برطانیہ: سابقہ وزیر اعظم کا فون ہیک ہونے کے بعد سرکاری عہدے داوں کی سائبر سیکیورٹی میں اضافہ

برطانوی حکومت نے اتوار کے روز زور دے کر کہا کہ اس نے حکومتی عہدے داروں کی سائبر سیکیورٹی میں اضافہ کر دیا ہے ۔

یہ اعلان ایک اخبار کی اس رپورٹ کے بعد کیا گیا کہ سابق وزیر اعظم لز ٹرس کا فون اس وقت ہیک کیا گیا تھا جب وہ برطانیہ کی وزیر اعظم تھیں۔

ایسو سی ایٹڈ پریس کے مطابق اتوار کی میل میں کہا گیا کہ ہیکنگ کا پتا اس وقت چلا جب ٹرس موسم گرما میں قدامت پسند پارٹی کی لیڈر بننے کا انتخاب لڑ رہی تھیں ۔

اس میں کہا گیا کہ سیکیورٹی میں اس شگاف کو اس وقت کے وزیر اعظم بورس جانسن اور سول سروس کے سربراہ نے خفیہ رکھا ۔

اخبار نے ذرائع کے حوالے سے جن کا نام نہیں بتایا گیا کہا کہ روسی جاسوں پر اس ہیکنگ کا شبہ کیا گیا تھا۔

حزب اختلا ف کی جماعتوں نے ہیکنگ اور اخبار کو اس معلومات کی لیکیج کے بارے میں ایک غیر جانبدارانہ تحقیقات کا مطالبہ کیا ہے۔

یورپی یونین کا ایران کے پاسداران انقلاب کو دہشت گردو تنظیموں کی فہرست میں شامل کرنے پر غور

جرمن وزیر خارجہ اینا لینا بائربوک نے اتوار کے روز کہا ہے کہ جرمنی اور یورپی یونین کے عہدے دار ایران کی پاسداران انقلاب کو دہشت گردتنظیموں کی فہرست میں شامل کرنے پر غور کر رہے ہیں۔

گزشتہ ہفتے جر منی نے اعلان کیا تھا کہ وہ یورپی یونین کی پابندیوں کے پیکیج سے باہر اسلامی جمہوریہ ایران کے خلاف سخت تر پابندیاں نافذ کرے گا۔اتوار کو ایک جرمن خبر رساں ادارے کو انٹرویو دیتے ہوئے، بیرباک نے مزید کہا کہ ہم اس بات کا بھی جائزہ لے رہے ہیں کہ ہم کس طرح پاسداران انقلاب کو دہشت گرد تنظیم کی فہرست میں درج کر سکتے ہیں۔

بائربوک کے تبصرے ایران کے طاقتور پاسداران انقلاب کے سربراہ حسین سلامی کی جانب سے مظاہرین کے لیے اس انتباہ کے ایک دن بعد سامنے آئے ہیں کہ اس ہفتے کا دن ان کا سڑکوں پر آنے کا آخری دن ہوگا، جو اس بات کا اشارہ تھا کہ سیکورٹی فورسز ملک گیر مظاہروں کے خلاف ان کی پکڑ دھکڑ میں اضافہ کر سکتی ہیں۔

دنیا کو درپیش زیادہ تر اقتصادی اور سیاسی بحرانوں کا سبب یوکرین جنگ اور چین کے معاشی معاملات ہیں: عالمی ادارہ محنت

محنت کے بین الاقوامی ادارے ،آئی ایل او نے خبردار کیا ہے کہ زیادہ تر یوکرین کی جنگ اور چین میں اقتصادی مسائل کی وجہ سے پیدا ہونے والے متعدد اقتصادی اور سیاسی بحران محنت کی عالمی مارکیٹ کی بحالی کے لیے خطرہ بن رہے ہیں۔

آئی ایل او کی پیر کو شائع ایک رپورٹ میں کہا گیا کہ محنت کی مارکیٹ کی بگڑتی ہوئی صورتحال روزگار کے مواقعوں کی تشکیل اور روزگار کے معیار دونوں کو متاثر کررہی ہے۔

رپورٹ میں کہا گیا کہ متعدد بحران جن میں ایک عشرے سے جاری افراط زر کی بلند ترین شرحیں، سخت تر مالیاتی پالیسیاں اور قرض کے بڑھتے ہوئے بوجھ صارفین اور کاروباری اداروں کے اعتماد کو متاثر کر رہے ہیں۔

آئی ایل او کے ڈائریکٹر جنرل گلبرٹ ہونگبو نے کہا ہے کہ انحطا ط کا یہ رجحان بنیادی طور پر چین میں اقتصادی مسائل اور یوکرین کی جنگ کے نتیجے میں پیدا ہوا ہے ۔ اور اس سال کے شروع میں دیکھی گئی محنت کی عالمی بحالی کی علامات ختم ہو گئی ہیں۔

رپورٹ کے مصنفین کا کہنا ہے کہ ملازمتوں میں صنفی فرق کم کرنے میں پیش رفت بھی خطرے میں ہے اور ترقی یافتہ اور ترقی پذیر ممالک کے درمیان معاشی خلیج میں بھی اضافہ ہورہا ہے۔

ملیریا کی تجرباتی دوا چھ ماہ تک ملیریا سے محفوظ رکھتی ہے

افریقہ میں ایک نئی ریسرچ سے ظاہر ہوا ہے کہ ایک تجرباتی دوا کی صرف ایک بار دی جانے والی خوراک نے بالغ افراد کو چھ ماہ تک ملیریا سے محفوظ رکھا۔

امریکی نیشنل انسٹی ٹیوٹ آف ہیلتھ کے ریسرچرز کی تیار کردہ یہ تجرباتی دوا مالی کے دو دیہاتوں میں جہاں ملیریا کے موسم میں لوگوں کو مچھر روزانہ اوسطاًدن میں دو بار کاٹتے ہیں ، ملیریا کے شکار 330 بالغ افراد کو شاٹس کی شکل میں دی گئی۔

امریکی حکومت کی یہ ریسرچ پیر کے روز جریدے نیو انگلینڈ میں شائع ہوئی اور اسے سیاٹل میں ایک میڈیکل میٹنگ میں پیش کیا گیا۔

ایسو سی ایٹڈ پریس کے مطابق ریسرچرز کا خیال ہے کہ اس دوا کو ملیریا سے بچاؤ کے دوسرے طریقوں ، مثلاً ملیریا سے بچاؤ کی گولیوں، مچھر دانیوں اور ویکسینز کے ساتھ ملا کر استعمال کرنے سے لوگوں کو ملیریا سے زیادہ بہتر طور پر محفوظ رکھا جا سکتا ہے ۔

ملیریا سے افریقہ میں 2020 میں 620000 سے زیادہ لوگ ہلاک اور 241 ملین لوگ بیمار ہوئے جن کی اکثریت بچوں پر مشتمل تھی۔ عالمی ادارہ صحت کی بچوں کے لیے منظور کی گئی پہلی ویکسین صرف 30 فیصد موثر ہے اور اسے چار خوراکوں کی صورت میں دیا جاتا ہے ۔