بھارت کی کرکٹ ٹیم کے کپتان اور بالی وڈ اداکارہ انوشکا شرما کی بیٹی کو ریپ کی دھمکی دینے والے ملزم کو ممبئی پولیس نے بدھ کو گرفتار کر لیا ہے۔
ملزم نے بھارتی کپتان کی بیٹی کو سوشل میڈیا پر ریپ کی دھمکی دی تھی۔
بھارتی اخبار 'دی ہندو' کے مطابق 23 سالہ نوجوان کی شناخت اکوبتھینی رام ناگیش نام سے ہوئی ہے جو پیشے کے اعتبار سے ایک سافٹ ویئر انجینئر ہے اور ایک پرائیوٹ کمپنی میں ملازمت کرتا ہے۔
ممبئی کی سائبر کرائم ونگ پولیس نے نوجوان کو بدھ کی صبح چھ بجے گرفتار کیا تھا۔اور اس کے خلاف مقدمہ درج کیا ہے۔
'دی ہندو' کے مطابق پولیس کا کہنا ہے کہ ملزم نے اپنے ٹوئٹر اکاؤنٹ سے وراٹ کی بیٹی کو دھمکی دی تھی۔
یہ دھمکی اس وقت سامنے آئی تھی جب بھارتی کپتان وراٹ کوہلی مسلمان کھلاڑی محمد شامی کی حمایت میں سامنے آئے تھے۔
SEE ALSO: پاکستان سے شکست پر بھارتی شائقینِ کرکٹ مایوس، کئی علاقوں میں آتش بازی پر سابق کرکٹر برہمبھارتی کرکٹ ٹیم کے مسلمان کھلاڑی محمد شامی کو 24 اکتوبر کو پاکستان اور بھارت کے درمیان ہونے والے میچ میں شکست کے بعد انتہا پسندوں کی جانب سے سوشل میڈیا پر شدید تنقید کا نشانہ بنایا گیا تھا۔
اس تنقید کے بعد متعدد معروف شخصیات سمیت وراٹ کوہلی نے بھی محمد شامی کی حمایت کی تھی۔
اس دوران ٹوئٹر پر ایک ٹوئٹ کا اسکرین شاٹ خوب وائرل ہوا جس میں ایک صارف انوشکا اور وراٹ کی بیٹی کو ریپ کی دھمکی دے رہا تھا۔
اسکرین شاٹ وائرل ہونے کے بعد بھارت سمیت پاکستان کی مشہور شخصیات کی جانب سے سخت الفاظ میں مذمت کی گئی تھی۔
بھارتی اخبار 'انڈیا ٹوڈے' کے مطابق رواں ماہ کے آغاز میں دہلی کمیشن فار وومن (ڈی سی ڈبلیو) نے دہلی پولیس کو ایک خط بھیجا تھا جس میں انہوں نے انوشکا اور وراٹ کی بیٹی کو ریپ کی دھمکی ملنے پر کارروائی کی درخواست کی تھی۔
کمیشن نے اپنے خط میں اسے 'شرمناک' قرار دیتے ہوئے ملزم کو فوراً گرفتار کرنے کی درخواست کی تھی۔
ڈی سی ڈبلیو کی چیف سواتی ملیوال نے دہلی پولیس کو ارسال کیے گئے خط لکھا تھا کہ "یہ وہ وقت ہے جب ہمیں اپنی ٹیم کے ساتھ کھڑے ہونا ہے نہ کہ اس کے خلاف، بھارت اگر پاکستان سے ہار بھی جاتا ہے تو ٹیم اور ان کا خاندان اس نفرت کے مستحق نہیں ہیں۔"
انہوں نے مزید یہ بھی لکھا کہ وہ اس طرح کے معاملات میں ملزم کی فوری گرفتاری کی توقع کرتی ہیں اور ایسے افراد کو سبق سکھانا ضروری ہے۔
I’m really glad to hear the Mumbai Police cyber cell have located and arrested the creep who tweeted rape threats to a child. Now hoping for similar swift action in cases of female journalists who receive rape threats almost on a daily basis.
— Farhan Akhtar (@FarOutAkhtar) November 10, 2021
بھارتی اداکار فرحان اختر نے کہا کہ انہیں خوشی ہے کہ ممبئی پولیس نے انوشکا اور وراٹ کی بیٹی کو دھمکی دینے والے ملزم کو گرفتار کیا ہے۔
انہوں نے کہا کہ خواتین صحافیوں کے معاملے میں بھی اسی طرح کی تیز کارروائی کی امید ہے جنہیں تقریباً روزانہ کی بنیاد پر ریپ کی دھمکیاں ملتی ہیں۔