یورپی یونین نے ایران پر نئی پابندیاں لگا دیں، روس کے خلاف نئی پابندیوں پر غور
یورپی یونین نے پیر کو ایران پر حکومت مخالف مظاہرین کے خلاف پکڑ دھکر کی وجہ سے نئی پابندیاں عائد کیں اور رکن ملکوں میں 15,000 یوکرینی فوجیوں کی تربیت کا مشن شروع کیا۔
یورپی یونین ماسکو کے خلاف جلد عائد کی جانے والے پابندیوں کےنویں پیکیج پر گفتگو کر رہی ہے ۔
وہ پولینڈ ، اسپین اور فرانس سمیت متعدد رکن ملکوں میں ہزاروں یوکرینی فوجیوں کی تربیت شروع کرے گی ۔
پیر کو برسلز میں یورپی وزرائے خارجہ کے اجلاس میں 29 ایرانیوں پر سفری پابندیاں اور اثاثے منجمد کر دیے گئے، جن میں پاسداران انقلاب کے اعلیٰ سطح کے عہدے دار اور وزیر داخلہ احمد واحدی بھی شامل ہیں۔
چار ایرانی تنظیموں کو بھی ہدف بنایا گیا ہے، جب کہ یورپی یونین نے تہران کی جانب سے ایک زبردست احتجاجی تحریک کے خلاف پکڑ دھکڑ پر اپنا ردعمل سخت کر دیا ہے جو ستمبر میں ایرانی پولیس کی حراست میں ایک نوجوان خاتون کی ہلاکت کے بعد شروع ہوئی تھی۔
پیر کے روز ایران نے مظاہرین میں سے ایک کےخلاف اپنی پہلی سزائے موت جاری کی۔
آب و ہوا تبدیلی کانفرنس: امریکی سفیر جان کیری کی اعلیٰ چینی عہدے دار سے ملاقا ت متوقع
آب وہوا سے متعلق امریکہ کے سفیر جان کیری نے منگل کو کہا ہے کہ وہ مصر میں جاری آب و ہوا سے متعلق اقوام متحدہ کے سالانہ مذاکرات میں اپنے چینی ہم منصب سے ملاقات کریں گے۔
یہ دنیا میں آلودگی پھیلانے میں سر فہرست دو ملکوں کے درمیان تعلقات میں بہتری کی تازہ ترین علامت ہے۔
کیری نے ایسوسی ایٹڈ پریس کو بتایا کہ وہ جلد کسی وقت چین کے آب و ہوا کے اعلی ترین عہدیدار سے ملاقات کریں گے لیکن انہوں نے مزید تفصیلات فراہم نہیں کیں۔
چین کے صدر شی جن پنگ ایک روز قبل ہی امریکہ کے ساتھ آب و ہوا کی تبدیلی پر بات چیت دوبارہ شروع کرنے پرآمادگی ظاہرکی تھی ۔
ژی نے ان رابطوں کو تین ماہ قبل ایوان کی اسپیکر نینسی پیلوسی کے تائیوان کے دورے کے رد عمل میں روک دیا تھا۔
پانچ ایئر لائنز کرونا وائرس کے دوران سفر میں خلل پر 60 کروڑ ڈالر ادا کریں گی
امریکی وفاقی حکام نے پیر کو بتایا کہ فرنٹیئر ایئر لائنز اور چار غیر ملکی ائیر لائنز ان مسافروں کو 60 کروڑ ڈالر سے زیادہ کی رقم کی واپسی پر متفق ہو گئی ہیں جن کے فضائی سفر کرونا وائرس کے آغاز کے بعد سے منسوخ یا نمایاں طور پر تاخیر کا شکار ہوئے تھے۔
یو ایس ڈپارٹمنٹ آف ٹرانسپورٹیشن نے کہا کہ اس نے انہی ایئرلائنز پر 70 لاکھ ڈالر سے زیادہ کا جرمانہ بھی کیا کیونکہ انہوں نے رقم کی واپسی میں اتنی زیادہ تاخیر کی جو صارفین کے تحفظ کے قوانین کی خلاف ورزی تھی۔
امریکی بحریہ نےایران سے یمن بھیجا جانے والا 70 ٹن میزائل ایندھن پکڑ لیا
امریکی بحریہ نے منگل کو کہا کہ اسے ایران سے یمن جانے والے بحری جہاز پر کھاد کے تھیلوں میں چھپا ہوا 70 ٹن میزائل کا ایندھن کا حصہ ملا ہے، جو اس ملک کی برسوں سے جاری جنگ میں جنگ بندی کے ٹوٹنے کے بعد اس طرح کا پہلا واقعہ ہے۔
بحریہ نے کہا کہ دریافت ہونے والی امونیم پرکلوریٹ کی مقدار ایک درجن سے زیادہ درمیانے فاصلے تک مار کرنے والے بیلسٹک میزائلوں کو ایندھن دے سکتی ہے۔
یہ وہی ہتھیار ہیں جو یمن کے ایرانی حمایت یافتہ حوثی باغیوں نے ملک کی بین الاقوامی سطح پر تسلیم شدہ حکومت اور ان کی حمایت کرنے والے سعودی زیرقیادت اتحاد کی ا افواج کو نشانہ بنانے کے لیے استعمال کیے ہیں۔
5ویں فلیٹ کے ترجمان کمانڈر ٹموتھی ہاکنز نے ایسوسی ایٹڈ پریس کو بتایا کہ ا س قسم کی کھیپ اور دھماکہ خیز مواد کی صرف بڑی مقدار ہی ایک سنگین تشویش کا باعث ہے کیونکہ یہ عدم استحکام کا سبب بن سکتی ہے۔