صومالیہ: دو خودکش حملوں میں 15 افراد ہلاک
صومالیہ میں پولیس کا کہنا ہے کہ بدھ کی صبح دو خودکش کار بم حملہ آوروں نے کم از کم دس افراد کو ہلاک کر دیا۔
حملہ آوروں نے ہیران علاقے کے ضلع مہاس میں ایک فوجی تنصیب کو نشانہ بنایا۔
صبح سویرے ہونے والے اس حملے کے بارے میں ایک رہائشی عثمان عبداللہی نے ایسوسی ایٹڈ پریس کو بتایا کہ بارود پھٹنے سے زور دار دھماکہ ہوا جسے پورے شہر میں سنا گیا تھا۔
عثمان نے بتایا کہ اس نے حملے میں زخمی ہونے والے کئی لوگوں کو بچایا جن میں فوجی اور صحافی بھی شامل ہیں۔
پولیس کے اہل کار مہاد عبداللہ نے اے پی کو بتایا کہ یہ دھماکہ ایک پرہجوم محلے میں ہوا جس سے املاک کو نقصان پہنچااور دس افراد ہلاک ہو ئے ۔
دہشت گرد گروپ الشباب نے اس حملے کی ذمہ داری قبول کر لی ہے۔
طالبان کا داعش کے 11 عسکریت پسندوں کو ہلاک کرنے کا دعویٰ
افغانستان کے طالبان نے جمعرات کو کہاہے کہ ان کی خصوصی فورسز نے کابل اور ملک کے دیگر مقامات پر اسلامک سٹیٹ یا داعش گروپ کے ٹھکانوں کے خلاف چھاپوں میں ان کے 11 عسکریت پسندوں کو ہلاک اور 7 کو گرفتار کر لیا ہے۔
طالبان کے ترجمان ذبیح اللہ مجاہد نے ایک بیان میں دعویٰ کیا ہے کہ عسکریت پسندوں نے افغان دارالحکومت میں حالیہ حملوں کو منظم کرنے میں مرکزی کردار ادا کیا تھا جن میں چینی شہریوں کی رہائش گاہ ہوٹل پر مہلک حملہ، پاکستانی سفارت خانے پر مسلح حملہ اور شہر کے فوجی ہوائی اڈے پر خودکش حملہ شامل تھا۔
. مجاہد نے مزید کہا کہ غیر ملکی داعش کے ارکان بھی ہلاک ہونے والوں میں شامل تھے۔
ترجمان مجاہدکے مطابق عسکریت پسندوں کا نیٹ ورک آئی ایس خراسان کے غیر ملکی ارکان کو افغانستان منتقل کرنے میں بھی ملوث تھا۔
اقوام متحدہ کا امدادی مشن طالبان کی پابندی سے متاثرہ اپنی کارکن خواتین کو تنخواہیں دے گا
اقوام متحدہ کے افغانستان کے لیے امدای مشن ’ یواین اے ایم اے‘ نے کہا ہے کہ وہ اپنی ان خواتین کارکنوں کی تنخواہیں ادا کرےگا جو طالبان کی جانب سے این جی اوز میں خواتین کے کام پر پابندی سے متاثر ہوئی تھیں۔
اقوام متحدہ کے مشن کا کہنا ہے کہ وہ افغانستان میں تمام افغان خواتین ساتھیوں کو کام پر برقرار رکھنے کے لیے پوری طرح پرعزم ہے۔
اسی دوران اقوام متحدہ کے حکام نے طالبان کے سینئر حکام کے ساتھ این جی اوز میں کام پر پابندی کے سلسلےمیں اپنی ملاقاتیں جاری رکھی ہوئی ہیں۔
مارکس پوتزل نے بدھ کو طالبان کے نائب وزیر اعظم ملا عبدالکبیر سے ملاقات کی ہے۔
یواین اے ایم اے نے ٹویٹ کہا ہے کہ افغان خواتین کے حقوق سے انکار تمام افغان افراد کے لیے نقصان ہے، جس سے اہم انسانی امداد کی فراہمی میں خلل پڑ رہا ہے۔ خواتین کی تعلیم اور کام پر پابندیاں اٹھانے کی ضرورت ہے تاکہ زیادہ معاشی بدحالی اور افغانستان کی تنہائی کو دور کیا جا سک۔ے
امریکہ: ریاست یوٹاہ میں ایک ہی خاندان کے آٹھ افراد کا قتل
حکام کے مطابق امریکی ریاست یوٹاہ میں ایک گھر میں خاندان کے آٹھ افراد کو گولیاں مار کر ہلاک کر دیا گیا ہے۔
مرنے والوں میں پانچ بچے بھی شامل ہیں ۔
حکام نے مزید تفصیلات فراہم نہیں کیں اور نہ ہی ہلاکتوں کا کوئی ممکنہ مقصد بتایا۔
سالٹ لیک سٹی سے 245 میل جنوب میں واقع تقریباً 8 ہزار افراد پر مشتمل ایک چھوٹے سے قصبے انوک کے حکام کے مطابق متاثرہ افراد کی لاشیں اس وقت ملیں جب پولیس نے رہائش گاہ کی پڑتال کی ۔
پولیس نے کہا کہ عوام کے لیے کسی خطرے کا امکان نہیں ۔