عظیم افغان ڈائیلاگ میں طالبان اور ملک کی بھلائی ہے: حامد کرزئی
افغانستان کے سابق صدر حامد کرزئی نے روزنامہ واشنگٹن پوسٹ کے ساتھ ایک انٹرویو میں طالبان حکومت سے کہا کہ وہ طالبان اور ملک کی بھلائی کے لیے ایک عظیم افغان ڈائیلاگ شروع کر کے جامع شمولیت کا عمل شروع کرے۔
سابق صدر کا کہنا تھ کہ یہ خود طالبان کی بھلائی اور ملک کی بھلائی کے لیے ضروری ہے کہ افغان آپس میں بات کریں اورمختلف معاملات پر معاہدے کر کے آگے بڑھیں۔
ان کا کہنا تھا کہ اس ملک کو آئین کی ضرورت ہے۔
سابق پوپ بینیڈکٹ شدید علیل، خصوصی دعاؤں کی اپیل
پوپ فرانسس نے بدھ کو کہا کہ سابق پوپ بینیڈکٹ شدید علیل ہیں۔ پوپ نے سامعین سے خطاب کرتے ہوئے سابق پوپ بینیڈکٹ کے لیے خصوصی دعائیں مانگنے کو کہا ۔
انہوں نے بینیڈکٹ کی حالت کی وضاحت نہیں کی اور نہ ہی ویٹیکن کی جانب سے ان کی صحت پر کوئی تبصرہ کیا گیا ہے۔
پچانوےسالہ بینیڈکٹ نے 2013 میں اپنی گرتی ہوئی جسمانی اور ذہنی صحت کا حوالہ دیتے ہوئے استعفیٰ دے دیا تھا۔
وہ چھ برسوں میں ایسا کرنے والے پہلے پوپ ہیں۔
اپنا منصب چھوڑنے کے بعد سے وہ ویٹیکن میں ایک کانونٹ میں رہ رہے ہیں۔
امریکی وزیر خارجہ کا طالبان سے این جی اوز کی کارکن خواتین سے پابندیاں اٹھانے کا مطالبہ
امریکی وزیر خارجہ کا کہنا ہے کہ میں اتحادیوں اور شراکت داروں کے ساتھ مل کر طالبان سے مطالبہ کرتا ہوں کہ وہ قومی اور بین الاقوامی این جی اوز کی خواتین ملازمین کو کام سے روکنے کے اپنے حکم کو واپس لیں۔ لاکھوں افغان اپنی بقا کے لیے انسانی امداد پر انحصار کرتے ہیں۔ این جی اوز کو سب سے زیادہ کمزور لوگوں تک بہر صورت رسائی حاصل ہونی چاہیئے۔
اقوام متحدہ کےانسانی حقوق کے ادارے کے سربراہ وولکر ترک نے بھی طالبان حکام سے مطالبہ کیا کہ وہ افغانستان میں خواتین اور لڑکیوں کے حقوق کو نشانہ بنانے والی پالیسیوں کو فوری طور پر منسوخ کر دیں۔ ان کا کہنا ہے کہ ان پابندیوں کے ان کی زندگیوں پر خوفناک اور تباہ کن اثرات پڑ سکتے ہیں جس سے ملک کے غیر مستحکم ہونے کا خطرہ بڑھ سکتا ہے۔
کمبوڈیا کے ہوٹل میں آتشزدگی سے گیارہ افراد ہلاک، 30 زخمی
کمبوڈیا کے ایک کیسینو ہوٹل میں آتشزدگی سے کم از کم 11 افراد ہلاک اور 30 زخمی ہو گئے ہیں۔
آگ پر قابو پانے کے لیے پڑوسی ملک تھائی لینڈ نے بھی فائر ٹرک بھیجے۔
سوشل میڈیا پر پوسٹ کی جانے والی ویڈیوز میں دکھایا گیا ہے کہ سرحدی شہر پوپیٹ کے گرینڈ ڈائمنڈ سٹی کیسینو اور ہوٹل میں آگ لگنے کے بعدلوگ چھت سے گررہےہیں۔
تھائی لینڈ کے پبلک براڈکاسٹر تھائی پی بی ایس نے بتایا ہے کہ درجنوں افراد عمارت کے اندر پھنسے ہوئے ہیں۔
آگ بجھانے اور امدادی محکمے نے پوسٹ کیا کہ صبح چار بجے تیرھویں، چودہویں اور پندرھویں منزل سے مدد کی کالیں سنائی دیں اور کھڑکیوں سے لوگوں کو ہاتھ ہلاتے ہوئے دیکھا گیا ۔
صوبے کے گورنر ام ریٹری نے کمبوڈیا کی فریش نیوز ویب سائٹ کو بتایا کہ گیارہ افراد ہلاک ہو چکے ہیں۔ صوبائی پولیس کے سربراہ میجر جنرل سیتھی کا کہنا تھا کہ زخمیوں میں سے کچھ کی حالت نازک ہےجس سے ہلاکتوں میں اضافے کا خدشہ ہے ۔