پاکستان میں حالیہ عرصے کے مقبول ترین ڈرامے 'میرے پاس تم ہو' کا اختتام ہو گیا۔ جس کے اختتام پر ڈرامے کا مرکزی کردار دانش ہارٹ اٹیک کی وجہ سے انتقال کر گیا۔
اس ڈرامے کی آخری قسط کا پورے پاکستان میں شدت سے انتظار کیا جا رہا تھا اور اس کے ختم ہوتے ہی سوشل میڈیا پر اس کے اختتام کے حوالے سے ٹوئٹس کا تانتا بندھ گیا۔ ڈارامے کے اختتام کے ساتھ ہی ٹوئٹر پر 'میرے پاس تم ہو' پاکستان میں ٹاپ ٹرینڈ بن گیا تھا جب کہ دوسرے نمبر پر اسی ڈرامے کا کردار دانش کا بیٹا رومی ٹرینڈ کرتا رہا۔
ڈرامے کے دردناک انجام پر بیشتر افراد نے افسوس کا اظہار کیا اور بعض لوگوں کے مطابق اس کا حل یہی بنتا تھا۔ تاہم، ایک ٹوئٹر صارف وسیم عباسی جنہوں نے آخری قسط سینما ہال میں دیکھی تھی، اپنے ٹوئٹ میں کہا کہ سینما میں 'میرے پاس تم ہو' کے اختتام پر کسی ہاتھ میں ٹشو تھا اور منہ میں گالی، انجام پہ کوئی خوش نہ ہوا۔
سینما میں #میرے_پاس_تم_ہو کے اختتام پر ہر کسی کے ہاتھ میں ٹشو تھا اور منہ میں گالی۔۔۔ انجام پہ کوئی خوش نہ ہوا
— Waseem Abbasi (@Wabbasi007) January 25, 2020
اس ڈرامے کے اختتام میں لوگ اس قدر دلچسپی لے رہے تھے کہ لاہور شہر کے مقامی چینل سٹی 42 نے ہیرو کے انتقال پر بریکنگ نیوز بھی چلائی اور لکھا کہ 'میرے پاس تم ہو' کے ہیرو دانش ہارٹ اٹیک سے انتقال کر گئے۔
سارہ بلوچ نامی ایک صارف نے لکھا کہ فیس بک کے مالک مارک زکربرگ کا وزیراعظم عمران خان کو فون۔ دانش کی المناک موت پر اظہار تعزیت۔ فیس بک کا لوگو سوگ میں کالا رکھنے کا اعلان۔ ان کےاہل خانہ بھی رو رہے ہیں۔
Mark Zuckerberg, Called Imran Khan for the condolence on terrible death of Danish! Intended to keep Facebook theme black ! His family is also crying 😭 #MerayPaasTumHo
— Sara Baloch (@Sara_Baloch786) January 25, 2020
ایک صارف شاہد خاکسار نے اپنی ٹوئٹ میں وزیراعظم عمران خان کے قبر میں سکون والے بیان کو شامل کرتے ہوئے کہا کہ “آخری وقت میں رائٹر خلیل الرحمٰن نے کہانی یہ سوچ کر تبدیل کر دی کہ سکون صرف قبر میں ہے اور دانش مر گیا۔”
آخری وقت میں رائٹر خلیل الرحمن نے کہانی یہ سوچ کر تبدیل کر دی کہ سکون صرف قبر میں ہےاور دانش مرگیا!#MerayPaasTumHo
— شاہد خاکسار🐬 (@ShahidKSR2) January 25, 2020
وفاقی وزیر سائنس و ٹیکنالوجی فواد چوہدری بھی اس ڈرامے پر تبصرہ کیے بغیر نہ رہ سکے۔
فواد چوہدری نے ڈرامہ نشر کرنے والے ٹی وی چینل کو مبارکباد دیتے ہوئے کہا کہ قلم کار اور پوری ٹیم داد کی مستحق ہے۔
ان کے بقول میں ایمازون اور نیٹ فلکس کو کہوں گا کہ وہ پاکستان کی ڈرامہ اور فلم انڈسٹری میں سرمایہ کاری کریں۔
انہوں نے مزید کہا کہ پاکستان میں بھارت کے مقابلے میں بہترین دماغ ہیں جب کہ پاکستان کی موسیقی بھارت سے بہت آگے ہے۔ آپ کو اس فیصلے پر پچھتانا نہیں پڑے گا۔
Must congretulate @ARYVideos for showing epic drama serial #MerayPassTumHo, writer n whole team deserves big applause. I yet again ask @amazon and @Netflix invest in Pak drama n film #Pakistan has far better minds than India our music is far superior, you guys wont regret.
— Ch Fawad Hussain (@fawadchaudhry) January 25, 2020
یہ ڈرامہ پاکستان کی تاریخ کے مقبول ترین ڈراموں میں سے ہے۔ پاکستان میں کیبل سروس فراہم کرنے والے ادارے نیاٹیل کی جانب سے ڈرامے کے اختتامی لمحات میں 9:36 منٹ پر اس ڈرامے کو ملک بھر میں 66.01 فیصد صارفین دیکھ رہے تھے، جبکہ جیو نیوز اور اے آر وائی نیوز سمیت تمام نیوز چینلز پر اگرچہ اس وقت رات کا اہم بلیٹن نشر کیا جا رہا تھا۔ لیکن، ان سب کو دیکھے جانے کی شرح صرف 5 سے 8 فیصد تک تھی۔
اس ڈرامے کا انجام جو بھی ہوا لیکن اس ڈرامے نے ماضی کے پاکستانی ڈرامے کی ایک بار پھر یاد دلا دی جب ہٹ ڈرامہ لگنے پر گلیاں اور سڑکیں سنسان ہو جاتی تھیں۔ ڈرامہ تجزیہ کاروں کے مطابق، 'میرے پاس تم ہو' پاکستان کا ایک بلاک بسٹر ڈرامہ ثابت ہوا۔