چین میں کووڈ کا تیزی سے پھیلاؤ، کروڑں افراد کے ہدف بننے کا خدشہ
چین میں کووڈ۔19 کی وبا پر قابو پانےسے متعلق زیرو ٹالرنس نامی سخت پابندیوں میں نرمی کے بعد اس مہلک وائرس کے نئے کیسز میں انتہائی اضافہ ہو رہا ہے اور ماہرین اس خدشے کا اظہار کر رہےہیں کہ کرونا کی کسی نئی جینیاتی قسم سامنے آسکتی ہے۔
ماہرین کا یہ بھی کہنا ہے کہ وبا کی نئی قسم اس وقت موجود امیکرون سے زیادہ تیزی سے پھیلنے کی صلاحیت کی حامل ہونے کے ساتھ ساتھ زیادہ مہلک بھی ہو سکتی ہے۔
بلومبرگ اور فنانشل ٹائمز میں شائع ہونے والے رپورٹس کے مطابق چین میں صحت کے اعلیٰ عہدیداروں کا اندازہ ہے کہ دسمبر کے پہلے 20 دنوں میں چین میں ممکنہ طور پر 25 کروڑ کے لگ بھگ افراد کووڈ کا ہدف بن سکتے ہیں۔
سینٹ لوئس میں قائم واشنگٹن یونیورسٹی کے وبائی امراض سے متعلق مرکز کے ڈائریکٹر زیاد العلی نے وائس آف امریکہ کو بتایا کہ آئندہ چند ہفتوں کے دوران لاکھوں چینی باشندے اپنے نئے قمری سال کی تقریبات کے سلسلے میں سفر کے لیے نکلیں گے جس سے وائرس پھیلنے کی رفتار میں اضافہ ہو سکتا ہے۔
بجلی کے حصول کے لیے طالبان کے وفد کا ازبکستان کا دورہ
طالبان کے ایک وفد نے پانی و توانائی کے قائم مقام وزیر کی قیادت میں ازبکستان کا دورہ کیا ہے۔اس دورے کا مقصد ازبکستان سے افغانستان کو بجلی کی برآمدات کی تجدید پر مذاکرات کرنا ہے ۔
قائم مقام وزیر عبداللطیف منصور نے آر ٹی اے کو بتایا کہ ازبکستان نے افغانستان کو بجلی کی برآمد میں کمی کی وجوہات بیان نہیں کیں۔
ان کا کہنا تھا کہ وفد اس معاملے پر ازبک حکام سے بات کر رہا ہے اور بجلی کی برآمد کے معاہدے کی تجدید بھی کرے گا۔
برشنا کمپنی کے مطابق ازبکستان سے افغانستان کو 448 میگا واٹ بجلی برآمد کرنے پر اتفاق کیا گیا تھا جس پر گزشتہ دور حکومت میں دستخط کیے گئے تھے لیکن اب ازبکستان افغانستان کو 200 میگا واٹ بجلی برآمد کرتا ہے جس کی وجہ سے کابل اور کئی دیگر صوبوں میں گزشتہ ایک ماہ سے بجلی کی قلت پیدا ہوگئی۔
ڈاکٹرز ود آؤٹ بارڈرز کا طالبان سے خواتین کارکنوں پر پابندی ہٹانے کا مطالبہ
علاج معالجے کی سہولتیں فراہم کرنے والے ایک گروپ ڈاکٹرز ود آؤٹ بارڈرز (ایم ایس ایف) نے اپنے ایک بیان میں خواتین کارکنوں پر پابندی کی مذمت کرتے ہوئے اسے عوامی زندگی سے خواتین اور لڑکیوں کی موجودگی بتدریج ختم کرنے کا پہلا قدم قرار دیا۔
ایم ایس ایف نے کہا کہ خواتین کے کام پر پابندیاں ان تمام چیزوں کے لیے نقصان دہ ہو سکتی ہیں جن سے صحت کی دیکھ بھال تک خواتین کی رسائی محدود ہو جاتی ہے۔
ڈاکٹرز ود آؤٹ بارڈرز ، افغانستان کے ہلمند، قندوز، ہرات،خوست، کابل، قندھار اور بامیان میں صحت کی دیکھ بھال کی فراہمی پر خصوصی توجہ کے ساتھ سات منصوبے چلا رہا ہے۔
افغانستان میں اس گروپ تنظیم کے لیے طبی شعبے سے تعلق رکھنے والے 1700 سے زیادہ افراد کام کرتے ہیں، جن میں سے 894 خواتین اور 835 مرد ہیں۔
صدر پوٹن اور چینی ہم منصب شی کے درمیان ویڈیو کانفرنس، دو طرفہ تعاون بڑھانے کا عزم
روسی صدر ولادیمیر پوٹن اور چینی رہنما شی جن پنگ نے یوکرین میں ماسکو کی دس ماہ سے جاری جنگ کے تناظر میں اپنے دوطرفہ تعاون کو مزید گہرا کرنے کا عزم کیا ہے۔
پوٹن اور شی نے جمعے کے روز ویڈیو کانفرنس کے ذریعے دو طرفہ بات چیت میں یوکرین کا براہ راست کوئی ذکر نہیں کیا ، لیکن انہوں نے جیو پولیٹیکل تناؤاور مشکل بین الاقوامی صورت حال میں ماسکو اور بیجنگ کے درمیان مضبوط تعلقات کو ک سراہا۔
پوٹن نے شی کو موسم بہار میں ماسکو کا دورہ کرنے کی دعوت دی۔
ادھر یوکرین میں حکام نے کہا ہے کہ جمعرات کو پاور اسٹیشنوں اور دیگر اہم انفراسٹرکچر پر بڑے پیمانے پر روسی میزائل حملے ہوئے جو کئی ہفتوں کے دوران شدید ترین حملے تھے۔
یوکرین کی مسلح افواج کے جنرل اسٹاف نے جمعے کی صبح بتایا ہے کہ روسی افواج نے گزشتہ 24 گھنٹوں میں یوکرین کے اہداف پر کل85 میزائل اور 35 فضائی حملے کیے ہیں۔