روس نے جنگ مخالف اداکار آرٹورسمولیانینوف کے خلاف تحقیقات شروع کر دیں
روسی حکام نے یوکرین میں جنگ کے ناقد اور ایک مشہور اداکار اور روسی حزب اختلاف کی حمایت کرنے والی شخصیت کے خلاف مجرمانہ تحقیقات کا اعلان کیا ہے۔
پیر کے روز کیا جانے والا تحقیقات کا اعلان مہینوں سے جاری رہنے والے اختلاف رائے کے خلاف کریک ڈاؤن کا حصہ ہے۔
روس کی تحقیقاتی کمیٹی نے ایک بیان میں کہا ہے کہ اس کے سربراہ الیگزینڈر باسٹریکن نے روسی فلم اور تھیٹر کے اداکار آرٹور سمولیانینوف کے خلاف فوجداری مقدمہ شروع کرنے کا حکم دیاہے ۔
وہ ماسکو کی افواج کے یوکرین پر حملہ کرنے اور بار بار جنگ کے خلاف بات کرنے کے بعد ملک چھوڑ کر جا چکے ہیں ۔
اس کے علاوہ روس کی وزارت داخلہ نے ممتاز انسان دوست بورس زیمن کو فراڈ کے الزام میں بین الاقوامی مطلوب افراد کی فہرست میں شامل کر دیا ہے۔
پیرو: سیکیورٹی فورسز اور مظاہرین کے درمیان جھڑپوں میں 34 افراد ہلاک
پیرو میں سیکیورٹی فورسز کے ساتھ جھڑپوں میں ہلاک ہونے والوں کی تعداد 34 ہو گئی ہے جب کہ سینکڑوں زخمیوں کا علاج جاری ہے۔
تازہ ترین ہلاکتیں پیر کو ہوئیں۔
جنوب مشرقی پیرو میں کم از کم13 افراد ہلاک ہو ئے ۔
ملک کے ان دیہی علاقوں میں، جنہیں نظر انداز کر دیا گیا تھا، فوری انتخابات کے لیے مظاہرے دوبارہ شروع ہو گئےہیں۔
ان علاقوں میں اب بھی معزول صدر پیڈرو کاسٹیلو کی حمایت برقرار ہے۔
پیرو کی انسانی حقوق کی اعلیٰ ایجنسی نے ان ہلاکتوں کی تحقیقات کا مطالبہ کیا ہے جو بولیویا کی سرحد کے قریب جولیاکا شہر کے ایک ہوائی اڈے پر قبضے کی کوشش کرنے والی سیکیورٹی فورسز اور مظاہرین کے درمیان جھڑپوں کے دوران ہوئیں۔
کاسٹیلو کی جانشین ڈینا بولوارٹے نے 2024 میں قومی انتخابات کرانے کے منصوبے کی حمایت کی ہےجب کہ طے شدہ شیڈول کے مطابق انتخابات کو 2026 میں منعقد ہونا ہے۔
انہوں نے سیکیورٹی فورسز کی جانب سے ضرورت سے زیادہ طاقت کے استعمال پر عدالتی تحقیقات کرانے کا بھی مطالبہ کیا ہے۔
افغانستان میں انسانی صورت حال پر اسلامی تعاون تنظم کی ایگزیکٹو کمیٹی کا ہنگامی اجلاس
اسلامی تعاون تنظیم (او آئی سی) افغانستان کی تازہ ترین صورت حال کا جائزہ لیے کے لیے جدہ میں واقع اپنے صدر دفاتر میں ایگزیکٹو کمیٹی کا ہنگامی اجلاس منعقد کر رہا ہے۔
اس اجلاس میں طالبان کے قبضے کے بعد پیدا ہونے والے حالات اور انسانی حقوق کی صورت حال کا جائزہ لیا جائے گا۔
اسلامی تعاون تنظیم اور انٹرنیشنل فقہ اکیڈمی اس سے قبل اپنے بیانات میں لڑکیوں کی تعلیم پر پابندی سے متعلق طالبان کے احکامات کو اسلامی قانون کے منافی قرار دے چکی ہے۔
دوسری جانب طالبان حکومت کے اعلیٰ تعلیم سے متعلق قائم مقام وزیر کا کہنا ہے کہ ان کی حکومت تمام شہریوں کے حقوق برقرار رکھنے کے لیے پر عزم ہیں اور وہ تعلیم کے خلاف نہیں ہے۔ اس سے قبل طالبان حکومت کے نائب وزیر خارجہ عباس ستانکزئی اسلامی ممالک کے وفد سے ملاقات میں کہہ چکے ہیں کہ شریعت کے خلاف احکامات کو نہیں ماننا چاہیے۔ افغانستان کے میڈیا کے مطابق ان کا یہ بیان طالبان حکومت کے موقف کے برعکس ہے۔
افغانستان میں کھلاڑی افغان خواتین اورلڑکیوں نے خبر رساں ادارے اے پی کو بتایا ہے کہ انہیں طالبان کی طرف سے دھمکیوں کا سامنا کرنا پڑرہا ہے ۔ان میں سے کچھ برقعے پہن کر کھیلنے کے طریقے تلاش کر رہی ہیں۔
افغانستان میں شدید سردی کی لہر، سالانگ ہائی وے بند، کابل کا درجہ حرارت منفی 21 تک گرنے کا امکان
افغانستان کے کچھ حصوں میں منگل کے روز ہونے والی شدید برف باری کے بعد سالانگ پاس سمیت کئی شاہراہیں بند کر دی گئیں۔
طالبان کی وزارت امور عامہ کے مطابق سالانگ ہائی وے شدید برف باری اور موسلادھار بارش کی وجہ سے ٹریفک کے لیے بند ہے۔
وزارت نے لوگوں سے کہا ہے کہ وہ آئندہ اطلاع تک اس شاہراہ پر سفر کرنے سے گریز کریں۔
اسی دوران موسم کی پیش گوئی کرنے والے اداروں نے بتایا ہے کہ افغانستان بھر میں سردی کی لہر جمعرات12 جنوری سے شروع ہو گی اور ایک ہفتے تک جاری رہے گی۔
موسمیات کے ادارے کے مطابق جمعرات کو کابل میں درجہ حرارت منفی21 رہے گا۔