|
ویب ڈیسک — امریکہ کی ریاست الاسکا میں جمعرات کو لاپتا ہونے والے چھوٹے طیارے کا ملبہ مل گیا ہے۔ رپورٹس کے مطابق طیارے کے پائلٹ سمیت اس میں سوار تمام دس افراد ہلاک ہو گئے ہیں۔
امریکہ کے کوسٹ گارڈ نے طیارے کا ملبہ ملنے کی تصدیق کی ہے۔ ترجمان کوسٹ گارڈ مائیک سلرنو کے مطابق ریسکیو ورکرز نے ہیلی کاپٹر کی مدد سے طیارےکے ملبے کی نشاندہی کی۔
ترجمان کے مطابق متاثرہ طیارے کی ریڈار میں آنے والی آخری لوکیشن پر سرچ آپریشن شروع کیا گیا۔
الاسکا اسٹیٹ ٹروپرز، الاسکا ایئر نیشنل گارڈ، الاسکا آرمی نیشنل گارڈ سمیت مقامی سرچ ٹیموں نے لاپتا طیارے کی تلاش کے کاموں میں حصہ لیا۔
بیرنگ ایئر کا طیارہ جمعرات کو یونالکلیٹ سے نوم شہر جا رہا تھا جس میں پائلٹ سمیت دس افراد سوار تھے۔
الاسکا اسٹیٹ ٹروپرز کے مطابق انہیں جمعرات کی شام چار بجے طیارے کے لاپتا ہونے کے بارے میں بتایا گیا تھا۔
کوسٹ گارڈ نے ایک بیان میں کہا تھا کہ آخری مرتبہ طیارے کی لوکیشن سمندر سے 19 کلو میٹر دور دیکھی گئی تھی۔
امریکہ میں گزشتہ چند روز کے دوران یہ تیسرا فضائی حادثہ ہے۔ 29 جنوری کو واشنگٹن ڈی سی کے ریگن نیشنل ایئرپورٹ کے قریب امیریکن ایئر لائنز کے مسافر طیارے اور فوجی ہیلی کاپٹر کے درمیان تصادم ہوا تھا جس میں مجموعی طور پر67 افراد سوار تھے۔
اس واقعے کے دو روز بعد ہی فلاڈیلفیا شہر میں ایک ایئر ایمبولینس کے گرنے کے واقعے میں سات افراد ہلاک ہوئے تھے۔
اس رپورٹ کے لیے بعض معلومات ایسوسی ایٹڈ پریس سے لی گئی ہیں۔
فورم