افغانستان کے لیے خصوصی امریکی نمائندے تھامس ویسٹ کی یو اے ای میں افغان تاجروں سے ملاقات
افغانستان کے لیے امریکہ کے خصوصی نمائندے تھامس ویسٹ نے متحدہ عرب امارات میں متعدد افغان تاجروں اور سرمایہ کاروں سے ملاقات کی اور ان سے افغانستان کو درپیش معاشی چیلنجز اور تجارتی امور پر تبادلہ خیال کیا۔
تھامس ویسٹ نے سلسلہ وار ٹوئٹس میں یہ بھی کہا ہے کہ انہوں نے متحدہ عرب امارات کے حکام سے ملاقات کی اور افغانستان سے متعلق امور پر تبادلہ خیال کیا۔
انہوں نے کہا کہ متحدہ عرب امارات ایک اہم کردار ادا کر رہا ہے، وہ سفارت کاری میں سرگرم ہے، معیشت کو ترقی دینے کے خواہاں ہے، افغان کاروباری اداروں کے لیے وہ ایک طویل عرصے سے مرکز رہا ہے اور اس کے افغانستان کی بااثر کمیونٹیز کے ساتھ اہم تعلقات ہیں۔
انہوں نے کہا کہ امریکہ اور متحدہ عرب امارات افغانستان میں مشترکہ ترجیحات پر متحدہ عرب امارات کے ساتھ اہم رابطہ کاری جاری رکھیں گے۔
ان کا مزید کہنا تھا کہ افغانستان میں لڑکیوں کو سیکنڈری اسکول میں واپس لانے سے لے کر سرمایہ کاری کی جانب راغب کرنے والی پالیسیوں کی حوصلہ افزائی جاری رکھی جائے گی۔
انڈونیشیا: بالی بم دھماکوں میں ملوث مجرم پیرول پر رہا
اندونیشا میں 2002 کے بالی بم دھماکوں میں جس عسکریت پسند کو دھماکہ خیز مواد کو بنانے کا مجرم قرار دے کر 20 سال قید کی سزا دی گئی تھی، اسے اپنی آدھی سزا کاٹنے کے بعد رہا کر دیا گیا ہے۔
تفریحی مقام بالی میں ہونے والے بم دھماکوں میں 202 افراد ہلاک ہوئے تھے ۔
مجرم ہشیام بن علی زین کی رہائی سے متعلق اعلان پر آسٹریلیا نے سخت اعتراضات کیے تھے، لیکن اس کے باوجود اسے بدھ کر پیرول پر رہا کر دیا گیا ۔
مجرم ہشیام بن علی زین کو عمر پاٹیک کے نام سے بھی جانا جاتا ہے اور وہ القاعدہ سے منسلک نیٹ ورک جماعۃ اسلامیہ کا ایک سرکردہ رکن تھا۔
اس گروپ کو 12 اکتوبر 2002 کو بالی کے ساحلی مقام کوٹا بیچ کے دو نائٹ کلبوں میں بم دھماکوں کا ذمہ دار ٹھہرایا گیا تھا۔
انڈونیشیا کے حکام کا کہنا ہے کہ پاٹیک کی جیل میں کامیابی کے ساتھ اصلاح کی گئی تھی اورجس سے دوسرے عسکریت پسندوں کا نظریہ تبدیل کرنے میں مدد ملے گی۔
افغان خواتین کی تعلیم پر انڈونیشیا میں بین الاقوامی کانفرنس
افغانستان میں پائیدار امن کے لیے ایک بیان کے مطابق بین الاقوامی برادری نے بین الافغان مذاکرات اور افغان خواتین اور لڑکیوں کے معیار زندگی کو بہتر بنانے کے ضروری اقدامات کی بھرپور حمایت کا اظہار کیا ہے۔
انڈونیشیا اور قطر کی مشترکہ صدارت میں افغان خواتین کی تعلیم پر بین الاقوامی کانفرنس 8 دسمبر 2022 کو بالی، انڈونیشیا میں بلائی گئی۔
پاکستان کے وزیر خارجہ بلاول بھٹو زرداری کانفرنس کے مقررین میں شامل تھے۔
طالبان کو کانفرنس میں مدعو نہیں کیا گیا۔
اقوام متحدہ کے بچوں کے لیے فنڈ یونیسیف کا کہنا ہے کہ وہ 2023 میں پورے افغانستان میں تعلیم کے مواقع فراہم کرے گا اور چھ لاکھ مزید بچے کمیونٹی پر مبنی 20 ہزار کلاسوں میں پڑہیں گے۔
ادارے نے بتایا کہ ہم کلاسوں کی مرمت کا کام کر رہے ہیں تاکہ انھیں محفوظ اور سیکھنے کے لیے زیادہ سازگار بنایا جا سکے ۔
اقوام متحدہ کا کہنا ہے کہ ہم ہر بچے کے تعلیم کے حق کی وکالت کرنا کبھی ختم نہیں کریں گے۔
ہیٹی میں ہیضے کے پھیلاؤ میں اضافہ، 283 افراد ہلاک ہزاروں اسپتال داخل
اقوام متحدہ کا کہنا ہے کہ ہیٹی میں ہیضہ پھیل رہا ہے جب کہ گزشتہ ماہ شروع کی گئی 145 ملین ڈالر کی اپیل میں سے صرف 16 فیصد کو پوراکیا گیا ہے۔
ہیٹی میں اقوام متحدہ کی انسانی ہمدردی کی کوآرڈینیٹر الریکا رچرڈسن نے اس ہفتے نیویارک میں کہا کہ ہم حقیقت میں جو کچھ دیکھ رہے ہیں وہ نہ صرف ہیضے کے کیسز میں مسلسل اضافہ ہے بلکہ خطوں میں اس کا پھیلاؤ بھی ہے ۔
انہوں نے مزید کہا کہ یہ ایک تشویشناک رجحان ہے ۔
اقوام متحدہ نے جمعرات کو کہا کہ اس بیماری سے 283 افراد ہلاک ہو چکے ہیں جب کہ12 ہزار ہسپتال میں داخل ہیں۔
14 ہزار سے زائد مشتبہ کیسز ریکارڈ کیے گئے ہیں۔
عالمی ادارہ صحت کا کہنا ہے کہ ہیضہ صحت عامہ کے لیے ایک عالمی خطرہ بنا ہوا ہے اور یہ عدم مساوات اور سماجی ترقی کی کمی کا ایک اشارہ ہے۔