وزیرِ اعظم عمران خان کے معاونِ خصوصی برائے صحت ڈاکٹر فیصل سلطان نے کہا ہے کہ پاکستان میں کرونا ویکسین پراسیس ہونے کے بعد ماہانہ تیس لاکھ ویکسین کی خوراکیں پاکستان کے اندر تیار ہونا شروع ہو جائیں گی۔
دوسری جانب پاکستان میں بیرون ممالک سے ویکسین کی آمد کا سلسلہ جاری ہے اور ’کوویکس‘ پروگرام کے تحت پاکستان کو ایسٹرازینیکا ویکسین کی 12 لاکھ خوراکوں کی پہلی کھیپ موصول ہوگئی ہے۔
حکومت پاکستان کی خصوصی کاوشوں اور اقدامات کےنتیجے میں سنگل ڈوز کین سائینو ویکسین کی ایک لاکھ 20ہزار خوراکیں پاکستان پہنچیں۔ ملک پہنچنے والی کین سائینو ویکسین کی پیکنگ اور فارمولیشن این آئی ایچ کے ذریعے پاکستان میں ہی ہو گی۔ کین سائینو ویکسین پاکستان کی طرف سے خریدی گئی ہے۔ pic.twitter.com/eEpB3kSlMV
— Ministry of National Health Services, Pakistan (@nhsrcofficial) May 5, 2021
وائس آف امریکہ سے ٹیلی فون پر بات کرتے ہوئے ڈاکٹر فیصل سلطان نے کہا کہ نیشنل انسٹیٹیوٹ آف ہیلتھ (این آئی ایچ) میں پلانٹ گزشتہ ماہ ہی قائم کیا گیا ہے اور اب وہاں ویکسین کی تیاری کے حوالے سے مختلف ٹیسٹ کیے جا رہے ہیں۔
ان کا کہنا تھا کہ امکان ہے کہ مئی کے آخر میں ویکسین کی باقاعدہ پیداوار کا آغاز ہو جائے گا جس کے بعد چین کی تیار کردہ ویکسین پاکستان میں ہی تیار ہونے لگے گی اور پاکستان کو ماہانہ تیس لاکھ خوراکیں صرف این آئی ایچ میں قائم کردہ اس پلانٹ سے دستیاب ہوں گی۔
The first batch of bulk cansino vaccine being processed at the national Institute of health plant set up for this purpose last month. Specially trained team working on it. Will inshallah be available for use by end of May after going thru rigorous quality control checks pic.twitter.com/kSC7tQAdrz
— Asad Umar (@Asad_Umar) May 7, 2021
کوویکس کے تحت پاکستان کو ایسٹرازینیکا ویکسین کی فراہمی
پاکستان میں بیرون ممالک سے کرونا ویکسین کی آمد جاری ہے اور ’کوویکس‘ پروگرام کے تحت پاکستان کو ایسٹرازینیکا ویکسین کی پہلی کھیپ موصول ہو گئی ہے۔
اسلام آباد میں نیشنل ہیلتھ سروسز، ریگولیشنز اینڈ کوآرڈینیشن میں وزیرِ اعظم کے معاونِ خصوصی ڈاکٹر فیصل سلطان نے پہلی کھیپ وصول کی۔ اس موقع پر پاکستان میں تعینات برطانیہ کے سفیر کرسچن ٹرنر بھی موجود تھے۔
In addition to guidelines that apply to all COVID-19 vaccines, Oxford-AstraZeneca will not be administered to females below the age of 40 years in Pakistan. You can find detailed guidelines about the AstraZeneca vaccine here: https://t.co/JuzDzjp1AS
— Ministry of National Health Services, Pakistan (@nhsrcofficial) May 8, 2021
ڈاکٹر فیصل سلطان نے کہا کہ پہلی کھیپ میں 12 لاکھ 38 ہزار 400 افراد کے لیے ویکسین ہے۔ جس کے بعد چند دنوں میں 12 لاکھ 36 ہزار افراد کے لیے مزید ویکسین پاکستان پہنچ جائے گی۔
ڈاکٹر فیصل سلطان کا مزید کہنا تھا کہ اس غیر معمولی بحران میں، جس کی تاریخ میں مثال نہیں ملتی، پاکستان میں کرونا وائرس سے لڑنے کی اجتماعی کوششوں میں ’کوویکس‘ کے تعاون کو تہہ دل سے سراہتے ہیں۔
Pakistan has received the Oxford-AstraZeneca vaccine from the #COVAX Facility. The #COVID-19 vaccine will be used to complement Pakistan’s ongoing mass vaccination. @nhsrcofficial @gavi @WHO @WHOEMRO pic.twitter.com/ydzS80bSY2
— WHO Pakistan (@WHOPakistan) May 8, 2021
انہوں نے کہا کہ پاکستان میں ویکسی نیشن مراکز میں ایک دن میں تقریباً دو لاکھ افراد کو ویکسین کے انجکشن لگ رہے ہیں اور بہت جلد یومیہ پانچ لاکھ افراد کو ویکسین دینے کے قابل ہو جائیں گے۔
اس موقع پر موجود عالمی ادارہٴ صحت کی نمائندہ ڈاکٹر لیتھا گنارتھنا مہیپالا نے کہا کہ یہ ویکسین کئی کلینیکل ٹرائلز سے گزر چکی ہے اور اس کے بعد ہی اسے پاکستان اور دنیا بھر میں استعمال کرنے کی منظوری دی گئی ہے۔
We welcome the arrival in Pakistan of 1.2 million doses of the AstraZeneca COVID-19 vaccine. The U.S. is proud to support equitable global vaccine access through #COVAX. We stand with Pakistan in the fight against this pandemic. https://t.co/Az7P69jssO pic.twitter.com/hzA1kYnrJ3
— U.S. Embassy Islamabad (@usembislamabad) May 8, 2021
ان کا کہنا تھا کہ اس وقت عالمی ادارہٴ صحت ’ڈبلیو ایچ او‘ کی توجہ وبا کے خاتمے کے لیے پاکستان کی بھر پور معاونت پر مرکوز ہے اور اس میں ویکسین کی نئی کھیپ اور صحت عامہ کے اقدامات بھی شامل ہیں جو 15 ماہ سے جاری ہیں۔
پاکستان میں کرونا کی کتنی ویکسین آئی ہے؟
پاکستان میں اب تک موصول ہونے والی ویکسین کی خوراکوں کی تعداد 50 لاکھ سے زائد ہو چکی ہے۔ جب کہ ملک بھر میں 33 لاکھ 20ہزار سے زائد لوگوں کو ویکسین لگائی جا چکی ہے۔
اس بارے میں این سی او سی کے اعداد و شمار کے مطابق چین سے سب سے زیادہ 30 لاکھ ویکسین کی خوراکیں درآمد کی گئی ہیں۔ جب کہ ’کوویکس‘ پروگرام کے تحت برطانیہ سے 12 لاکھ اور تجارتی پروگرام کے تحت روس سے ’اسپوتنک فائیو‘ ویکسین کی پانچ لاکھ سے زائد خوراکیں پاکستان آئی ہیں۔
سرکاری اعداد و شمار کے مطابق اب تک سات لاکھ سے زائد ہیلتھ ورکرز اور 26 لاکھ سے زائد عام شہریوں کو ویکسین لگائی جا چکی ہے۔
Vaccine Statistics: Vaccine administered across Pakistan on 6th May: 170,182Total vaccine administered till now: 3,320,304
— NCOC (@OfficialNcoc) May 7, 2021
پاکستان میں ویکسین سب سے پہلے چین کی طرف سے تحفہ کے طور پر پانچ لاکھ خوراکوں کی صورت میں موصول ہوئی تھی جس کے بعد پاکستان میں ہیلتھ ورکرز کی ویکسی نیشن کا آغاز کیا گیا تھا۔
اس کے بعد چین کی طرف سے مزید پانچ لاکھ خوراکیں اور اس کے بعد 30 لاکھ سے زائد چین کی ’سائنو فارم‘ ویکسین اور ’کین سینو‘ ویکسین پاکستان فضائیہ اور پی آئی اے کے طیاروں کے ذریعے ملک میں لائی جا چکی ہے۔
حکام کے مطابق پاکستان میں اس وقت دو لاکھ سے زائد افراد کو یومیہ ویکسین لگائی جا رہی ہے اور اب تک 40 سال سے زائد عمر کے افراد کو اس مہم میں شامل ہونے پر تیزی آئی ہے۔