ایران کا طالبان سے دہشت گردی کے خلاف مشترکہ کمشن بنانے کا مطالبہ
افغانستان کے لیے ایران کے خصوصی نمائندے حسن کاظمی قومی کا کہنا ہے کہ ان کے ملک نے طالبان کے ساتھ مل کر دہشت گردی کے خلاف جنگ کے لیے ایک کمیشن کے قیام کا مطالبہ کیا ہے۔
ایرانی تسنیم نیوز ایجنسی نے حسن کاظمی قومی کے حوالے سے کہا ہے کہ افغانستان میں سیکیورٹی کی کمی اس کے پڑوسیوں اور پورے خطے کو متاثر کرتی ہے۔
افغانستان میں ایران کے خصوصی نمائندے نے اس بات پر زور دیا کہ دہشت گردی کے خطرات سے نمٹنے کے لیے ایران اور افغانستان کی مشترکہ سیکورٹی اور معلومات کے تبادلے کی کمیٹی تشکیل دینا ضروری ہے۔
عراق میں ایرانی کرد اپوزیشن کے ٹھکانوں پر پاسدارن انقلاب کے فضائی حملے
شمالی عراق میں ایرانی کرد اپوزیشن گروپ کے ٹھکانوں کو ایرانی میزائلوں اور ڈرونز نے اتوار کی رات دیر گئے نشانہ بنایا۔
عراق میں جلاوطن کرد ایرانی گروپ ڈیموکریٹک پارٹی آف ایرانی کردستان نے ایک بیان میں کہا ہے کہ ایران نے کویا اور جیجن کان میں زمین سے زمین پر مار کرنے والے میزائل اور ڈرونز سے اس کے اڈوں اور ملحقہ پناہ گزین کیمپوں کو نشانہ بنایا۔
گروپ نے یہ بھی دعویٰ کیا کہ حملوں نے کویا کے ایک اسپتال کو نشانہ بنایا۔
عراق کے کرد چینل رودا ٹی وی نے پارٹی ذرائع کا حوالہ دیتے ہوئے کہا کہ گروپ کا ایک رکن کویا پر ہونے والے حملوں میں ہلاک ہوگیا ہے ۔
ایک اور مخالف گروپ کومالا نے کہا کہ اس کے ٹھکانے پر بھی حملہ کیا گیا تھا۔ اس نے سلیمانیہ کے جنوب میں تباہ شدہ عمارتوں کی ویڈیو شیئر کی۔
ایران کے نیم فوجی پاسداران انقلاب کی ویب سائٹ نے پیر کو شمالی عراق میں علیحدگی پسند اور دہشت گرد گروپوں پر میزائل اور ڈرون حملوں کے نئے سلسلے کی تصدیق کی ہے۔
امریکہ نے تازہ ترین ایرانی حملوں کی مذمت کی ہے۔
ترکی کے شام اور عراق میں کردستان ورکرز پارٹی اور وائی پی جی کے ٹھکانوں پر حملے
ترکی کی وزارت دفاع نے اتوار کو کہا کہ اس نے شام اور عراق کے شمالی علاقوں پر فضائی حملے شروع کیے ہیں جہاں وزارت ان کرد گروپوں کو نشانہ بنا رہی ہے جو اس کے خیال میں استنبول میں گزشتہ ہفتے ہونے والے حملے کے ذمہ دار ہیں۔
وزارت نے کہا کہ کردستان ورکرز پارٹی یا پی کے کے اور سیرین پیپلز پروٹیکشن یونٹس یا وائی پی جی کے ٹھکانے ان حملوں کا ہدف تھے ۔
وسطی استنبول میں گزشتہ ہفتے ہونے والے ایک بم دھماکے میں چھ افراد ہلاک اور 80 سے زائد زخمی ہوئے تھے۔
ترکی ’ ’کے پی پیاور وائی پی جی کو اس حملے کا ذمہ دار ٹھہراتا ہے۔ تاہم دونوں گروپوں نے ان الزامات کی تردید کی ہے۔
دہشت گرد گروپ اسلامک اسٹیٹ کے خلاف جنگ میں واشنگٹن وائی پی جی ‘ کی حمایت کرتا ہے۔
روس نے یوکرین جنگ کے 270 دنوں میں 4700 میزائل حملے کیے: زیلنسکی
یوکرین کے صدر ولادیمیر زیلنسکی نے کہا ہے کہ روس نے جنگ کے آغاز سے اب تک یوکرین میں 4,700 سے زیادہ میزائل داغے ہیں۔
امریکی ٹیلی ویژن سی این این کی رپورٹ کے مطابق زیلنسکی نے کہا ہے کہ مکمل پیمانے پر جنگ کو 270 روز ہو گئے ہیں اور روس نے اس عرصے میں 4,700 سے زیادہ میزائل استعمال کیے۔
انہوں نے یہ اعداد و شمار لا فرانکوفونی نامی ایک بین الاقوامی تنظیم کے اراکین سے خطاب کے دوران پیش کیے۔
نیویارک ٹائمز کے مطابق زیلنسکی نے اپنے رات کے خطاب میں کہا کہ اتوار کو مشرقی یوکرین میں گولہ باری کے تقریباً چار سو حملے ریکارڈ کیے گئے ۔
سرد موسم کے آغاز کے باوجود وہاں شدید لڑائی جاری ہے۔
برلن نے اعلان کیا ہے کہ وہ یوکرینی پناہ گزینوں کے لیے سابق ٹیرجل ہوائی اڈے پر دس ہزار اضافی بستر وں کا بندوبست کر رہا ہے ۔
نشریاتی ادارے ڈوئچے ویلے کے مطابق دو سال قبل بند ہونے والے اس ہوائی اڈے میں یوکرینی پناہ گزینوں کے لیے ایک استقبالیہ مرکز قائم ہے۔جرمن ریڈ کراس سے تعلق رکھنے والے ڈٹلف کوجڈ زنسکی نے ڈوئچے ویلے کو بتایا کہ صورت حال مشکل ہے۔ انہوں نے کہا کہ ہنگامی حل کے طور پر سال کے آخر تک ہینگروں اور خیموں میں دس ہزار اضافی بستر شامل کیے جائیں گے۔
برلن جرمنی کے ان شہروں میں شامل ہے جہاں سب سے زیادہ یوکرینی مہاجرین آئے ہیں۔ایک اندازے کے مطابق اس وقت وہاں85 ہزار افراد کا اندراج ہو چکا ہے ۔