ازبکستان افغانستان کو 440 میگا واٹ بجلی فراہم کرے گا

طالبان کی وزارت خارجہ نے ایک بیان میں کہا ہے کہ ازبکستان کی وزارت خارجہ نے طالبان حکومت کو مطلع کیا ہے کہ 24 گھنٹے کے اندر افغانستان کو بجلی کی فراہمی بحال کر دی جائے گی۔

طالبان کی وزارت خارجہ کے مطابق پہلے مرحلے میں ازبکستان 250 میگاواٹ بجلی دوبارہ شروع کرے گا اور بعد میں ازبکستان اور طالبان حکومت کے درمیان طے پانے والے معاہدے کے تحت بجلی کی مزید فراہمی کو دوبارہ شرو ع کیا جائے گا۔

ازبکستان نے افغانستان کو 440 میگاواٹ بجلی برآمد کرنے پر اتفاق کیا ہے۔

جنوری کے اوائل میں 2023کے لیے اس معاہدے کی تجدید کی گئی۔

اس وقت طالبان حکومت کی ملکیت بریشنا کمپنی کا کہنا ہے کہ ترکمانستان اور طالبان حکومت کے درمیان پیر کو اشک آباد میں ایک معاہدے پر دستخط ہوئے ہیں ۔

طالبان حکومت اپنی ضرورت کی 80 فیصد بجلی ازبکستان، تاجکستان، ترکمانستان اور ایران سے درآمد کرتی ہے۔

ازبکستان کی حکومت کی جانب سے افغانستان کو بجلی کی بندش کے بعد کابل سمیت افغانستان کے کئی صوبوں کو بجلی کی شدید قلت کا سامنا ہے۔

یوکرین: صدارتی دفتر کے نائب سربراہ سمیت متعدد اعلیٰ عہدے دار مستعفی

یوکرین میں متعدد اعلی عہدے داروں نے استعفے دے دیے ہیں جن میں صدارتی دفتر کے نائب سربراہ کا استعفیٰ بھی شامل ہے۔

صدر ولادیمیر زیلنسکی نے کہا کہ ان کی حکومت میں کچھ اہل کاروں کو تبدیل کیا جائے گا۔

کیریلو تیموشینکو نے ٹیلی گرام پر اپنی ایک پوسٹ میں استعفیٰ کی کوئی وجہ نہیں بتائی۔انہوں نےصدر زیلنسکی کے اعتماد اورانھیں موقع دینے کا شکریہ ادا کیا۔

کیریلو تیموشینکو کے استعفے کو منظور کر لیاگیا ہے۔

زیلینسکی نے پیر کی اپنے شام کے خطاب میں کہا کہ وزارتوں اور مرکزی حکومت کے ساتھ ساتھ مختلف علاقوں اور قانون نافذ کرنے والے اداروں میں مختلف سطحوں کے عہدیداروں کے بارے میں فیصلے کیے جا رہے ہیں ۔

نیٹو کے سکرٹری جینز اسٹولٹن برگ منگل کو برلن میں جرمن وزیر دفاع بورس پسٹوریئس سے ملاقات کر رہے ہیں کیونکہ جرمنی کو یوکرینی افواج کی مدد کے لیے لیپرڈ ٹو ٹینکوں کی منظوری کے لیے مسلسل دباؤ کا سامنا ہے۔

جرمن چانسلر اولاف شولز کے ترجمان نے پیر کو کہا کہ جرمنی ٹینکوں کی منتقلی کو مسترد نہیں کرتالیکن اس بارے میں ابھی کوئی فیصلہ نہیں کیا گیا ہے۔

پولینڈ کے وزیر اعظم نے پیر کو کہا کہ ان کا ملک ایسے ممالک کا اتحاد بنا رہا ہے جو جرمنی سے باضابطہ اجازت نہ ملنے کے باوجود جرمن ساختہ ٹینک یوکرین بھیجنے کے لیے تیار ہیں۔

اقوام متحدہ کے وفد کی خواتین کے حقوق کے بارے میں طالبان قیادت سے ملاقاتیں

اقوام متحدہ کے انسانی امور کے انڈر سیکرٹری جنرل مارٹن گریفتھس کی قیادت میں اعلیٰ سطحی وفد نے بدھ کو کابل میں طالبان حکام سے ملاقاتیں جاری رکھیں اور ان کے ساتھ خواتین، لڑکیوں کی تعلیم اور انسانی امداد کے مسائل پر بات چیت کی۔

طالبان حکومت کی وزارت داخلہ کے مطابق مارٹن گریفتھس نے طالبان کے قائم مقام وزیر داخلہ سراج الدین حقانی سے کہا ہے کہ بلا شبہ یہاں کچھ پیش رفت ہوئی ہے اور ہمیں ایک دوسرے کے اقدامات پر تنقید نہیں کرنی چاہیے لیکن خواتین کی تعلیم اور کام وہ بنیادی حقوق ہیں جن کو بحال کرنے کا ہم مطالبہ کرتے ہیں۔

بیان کے مطابق حقانی نے اقوام متحدہ کے وفد کو بتایا ہے کہ لڑکیوں کو تعلیم سے محروم رکھنے کی کبھی کوئی تجویز سامنے نہیں رہی لیکن تعلیمی نظام کے بارے میں اختلاف رائے ہے جسے حل کیا جا سکتا ہے۔

افغان عوام ایک آزاد اور غیر جانب دار نظام انصاف کے حق دار ہیں: رینا امیری

امریکہ کی خصوصی ایلچی رینا امیری نے خطرے سے دوچار وکیلوں کے عالمی دن کے موقع پر کہا ہے کہ ہم افغان ججوں، وکلاء اور پراسیکیوٹرز کے ساتھ کھڑے ہیں جن کے قانون کی حکمرانی کو فروغ دینے کے کام کو طالبان نے راتوں رات ختم کر دیا تھا۔

ان کا کہنا تھا کہ عدالتیں تحلیل کر دی گئیں، ججوں کو بے دخل کر دیا گیا، پراسیکیوٹرز کو سائیڈ لائن کر دیا گیا اور وکلاء کو دھمکیاں دی گئیں۔

انہوں نے کہا کہ افغان عوام ایک آزاد اور غیر جانبدار انصاف کے نظام کے مستحق ہیں۔ اس کے پیشہ ور افراد، بشمول خواتین، وقار، تحفظ اور احترام کے ساتھ اپنے پیشے پر عمل کرنے کے حق کے مستحق ہیں۔