقید کا نشانہ بنایا جا رہا ہے جو افسوس ناک ہے۔
USTA say the line judge involved in the Djokovic default, who%27s also been subjected to horrendous abuse via social media from his fans, is resting up at hotel today under observation from tournament doctor, and hopes to return.
— Mike Dickson (@Mike_Dickson_DM) September 7, 2020
ریفریز سے بحث کے دوران جوکووچ کو یہ کہتے ہوئے سنا جا سکتا ہے کہ اُن کی غلطی ہے اور وہ معذرت کر چکے ہیں۔ خاتون ریفری کو اسپتال لے جانے کی بھی ضرورت نہیں تاہم اُنہیں باہر کرنا اُن کے کریئر اور اتنے بڑے ٹورنامنٹ کے لیے بہتر نہیں۔
ایک صارف نے رافیل نڈال کی ایک ویڈیو شیئر کی ہے جس میں کھیل کے دوران نادانستہ طور پر ایک بال گرل کو گیند لگ جاتی ہے۔
صارف نے سوال اُٹھایا کہ کیا یہ دوہرا معیار نہیں ہے؟
Nadal hit a ball girl and after acted as if it never happened and @DjokerNole gets defaulted?? What’s the logic here? pic.twitter.com/0DPiUTOl3m
— Tea (@Tea63707956) September 7, 2020
جوکووچ کے ناقدین 2016 میں لندن میں پیش آنے والے واقعہ کا بھی حوالہ دے رہے ہیں، جب اے ٹی پی فائنلز کے ایک میچ میں اُنہوں نے غصے میں بال شائقین کی طرف پھینک دی تھی۔
اسی سال فرینچ اوپن کے ایک میچ میں اُنہوں نے اپنا ریکٹ مجمع کی جانب اُچھال دیا تھا۔
This clip certainly isn’t helping Novak Djokovic today. It’s from 2016. pic.twitter.com/7bNBw3G9pe
— Jenny Brockie (@JenBrockie) September 7, 2020
اس واقعہ کے بعد ایک صحافی نے اُن سے سوال کیا کہ کیا آپ کو نہیں لگتا کہ یہ رویہ کسی روز آپ کے لیے نقصان کا باعث بن سکتا ہے اور آپ کو سخت سزا مل سکتی ہے۔
جوکووچ نے اس سوال کے جواب میں صحافی کو مخاطب کرتے ہوئے کہا تھا کہ یہ ناقابل یقین ہے۔ میں بار بار ایسا کرتا ہوں۔ اب تک مجھے سزا کیوں نہیں دی گئی۔
جوکووچ کا کہنا تھا کہ کیا میں واحد کھلاڑی ہوں جو کورٹ میں غصے کا اظہار کرتا ہے۔ اُن کا کہنا تھا کہ یہ کوئی بڑا مسئلہ نہیں ہے۔
یو ایس اوپن سے باہر ہونے پر جوکووچ کی نہ صرف عالمی رینکنگ خطرے میں پڑ سکتی ہے، بلکہ اُنہیں انعامی رقم کی مد میں لاکھوں ڈالر سے بھی محروم ہونا پڑے گا۔