امریکہ نے جنوبی کوریا میں اپنا سپیس فورس یونٹ قائم کر دیا
امریکی فوج نے جنوبی کوریا میں باضابطہ طور پر ایک سپیس فورس یونٹ کا آغاز کیا ہے ۔
واشنگٹن کایہ اقدام ممکنہ طور پر اسے اپنے حریفوں شمالی کوریا، چین اور روس کی بہتر نگرانی کے قابل بنائے گا۔
سیول کے قریب اوسین ایئر بیس پر امریکی سپیس فورس کی جنوبی کوریا کی سرگرمی اس وقت سامنے آئی جب شمالی کوریا نے امریکی سرزمین اور اس کے اتحادیوں جنوبی کوریا اور جاپان کو نشانہ بنانے کے لیے بنائے گئے جوہری صلاحیت کے حامل بیلسٹک میزائلوں کا حالیہ مہینوں میں تجربہ کیا۔
اس یونٹ کا تعلق یو ایس اسپیس فورس سے ہے جسے دسمبر 2019 میں اس وقت کے صدر ڈونلڈ ٹرمپ کے دور میں 70
سال سے زائد عرصے میں پہلی نئی امریکی فوجی سروس کے طور پر شروع کیا گیا تھا۔
پاکستان اور ایران سے بڑی تعداد میں افغان پناہ گزینوں کی وطن واپسی
اقوام متحدہ کے پاپولیشن فنڈ (یواین ایف پی اے) کا کہنا ہے کہ جنوری سے اکتوبر 2022 کے درمیان 661600 افغان باشندے ایران سے اور 66300 پاکستان سے واپس افغانستان آئے ہیں ۔
یواین ایف پی اے کی ایک ٹویٹ میں بتایا گیا ہے کہ اقوام متحدہ کا یہ ادارہ سرحدوں پر زیرو پوائنٹ کیمپوں میں انسانی ہمدردی کے کاموں میں مدد کرتا ہے تاکہ افغانستان واپس آنے والے خاندانوں کوصحت اور نفسیاتی مدد کی خدمات فراہم کی جا سکیں۔
ناروے کی پناہ گزینوں کی کونسل این آر سی نے طالبان حکام سے مطالبہ کیا ہے کہ وہ اندرونی طور پر بے گھر ہونے والے افراد کی افغانستان بھر کی بستیوں سے مزید بے دخلی اس وقت تک کے لیے روک دیں جب تک انہیں بسانے کے لیے کوئی پائیدار متبادل تلاش نہ کر لیا جائے۔
افغانستان سے موصول ہونے والی ایک اور خبر میں بتایا گیا ہے کہ طالبان حکام نے صوبہ بادغیس میں تقریباً 20 ہزار بے گھر افراد کو ان کے گھروں سے بے دخل کر دیا ہے۔
جس کے بعد اب بہت سے لوگوں کے پاس اپنے بچوں کو کھلانے کے لیے کچھ نہیں ہے اور علاقے کا درجہ حرارت صفر سے نیچے گرنے کے بعد انہیں گرم رکھنے کا کوئی طریقہ بھی نہیں ہے ۔
افغانستان میںاین آر سی کے کنٹری ڈائریکٹر نیل ٹرنر نے کہا ہے کہ بادغیس کے حکام کو یہ تسلیم کرنا چاہیے کہ آبادی کے حوالے سے ان کی بھی ذمہ داریاں ہیں ۔
امریکہ کے مرکزی بینک نے بنیادی شرح سود میں اضافہ کر دیا
امریکہ کے مرکزی بینک فیڈرل ریزرو نے اپنے سود کی کلیدی شرح کو نصف پوائنٹ تک بڑھا دیا ہے جو اب 4.25فی صد سے بڑھ کر 4.5 فی صد ہو گئی ہے۔
یہ مرکزی مالیاتی ادارے کی گزشتہ 14 برسوں کی بلند ترین سطح ہے جس کا بنیادی مقصد بڑھتی ہوئی مہنگائی اور افراط زر پر قابو پانا ہے۔
فیڈرل ریزور کا تازہ ترین اضافہ اس سال ساتواں اضافہ ہے جس کے نتیجے میں صارفین اور کاروباری اداروں کے لیے گھروں اور گاڑیوں کی خرید اور دیگر ضروریات کے لیے قرض حاصل کرنا اور بھی مہنگا ہو جائے گا۔
لیکن اس اضافے کا ایک مثبت پہلو یہ بھی ہے کہ بینکوں پر رکھی ہوئی لوگوں کی بچتوں پر اب زیادہ منافع مل سکے گا۔
اس سے قبل اکثر مالیاتی ادارے لوگوں کی بچتوں پر انتہائی معمولی منافع دے رہے تھے۔
پندرہ سو افغان تارکین وطن پاکستانی جیلوں میں قید ہیں: طالبان
اسلام آباد میں افغانستان کے طالبان کے زیر کنٹرول سفارت خانے نے ایک بیان میں کہا ہے کہ 1500 افغان شہری اب بھی پاکستانی جیلوں میں قید ہیں۔
اتوار کو جاری ہونے والے بیان میں کہا گیا ہے کہ سفارت خانے کی کوششوں سے اب تک 500 افغان تارکین وطن کو رہا کرایا جا چکا ہے۔
سفارت خانے کا کہنا ہے کہ وہ دیگر افغان مہاجرین کی رہائی کو یقینی بنانے کے لیے پاکستانی حکام سے رابطے میں ہے۔