کابل میں دوحہ معاہدے کی تیسری سالگرہ کی تقریب
طالبان نے کابل میں ایک تقریب میں امریکی حکومت کے ساتھ دوحہ معاہدےپر دستخطوں کی تیسری سالگرہ منائی۔
معاہدے پر دستخط کرنے والے ملا عبدالغنی برادر نے اے آر جی میں ایک اجتماع سے خطاب کرتے ہوئے کہا کہ طالبان اب بھی دوحہ معاہدے پر قائم ہیں۔
لیکن انہوں نے امریکی حکومت پر الزام لگایا کہ انہوں نے طالبان رہنماؤں کے نام اقوام متحدہ کی پابندیوں کی فہرست سے نہیں نکالے اور افغانستان کے بینک کے ذخائر کو منجمد کر دیا۔
انہوں نے امریکی حکومت پر دیگر ممالک کو افغانستان میں لوگوں کی مدد کرنے سے روکنے کا الزام بھی لگایا۔
انہوں نے کہا کہ طالبان دنیا سے بات چیت چاہتے ہیں۔
طالبان اور امریکی حکومت نے 29 فروری 2020 میں دوحہ معاہدے پر دستخط کیے تھے
اقوام متحدہ کا طالبان سے کارکن خواتین پر عائد پابندیاں ہٹانے کا مطالبہ
اقوام متحدہ کے انسانی حقوق کے رابطہ دفتر ،اوچا نے کہا ہے کہ افغانستان میں خواتین کے ساتھ امتیازی سلوک کے ملک بھر میں لاکھوں لوگوں پر تباہ کن اثرات مرتب ہوں گے۔
انسانی حقوق کے دفتر کا مزید کہنا ہے کہ خواتین امدادی کارکنوں پر پابندی لاکھوں کمزور خواتین اور لڑکیوں کو زندگی بچانے والی امداد حاصل کرنے سے روکتی ہے۔
انہوں نے یہ پابندیاں فوری طور پر ختم کرنے کا مطالبہ کیا۔
چین سے مسابقت: امریکہ کا جاپان اور جنوبی کوریا کے ساتھ ڈائیلاگ فورم بنانے کا اعلان
ٹیکنالوجی کے میدان میں چین کا مقابلہ کرنے کے لیے بائیڈن انتظامیہ نے جاپان اور جنوبی کوریا کے ساتھ مل کرایک نیا ڈائیلاگ فورم بنانے کا اعلان کیا ہے۔
فورم کا مقصد سیمی کنڈکٹرز کی فراہمی کو دوست اور اتحادی ممالک تک محدود کرنا بتایا جا رہا ہے۔
امریکہ اس مد میں اربوں ڈالر کی سرمایہ کاری کر رہا ہے اور دنیا بھر میں سیمی کنڈکٹرز بنانے والی کمپنیوں کو امریکی کمپنیوں کے ساتھ مل کر کام کرنے کی ترغیب دے رہا ہے۔
خیال رہے کہ چین کی الیکٹرانک انڈسٹری سیمی کنڈکٹرز کے حصول کے لیے تائیوان اور جنوبی کوریا سمیت دیگر ملکوں پر انحصار کرتی ہے۔
صدر ایردوان کا ترکیہ میں 14 مئی کو قومی انتخابات کرانے کا اعلان
ترکیہ کے صدر رجب طیب ایردوان نے کہا ہے کہ ملک میں تباہ کن زلزلے کے باوجود قومی انتخابات 14 مئی کو ہی ہوں گے۔
پارلیمنٹ سے خطاب میں صدر ایردوان نے کہا کہ 14 مئی کو عوام کو جو بہتر لگے گا، وہ کریں گے۔
صدر نے یہ اعلان ایسے وقت میں کیا ہے جب ترکیہ میں گزشتہ ماہ آنے والے ہول ناک زلزلے میں ہلاکتوں کی تعداد 45 ہزار سے بڑھ گئی ہے۔
زلزلے کی وجہ سے یہ خدشہ ظاہر کیا جا رہا تھا کہ انتخابات رواں برس کے آخر تک مؤخر ہو سکتے ہیں۔