پوپ فرانسس کے سالانہ خطاب میں ایران میں مظاہرین کو پھانسی دینے کی مذمت
پوپ فرانسس نے سفارت کاروں سے نئے سال کے اپنے روایتی خطاب میں ایران کی جانب سے مظاہرین کو پھانسی دینے کی پہلی بار مذمت کرتے ہوئے کہا ہے کہ یوکرین میں جنگ خدا اور انسانیت کے خلاف جرم ہے۔
پوپ نے ویٹیکن کے تسلیم شدہ سفارت کاروں کو نئے سال کے آغاز پر ایک جائزہ پیش کیا جسے غیر رسمی طور پر ان کے سٹیٹ آف دی ورلڈ خطاب کے طور پر جانا جاتا ہے۔
اطالوی زبان میں آٹھ صفحات پر مشتمل تقریر 183 ممالک میں سے بیشتر کے نمائندوں کے سامنے پڑھی گئی جس میں دنیا کے تمام تنازعات والے علاقوں بشمول افریقہ، مشرق وسطیٰ اور ایشیاء کی صورتحال پر روشنی ڈالی گئی ۔
پوپ نے اسقاط حمل کے بارے میں مذمت کو دوہراتے ہوئے اور خاص طور پر سیاسی ذمہ داریوں کے حامل افراد سے اپیل کی کہ وہ ان لوگوں کے حقوق کے تحفظ کے لیے جدوجہد کریں جو کمزور ترین ہیں۔
انہوں نے ایک بار پھر ایٹمی تصادم کے خطرے سے خبردار کیا۔
روس اور یوکرین کے درمیان قیدیوں کے تبادلے کا معاہدہ، 50 قیدی ایک دوسرے کے حوالے
روس اور یوکرین نے قیدیوں کا تبادلہ کرنے کے ایک معاہدے کے تحت اتوار کے روز 50 گرفتار فوجیوں کا تبادلہ کیا ۔
مشرقی یوکرین میں جنگ کے باوجود دونوں فریقوں نےاس سمجھوتے کا خیر مقدم کیا ہے ۔
روس کی وزارت دفاع نے کہا کہ واپس آنے والے 50 روسی فوجیوں کو طبی اور نفسیاتی مددکے لیے ماسکو لے جایا جائے گا۔
یوکرین نے ان معلومات کی تصدیق کرتے ہوئے کہا کہ روس نے اسی معاہدے کے تحت 50 یوکرینی فوجیوں کو رہا کر دیا ہے۔
یوکرین کے صدارتی دفتر کے سربراہ آندری یرمک نے ٹوئٹر پر کہا کہ ہمیں اپنے تمام لوگوں کو گھر لانا چاہیےاور ہم اس کے لیے کوشاں ہیں۔
یرمک نے یوکرین کے آزادہونے والے فوجیوں کی تصاویربھی پوسٹ کیں اور ان کی ایک ویڈیو بھی جس میں وہ یوکرین کا قومی ترانہ گا رہے تھے۔
افغانستان میں امدادی رقوم تک طالبان انتظامیہ کو رسائی نہیں دی جاتی : اقوام متحدہ
افغانستان میں اقوام متحدہ کے امدادی مشن ’یو این اے ایم اے‘ نے بین الاقوامی برادری کی جانب سے افغانستان منتقل کی جانے والی نقد رقوم کی ترسیل کے طریقہ کار، استعمال اور مقاصد کے بارے میں ایک بیان جاری کیا ہے۔
بیان میں کہا گیا ہے کہ افغانستان میں لائی جانے والی کسی بھی رقم کو افغانستان کے مرکزی بینک میں جمع نہیں کرایا گیا اور ور نہ ہی اقوام متحدہ کے ادارے نے ان رقوم کو طالبان کے حقیقی حکام کو فراہم کیا ہے۔
بیان کے مطابق افغانستان میں لائی گئی تمام نقد رقوم ایک نجی بینک میں اقوام متحدہ کے اکاؤنٹس میں رکھی جاتی ہیں۔
بیان کے مطابق تقریباً 1.8 ارب امریکی ڈالر کے فنڈز اقوام متحدہ اور شراکت داروں کے کام کے لیےمختص ہوئے ہیں ۔
طالبان نائب وزیر خارجہ ستانکزئی خواتین کی تعلیم اور کام پر پابندی سے متفق نہیں
طالبان کے نائب وزیر خارجہ عباس ستانکزئی کا کہنا ہے کہ شریعت کے خلاف احکامات کو نہیں ماننا چاہیے ۔
وہ منگل کے روز اسلامی ممالک کے وفد کے دورہ کابل کے سلسلے میں منعقدہ اجتماع سے خطاب کر رہے تھے۔
انہوں نے افغانستان میں آزادی اظہار پر بھی بات کی ہے۔
کچھ میڈیا اداروں نے ان کی تقریر کو خواتین کی تعلیم اور کام پر طالبان کی حالیہ پابندیوں کے خلاف قرار دیا۔