انٹرنیشنل کرکٹ میں پاکستان کی نمائندگی کرنے والے دو کھلاڑیوں کی شکایت پر سندھ پولیس کے چار اہلکاروں کو نوکری سے معطل کرتے ہوئے گرفتار کر لیا گیا ہے۔
کرکٹر صہیب مقصود اور عامر یامین نے پیر کو سماجی رابطے کی سائٹ ایکس پر شکایت کی تھی کہ بذریعہ سڑک ملتان جاتے ہوئے سندھ کے ضلع شہید بے نظیر آباد کے قریب پولیس اہلکاروں نے ان سے رشوت لی تھی۔
انٹرنیشنل کرکٹرز کے ٹوئٹ پر آئی جی سندھ رفعت مختار راجہ نے نوٹس لے کر ڈی آئی جی شہید بے نظیر آباد کو فوری تحقیقات کا حکم دیا تھا۔
رشوت کا مطالبہ کرنے والے سکرنڈ پولیس اسٹیشن کے چاروں اہلکاروں کو حراست میں لے کر مقدمہ درج کر لیا گیا ہے۔
سندھ پولیس کے مطابق واقعے میں سکرنڈ پولیس کے چار اہلکار ملوث پائے گئے ہیں جن کے خلاف باقاعدہ قانونی کارروائی کا آغاز کر دیا ہے جب کہ تھانہ سکرنڈ کے ایس ایچ او اور منشی کو غفلت و لاپرواہی کا مرتکب قرار دے کر معطل کردیا ہے۔
صہیب مقصود اور عامر یامین کے ساتھ ہوا کیا تھا؟
پچاس سے زائد انٹرنیشنل میچز میں پاکستان کی نمائندگی کرنے والے صہیب مقصود نے اپنی سوشل میڈیا پوسٹ میں سندھ پولیس کو کرپٹ قرار دیتے ہوئے اپنے ساتھ ہونے والے واقعے کو ایک تلخ تجربہ قرار دیا تھا۔
صہیب مقصود نے لکھا کہ وہ زندگی میں پہلی بار کراچی سے ملتان براستہ سڑک سفر کررہے تھے، ان کے ساتھ جس قسم کا برتاؤ سندھ پولیس نے کیا اس پر وہ خود کو خوش قسمت سمجھتے ہیں کہ وہ سندھ میں نہیں رہتے۔
صہیب مقصود نے الزام عائد کیا کہ سندھ پولیس اتنی کرپٹ ہے کہ آپ کو 50 کلومیٹر کے بعد روک کر پیسے مانگتی ہے ، اور رشوت نہ دینے پر بلا وجہ تھانے لے جانے کی دھمکی دیتی ہے۔
We are so lucky that we live In Punjab not in Sindh first time in my life I am travelling from Karachi to Multan by Road and sindh police is so corrupt that they stop you after 50 km and ask for money or they threat you to go to the police station for no reason if you give them
— Sohaib Maqsood (@sohaibcricketer) November 27, 2023
صہیب مقصود نے ایکس پر جاری اپنے ایک اور بیان میں کہا کہ جب انہوں نے پولیس کو بتایا کہ وہ انٹرنیشنل کرکٹر ہیں اور کراچی میں میچ کھیلنے کے بعد ملتان کا سفر کر رہے ہیں، تب بھی انہیں کسی قسم کی رعایت نہیں ملی اور پولیس نے انہیں8000 ہزار روپے لینے کے بعد جانے دیا۔
صہیب مقصود کے ساتھ کراچی سے ملتان سفر کرنے والے عامر یامین نے بھی اس واقعے کا سوشل میڈیا پوسٹ میں ذکر کیا، جس میں انہوں نے سندھ پولیس کے برتاؤ کو افسوس ناک قرار دیا۔
دونوں کھلاڑیّں کی پوسٹ کے بعد سوشل میڈیا صارفین نے سندھ پولیس پر سخت تنقید کی۔ ایک صارف نے صہیب مقصود کو اپنی سوشل میڈیا پوسٹ میں سندھ پولیس اور ہوم منسٹری کو ٹیگ کرنے کا مشورہ بھی دیا۔
Sohaib bhaii tag Sindh police and home ministry
— ٰImran Siddique (@imransiddique89) November 27, 2023
ایک اور صارف کے مطابق سندھ میں رہنے والوں کے لیے یہ کوئی نئی بات نہیں۔
As a sindhi ....Tell me something that I don%27t know
— Ibrahim Hafeez (@IbrahimHafeez9) November 27, 2023
سندھی اجرک نامی صارف کے خیال میں صہیب مقصود کو اس طرح کی پوسٹ نہیں کرنا چاہیے تھی کیوں کہ کرپشن کا مسئلہ سندھ پولیس کا نہیں بلکہ پنجاب میں بھی ایسا ہی ہوتا ہے۔
Its very disgusting , you must be thankful to Sindhi to feed you … I was in Lahore and paid 3000 for nothing to police but I can’t say I don’t want to go Punjab or Punjab police is curse … its individual which is highly condemnable and we support you but to show hate against…
— Sindhi-Ajrak (@SindhiDoctrine) November 28, 2023