افغانستان کے لیے یورپی یونین کے ایلچی ٹامس نکلسن کا دورہ پاکستان
افغانستان کے لیے یورپی یونین کے نمائندے ٹامس نکلسن نے بھی پاکستان کا دورہ کیا اور افغانستان کے لیے پاکستان کے ایلچی محمد صادق سے افغانستان کے بارے میں تبادلہ خیال کیا۔
محمد صادق نے ٹویٹ کیا کہ انہوں نے افغانستان کے لیے یورپی یونین کے خصوصی نمائندے ٹامس نکلسن سے ملاقات کی۔
متعدد امور کے علاوہ ہم نے افغانستان کے لوگوں کے لیے اپنی متعلقہ انسانی امداد پربھی تبادلہ خیال کیا۔
میانمار: سویلین حکومت کا تختہ الٹنے کی دوسری برسی پر ملک گیر ہڑتال
میانمار کی جمہوریت نواز تحریک کے حامیوں نے فوج کی طرف سے سویلین حکومت کا تختہ الٹنے کی دو سال مکمل ہونے پر تمام اقتصادی سرگرمیوں کا بدھ کو ملک گیر پیمانے پر بائیکاٹ کیا ۔
آنگ سان سوچی کی نیشنل لیگ فار ڈیموکریسی پارٹی نے نومبر 2020 کے عام انتخابات میں فوج کی حمایت یافتہ یونین سالیڈیرٹی اینڈ ڈیولپمنٹ پارٹی پر بھاری اکثریت سے کامیابی حاصل کی۔
جنتا نے انتخابات میں بڑے پیمانے پر انتخابی دھاندلیوں کو سویلین حکومت کا تختہ الٹنے اور نتائج کو تبدیل کرنے کی وجہ قرار دیا۔ سویلین الیکٹورل کمیشن نے ان الزامات کی تردید کی تھی۔
جنتا نے توقع کے مطابق ہنگامی حالت میں مزید چھ ماہ کی توسیع کا اعلان کر دیا ہے۔
امریکہ، آسٹریلیا، برطانیہ اور کینیڈا نے اس موقع پر میانمار کی حکومت کے خلاف نئی پابندیوں کا اعلان کیا جس میں ملک کی فوج سے منظور شدہ الیکشن کمیشن اور فوج کی حمایت یافتہ کارپوریشنز شامل ہیں .سب سے اہم پابندیاں برطانیہ اور کینیڈا کی جانب سے عائد کی گئی تھیں۔
یمن: ڈورن حملے میں القاعدہ کے تین جنگجو ہلاک
یمن میں مقامی سرکاری حکام نے بتایا کہ شمال مشرقی یمن میں ایک مشتبہ امریکی ڈرون حملے میں القاعدہ کے تین مبینہ جنگجو مارے گئے۔
حکام نے بتایا کہ یہ حملہ ماریب صوبے میں ایک کار پر کیا گیا، جو یمن کی طویل عرصے سے جاری خانہ جنگی میں 2021 سے شدید لڑائی کا گڑھ ہے۔
ایک سرکاری اہل کار نے نام ظاہر نہ کرنے کی شرط پر اے ایف پی کو بتایا کہ ایک مجوزہ امریکی ڈرون کے حملے میں القاعدہ کے تین ارکان مارے گئے ۔
تینوں وادی عبیدہ میں ایک کار میں تھے جب انہیں مشتبہ امریکی حملے میں نشانہ بنایا گیاجس میں وہ فوراً ہلاک ہو گئے۔
ماریب کے ایک دوسرے سرکاری اہل کار نے القاعدہ کے عسکریت پسندوں پر حملے اور ہلاکتوں کی تعداد کی تصدیق کی۔
واشنگٹن کی جانب سے فوری طور پر کوئی تبصرہ نہیں کیا گیا۔
امریکہ القاعدہ کی یمن کی شاخ - جزیرہ نما عرب میں القاعدہ کو عالمی جہادی نیٹ ورک کی سب سے خطرناک شاخوں میں شمار کرتا ہے۔
یمن 2015 سےجنگوں کی لپیٹ میں ہے اور اقوام متحدہ اسے بدترین انسانی بحران قرار دیتا ہے جس میں لاکھوں لوگ بے گھر ہو چکے ہیں۔
ایران کا اسرائیل پر اصفہان کی فوجی تنصیب پر ڈورن حملے کا الزام، جوابی کارروائی کی دھمکی
ایران نے سرکاری طور پر اس ڈرون حملے کا الزام اسرائیل پر عائد کیا ہے جس نے اختتام ہفتہ اس کے مرکزی شہر اصفہان میں ایک فوجی ورکشاپ کو نشانہ بنایا تھا۔
اس حملے کے بعد ایران نے خبردار کیا تھا کہ وہ جوابی کارروائی کا اپنا جائز حق محفوظ رکھتا ہے۔
اقوام متحدہ میں ایران کے مشن نے جمعرات کو اپنی ویب سائٹ پر شائع ہونے والے ایک خط میں اس حملے کا ذمہ دار اسرائیل کو قرار دیا ہے۔
اسرائیلی حکام نے اس بیان پر تبصرہ کرنے سے انکار کر دیا۔
ایرانی سفیر امیر سعید ایرانی کے دستخطوں سے جاری ہونے اس خط میں یہ انتباہ بھی شامل ہے کہ ایران اسرائیل کے حملے کا جواب دے سکتا ہے۔
عالمی طاقتوں کے ساتھ تہران کے 2015 کے جوہری معاہدے کے خاتمے کے بعد سے اسرائیل نے ایران کے جوہری پروگرام اور دیگر مقامات کو نشانہ بناتے ہوئے کئی حملے کیے ہیں۔