امریکی فورسز نے خلیج عمان میں ایران سے یمن جانے والی دو ہزار سے زیادہ رائفلیں پکڑ لیں
امریکہ کے پانچو یں بحری بیڑے کے ایک بیان میں کہا گیا ہے کہ اس کی فورسز نے خلیج عمان میں ماہی گیری کے ایک جہاز پردو ہزار سے زیادہ اے کے 47 اسالٹ رائفلیں پکڑی ہیں۔
ماہی گیری کی یہ کشتی اس سمندری راستے پر سفر کر رہی تھی جو یمن میں موجود ایران کے حمایت یافتہ حوثی باغیوں کے لیے غیر قانونی سامان کی آمدورفت کے لیے استعمال ہوتا ہے۔
بیان میں کہا گیا ہے کہ امریکی افواج نے گزشتہ دو ماہ کے دوران اسی علاقے میں ماہی گیری کے دو دیگر جہازوں کو بھی روکا تھا جو ایران سے یمن تک ہتھیار لے جا رہے تھے۔
ایران نے حوثیوں کو مسلح کرنے کی بارہا تردید کی ہے جب کہ آزاد ذرائع اور اقوام متحدہ کے ماہرین کا کہنا ہے کہ بھیجے جانے والے سامان کا سلسلہ ایران سے ملتا ہے ۔
حوثیوں نے ستمبر 2014 میں یمن کے دارالحکومت صنعا پر قبضہ کر لیا تھا اور بین الاقوامی طور پر تسلیم شدہ حکومت کو جلاوطنی پر مجبور کر دیا تھا۔
ایران میں بیلجیئم کے ایک امدادی کارکن کو طویل قید اور 74 کوڑوں کی سزا
ایران نے بیلجیئم کے ایک امدادی کارکن کو بند کمرے کی سماعت میں جاسوسی کے الزامات ثابت ہونے پر طویل قید اور 74 کوڑوں کی سزا سنائی ہے۔
ایرانی عدلیہ کی ویب سائٹ پر منگل کے روز بتایا گیا کہ ایک انقلابی عدالت نے 41 سالہ اولیور وینڈیکاسٹیلی کو جاسوسی، دشمن حکومتوں کے ساتھ تعاون اور منی لانڈرنگ کے الزامات میں مجرم قرار دیا۔
انہیں تقریباً12 تک قید کاٹنے کے بعد رہائی مل سکتی ہے۔
یہ واضح نہیں ہے کہ آیا ان الزامات کا تعلق حکومت مخالف مظاہروں سے ہے جو ایران کو گزشتہ چار ماہ سے متاثر کیے ہوئے ہیں ۔
ناقدین ایران پر الزام لگاتے ہیں کہ وہ غیر ملکی اور دوہری شہریت والے قیدیوں کو مغرب کے ساتھ سودے بازی کے لیے استعمال کر رہا ہےجس کی ایرانی حکام نے تردید کرتے ہیں۔
بیلجیئم نے اپنے شہریوں پر زور دیا ہے کہ وہ ایران چھوڑ دیں اور خبردار کیا ہے کہ انہیں من مانی گرفتاری یا غیر منصفانہ مقدمات کے خطرے کا سامنا ہے۔
اس فیصلے پر فوری طور پر کوئی تبصرہ نہیں کیا گیا۔
فرانس کے ٹرین اسٹیشن پر چاقو کے حملے میں چھ افراد زخمی
فرانس میں حکام کا کہنا ہے کہ پیرس کے ایک مصروف ٹرین اسٹیشن پر بدھ کی صبح چاقو سے مسلح ایک حملہ آور نے چھ افراد کو زخمی کر دیا۔
وزیر داخلہ جیرالڈ ڈرمینین نے صحافیوں کو بتایا کہ پولیس نے حملہ آور کو گولی مار دی، جو اسپتال میں تشویشناک حالت میں ہے۔
یہ حملہ گارے ڈو نورڈ اسٹیشن پر ہوا جو یورپ کے مصروف ترین اسٹیشنوں میں سے ایک ہے۔
حملے کا مقصد واضح نہیں ہوا اور حکام کا کہنا ہے کہ انہوں نے تحقیقات شروع کر دی ہیں۔
حالیہ عرصے میں فرانس میں دہشت گردی کے متعدد واقعات ہو چکے ہیں۔
اسلامی تعاون تنظیم نے طالبان کی جانب سے خواتین کی تعلیم اور کام پر پابندی کو اسلام کے خلاف قرار دے دیا
اسلامی تعاون تنظیم یا او آئی سی نے افغانستان کے بارے میں بدھ کے روز ایک اجلاس میں خواتین پر این جی اوز میں کام کرنے اور تعلیم پر پابندی کو اسلامی قانون کے مقاصد اور پیغمبر اسلام کے طریقہ کار کی خلاف ورزی قرار دیا۔
او آئی سی نے افغانستان میں انسانی اور انسانی حقوق کی بگڑتی ہوئی صورت حال پر گہری تشویش کا اظہار کیا اور طالبان حکومت سے مطالبہ کیا کہ وہ خواتین اور بچوں سمیت انسانی حقوق کا احترام کرے۔