اسرائیل: بچوں، خواتین اور 55 سال سے زیادہ عمر کے مردوں کو یروشلم میں نماز جمعہ کی اجازت
اسرائیل کے زیر انتظام علاقوں میں حکومتی سرگرمیوں کے کوآرڈینیٹر نے پیر کو اعلان کیا تھا کہ فلسطینی خواتین، 12 سال سے کم عمر کے بچوں اور 55 سال سے زیادہ عمر کے مردوں کو رمضان کے پہلے جمعہ کے موقع پر بغیر اجازت یروشلم جانے کی اجازت ہوگی۔
رمضان المبارک کے پہلے جمعے کی نماز کے لیے مغربی کنارے سے ہزاروں فلسطینی مسجد اقصیٰ میں نماز میں شرکت کے لیے چوکیاں عبور کرکے یروشلم پہنچے۔
انڈونیشیا: 180 سے زیادہ روہنگیا پناہ گزین کشتی کے ذریعے آچے پہنچ گئے
انڈونیشیا کے صوبہ آچے میں پیر کے روز 180 سے زیادہ روہنگیا مسلمان پہنچے ہیں ۔
حکام نے بتایا کہ یہ ان سینکڑوں تارکین وطن میں شامل ہیں جو میانمار اور بنگلہ دیش کے کیمپوں میں مایوس کن حالات سے دلبراشتہ ہو کر کشتی کے ذریعے فرار ہوئے ہیں۔
مقامی پولیس کے مطابق ، مشرقی آچے ضلع میں پہنچنےوالے کم از کم 175 روہنگیا پناہ گزینوں کو تلاش کر لیا گیا ہے جب کہ 13 ابھی تک لاپتہ ہیں۔
فوری طور پر یہ واضح نہیں ہو سکا کہ وہ کتنے جہازوں پر تھے۔
گزشتہ سال نومبر سے انڈونیشیا نے 918 روہنگیا رجسٹر کیے ہیں جو اس کے دور افتادہ مغربی علاقے آچے پہنچےہیں۔
تقریباً 10 لاکھ روہنگیا بنگلہ دیش میں پرہجوم کیمپوں میں رہتے ہیں۔ ان میں وہ لوگ بھی شامل ہیں جو 2017 میں میانمار کی فوج کے مہلک کریک ڈاؤن سےجان بچانے کے لیے اپنا گھر بار چھوڑ کر فرار ہوئے تھے۔
میانمار انسانیت کے خلاف جرائم کے ارتکاب سے انکار کرتا ہے۔
اقوام متحدہ اور امریکہ کی کابل میں دہشت گرد حملے کی مذمت
اقوام متحدہ، امریکہ اور سعودی عرب نے پیر کے روز کابل میں دفتر خارجہ کے قریب طالبان کی سیکیورٹی چوکی پر حملے کی مذمت کی ہے جس میں دفتر کے 2 ملازمین سمیت کم از کم 6 افراد ہلاک اور 3 طالبان سیکیورٹی گارڈز سمیت 15 سے زائد زخمی ہوئے تھے۔
یو این اے ایم اے نے ایک بیان میں کہا کہ یہ ناقابل قبول ہے کہ عام افغان اپنی روزمرہ زندگی کے دوران نشانہ بنتے ر ہیں۔ یوناما متاثرین اور ان کے اہل خانہ سے تعزیت کا اظہار کرتی ہے۔
اسی دوران افغانستان کے لیے امریکی نمائندہ خصوصی تھامس ویسٹ نے بھی ایک ٹویٹ میں کہا ہے کہ افغان عوام نے کافی نقصان اٹھایا ہے اور کسی بھی جگہ پر کسی بھی وجہ سے دہشت گردی ناقابل قبول ہے۔
رائٹرز نیوز ایجنسی کے مطابق، داعش خراسان نے ٹیلی گرام اکاؤنٹ پر، پیر کو کابل میں خودکش حملے کی ذمہ داری قبول کی ہے۔
بحیرہ جاپان میں روسی بحری مشقوں پر ہماری نظر ہے: جاپان
جاپان کے ڈپٹی چیف کابینہ سکرٹری یوشیکیو اسوکازی نے منگل کو کہا کہ حکومت بحیرہ جاپان میں ماسکو کی بحری مشقوں کےدوران روسی فوجی کارروائیوں پر نظر رکھے گی۔
انہوں نے کہا کہ مجھے معلوم ہے کہ آج روسی وزیر دفاع نے اعلان کیا کہ پیسیفک فلیٹ کے بحری جہازوں نے بحیرہ جاپان میں کروز میزائل لانچ کرنے کی تربیت دی ہے ۔
ماسکو نے بحیرہ جاپان میں اینٹی شپ میزائل کا تجربہ کیا ہے۔
روس کی وزارت دفاع نے منگل کو کہا کہ دو کشتیوں نے تقریباً 100 کلومیٹر دور ایک فرضی دشمن کے جنگی جہاز پر میزائل کا مصنوعی حملہ کیا۔
روسی وزارت نے کہا کہ ہدف کو دو موسکیٹ کروز میزائلوں سے کامیابی سے نشانہ بنایا گیا۔