نیٹو کے سیکرٹری جنرل کا یوکرین پر روسی حملے کے تناظر میں جاپان کا دورہ
نیٹو کے سیکرٹری جنرل جینز اسٹولٹن برگ نے منگل کو جاپان کے اپنے دورے میں روس کے یوکرین پر حملے کے وسیع ممکنہ اثرات پر زور دیتے ہوئے کہا کہ جو آج یورپ میں ہو رہا ہے وہ کل مشرقی ایشیا میں بھی ہو سکتا ہے۔
سٹولٹن برگ نے جاپانی وزیر اعظم فومیو کیشیدا کے ساتھ ایک مشترکہ نیوز کانفرنس میں صحافیوں سے گفتگو کرتے ہوئے کہا کہ اگر صدر پوٹن یوکرین جنگ میں جیت جاتے ہیں تو اس سے یہ پیغام جائے گا کہ آمرانہ حکومتیں وحشیانہ طاقت کے ذریعے اپنے مقاصد حاصل کر سکتی ہیں۔
انہوں نے کہا کہ بیجنگ بھی اس کا بغور جائزہ لے رہا ہے اوراس سے سبق حاصل کر رہا ہے جو اس کے مستقبل کے فیصلوں پر اثر انداز ہو سکتے ہیں ۔
اسٹولٹن برگ نے روس کے خلاف جاپان کی جانب سے پابندیوں اور یوکرین کے لیے اہم حمایت کا بھی خیر مقدم کیا۔
بیرونی طاقتیں افریقہ کے قدرتی وسائل لوٹنا بند کردیں: پوپ فرانسس
پوپ فرانسس 31 جنوری سے وسطی افریقہ کے دورے کا آغاز کر دیا ہے جس کا مقصد خطے میں سب سے زیادہ تشدد اور غربت کے شکار دو ملکوں کوامن کا پیغام دے سکیں۔
86 سالہ پوپ کا 6روزہ دورہ جمہوریہ کانگو سے شروع ہو ا جہاں دارالحکومت کنشاسا کے ہوائی اڈے پر ان کا شاندار استقبال ہوا۔ انہوں نے اپنی خطاب میں بیرونی طاقتوں پر زور دیا کہ وہ افریقہ کے قدرتی وسائل لوٹنا بند کر دیں،
جمہوریہ کانگو کے 95 ملین افراد میں سے کم از کم نصف رومن کیتھولک چرچ سے وابستہ ہیں جو اسے افریقہ میں چرچ کی سب سے بڑی کمیونٹی بناتا ہے۔
1985 میں جان پال دوم کی آمد کے بعد سے پوپ کا جمہوریہ کانگو کا یہ پہلا دورہ ہے۔
پوپ جمعے کو کانگو سے جنوبی سوڈان کے لیے روانہ ہوں گے۔
پشاور حملے کے لیے طالبان حکومت کو مورد الزام نہ ٹھہرایا جائے: طالبان وزیر خارجہ
طالبان کے وزیر خارجہ امیر خان متقی نے پاکستان پر زور دیا ہے کہ وہ پشاور پولیس لائن مسجد میں ہونے والے دھماکے کی بھرپور طریقے سے تحقیقات کرے اور 30 جنوری کو ہونے والے حملے کے لیے طالبان حکومت کو مورد الزام نہ ٹھہرائے ۔
اس حملے میں کم از کم سو افراد ہلاک ہوئے تھے۔ انہوں نے کہا کہ طالبان خطے میں امن چاہتے ہیں اور ایک بار پھر ہمسایہ ممالک کو یقین دلایا کہ افغانستان ان کے خلاف اپنی سر زمین استعمال نہیں ہونے دے گا۔
متقی بدھ کے روز کابل میں منشیات کے عادی افراد کے علاج کے لیے پانچ ہزار بستروں پر مشتمل اسپتال کے افتتاح کے موقع پر منعقدہ تقریب سے خطاب کر رہے تھے۔
طالبان کی وزارت داخلہ کے مطابق انسداد منشیات کی نائب وزارت نے اب تک منشیات کے عادی تقریبا 16 ہزار افراد کو اکٹھا کیا ہے اور انہیں افغانستان میں علاج کے مختلف مراکز میں رکھا ہے۔
افغانستان کے لیے خصوصی امریکی ایلچی تھامس ویسٹ کا دورہ پاکستان
افغانستان کے لیے امریکہ کے خصوصی ایلچی تھامس ویسٹ کا کہنا ہے کہ انہوں نے پاکستان کے چیف آف آرمی اسٹاف جنرل سید عاصم منیر اور دیگر پاکستانی حکام سے دہشت گردی اور سیکیورٹی کی صورت حال، عالمی برادری کی ضرورت اور لاکھوں افغان افراد کی اہم سہولیات تک رسائی پر طالبان کے فیصلوں کے اثرات پر بات چیت کی ہے۔
انہوں نے ٹویٹس کی ایک سلسلے میں کہا کہ اپنے دو روزہ دورے کے دوران انہوں نے افغان خواتین سے ملاقات کی اور اہم مطالبات اور مشاہدات سنے۔
گھر تک محدود خواتین اور لڑکیاں انتہائی ذہنی اور نفسیاتی دباؤ کا سامنا کر رہی ہیں اور وہ تعلیم حاصل نہیں کر پا رہی ہیں۔
انہوں نے افغان عوام کی بنیادی ضروریات کی فراہمی کے لیے اقوام متحدہ کے پناہ گزینوں کے ادارے اور عالمی بینک کی بھرپور حمایت پر بھی تبادلہ خیال کیا۔