لیبیا: داعش کے 17 ارکان کو 53 افراد کے قتل پر سزائے موت کا اعلان
لیبیا کے اعلیٰ پراسیکیوٹر کا کہنا ہے کہ ایک عدالت نے اسلامک اسٹیٹ یا داعش گروپ کے سابق 17 ارکان کو موت کی سزا سنائی ہے۔
لیبیا کے طرابلس میں مقیم پراسیکیوٹر کی جانب سے پیر کے روز جاری ہونے والے بیان میں کہا گیا ہے کہ سزائے موت ان دہشت گردوں کو سنائی گئی ہے جو مغربی شہر صبراتہ میں53 افراد کے قتل اور عوامی املاک کو تباہ کرنے میں ملوث پائے گئے تھے۔
مزید 16 عسکریت پسندوں کو قید کی سزائیں سنائی گئی ہیں جن میں سے دو کو عمر قیدکی سزا دی گئی ہے۔
2011 کی بغاوت کے نتیجے میں لیبیا افراتفری کا شکار ہوا اور طویل عرصے سے حکمرانی کرنے والے معمر قذافی کی حکومت کا تختہ الٹ کر انہیں ہلاک کردیا گیا جس کے بعد انتہا پسند ملک کے مختلف حصوں پر قابض ہو گئے۔
حیاتیاتی تنوع کے تحفظ پر تاریخی معاہدہ طے پا گیا
کینیڈا کے شہر مانٹریال میں منعقدہ اقوام متحدہ کی حیاتیاتی تنوع یا بائیو ڈائیورسٹی کانفرنس میں مذاکرات کاروں نے پیر کے روز ایک تاریخی معاہدہ کیا جو دنیا میں زمین اور سمندروں کے تحفظ کے لیے اہم ترین کوششوں کی نمائندگی کرے گا اور ترقی پذیر دنیا میں حیاتیاتی تنوع کو بچانے کے لیے اہم مالی اعانت فراہم کرے گا۔
چین اقوام متحدہ کی حیاتیاتی تنوع کانفرنس یا COP15 کی صدارت کر رہا ہے اور اس نے ایک لائحہ عمل کا مسودہ جاری کیا جسے کانفرنس میں شامل ملکوں نے منظور کیا اور 2030 تک حیاتیاتی تنوع کے لیے اہم سمجھے جانے والے زمین اور سمندر کو30 فیصدتک بحال کرنے کا مطالبہ کیا۔
فی الحال زمین 17 جب کہ 10 فیصد سمندری علاقے محفوظ ہیں ۔
اس میں خطرے سے دوچار حیاتیاتی اقسام کے تحفظ، آب و ہوا کی تبدیلی کے اثرات میں کمی لانے اور آلودگی کو کم کرنے کی کوششوں کو دوگنا اضافہ کرنےپر بھی زور دیاگیا ہے۔
افغان سیاسی رہنماؤں کی خواتین کی تعلیم پر طالبان کی نئی پابندی کی مذمت
عبداللہ عبداللہ اور گلبدین حکمت یار سمیت افغان سیاست دانوں نے طالبان حکومت کی جانب سے یونیورسٹیوں میں لڑکیوں کی تعلیم پر نئی پابندی پر ردعمل کا اظہار کرتے ہوئے اس فیصلے کی مذمت کی ہے۔
سابق قومی مصالحت کی اعلی کونسل کے سربراہ عبداللہ عبداللہ نے ایک ٹویٹ میں کہا کہ لڑکیوں کو اس حق سے محروم کرنا افسوسناک ہے۔ میں ایک شہری کے طور پر امید کرتا ہوں اور کہتا ہوں کہ لڑکیوں کے اسکولوں اور یونیورسٹیوں کو بند کرنے کے فیصلے پر دوبارہ غور کیا جائے۔
حزب اسلامی کے سربراہ گلبدین حکمت یار نے کہا کہ یونیورسٹیوں میں لڑکیوں کی تعلیم پر پابندی کے فیصلے کا طالبان کے پاس کوئی جواز نہیں ہے۔
سابق صدر حامد کرزئی گزشتہ روز کابل پہنچے تھے تاہم انہوں نے یونیورسٹیوں میں لڑکیوں کی تعلیم سے متعلق طالبان کے فیصلے پر تاحال کوئی ردعمل ظاہر نہیں کیا۔
اردن کانفرنس کے موقع پر سعودی اور ایرانی وزرائے خارجہ میں ملاقات
ایران کے وزیر خارجہ نے بدھ کے روز کہا کہ انہوں نے اپنے سعودی ہم منصب سے گزشتہ روز اردن میں ہونے والی ایک کانفرنس کے موقع پر بات کی جو 2016 میں تعلقات منقطع ہونے کے بعد سے حریف ریاستوں کے حکام کے درمیان اعلیٰ ترین سطح کا رابطہ ہے۔
مشرق وسطیٰ کی سرکردہ شیعہ اور سنی مسلم طاقتیں سعودی عرب اور ایران، شام اور یمن سمیت پورے خطے میں تنازعات کے خلاف ہیں۔
عراق کشیدگی کم کرانے کے لیے گزشتہ سال سے سعودی اور ایرانی حکام کے درمیان پانچ ملاقاتوں کی میزبانی کر چکا ہے، جن میں سے آخری ملاقات اپریل میں ہوئی تھی۔
ایرانی وزیر خارجہ حسین امیرعبداللہیان نے بدھ کے روز عربی میں ٹویٹ کرتے ہوئے اپنے سعودی ہم منصب شہزادہ فیصل بن فرحان آل سعود کو ان متعدد وزرائے خارجہ میں شامل کیا جن کے ساتھ انہیں اردن کانفرنس کے موقع پر دوستانہ بات چیت کرنے کا موقع ملا۔
امیرعبداللہیان نے لکھا ہے کہ ان کے سعودی ہم منصب نے مجھے یقین دلایا کہ ان کا ملک ایران کے ساتھ بات چیت جاری رکھنے پر آمادہ ہے
سعودی وزارت خارجہ نے اس حوالے سے فوری طور پر بیان دینے کی درخواست کا جواب نہیں دیا۔