عراقی کابینہ نے محمد شیعہ ال سوڈانی کی قیادت میں نئی حکومت کی منظوری دے دی
عراقی پارلیمنٹ نے جمعرات کو ایک نئی حکومت کی منظوری دے کر ایک سال سے زیادہ عرصے سے جاری تعطل کو ختم کردیا ہے لیکن اسے ابھی تک بہت سے چیلنجوں کا سامنا ہے ۔
52 سالہ وزیر اعظم محمد شیعہ ال سوڈانی ، جو اس سےپیشتر عراق کے انسانی حقوق کے امور اور محنت اور سماجی امور کے وزیر کے طور پر خدمات انجام دے چکے ہیں ، اگلی حکومت کی قیادت کریں گے ۔
سوڈانی نے ووٹنگ سے قبل ایک تقریر میں دوسرے امور کے علاوہ معیشت کی اصلاح ، بدعنوانی کے سد باب، انحطاط پذیر پبلک سروسز کو بہتر بنانے ، غربت اور بے روزگاری کے مقابلے کا عزم ظاہر کیا ۔
انہوں نے تین ماہ کے اندر انتخابی قانون میں ترمیم اور ایک سال کے اندر جلد پارلیمانی انتخابات کے انعقاد کا وعدہ بھی کیا ۔
جمعرات کو پارلیمنٹ کی ووٹنگ اس انتخاب کے ایک سال بعد ہوئی ہے جس میں شیعہ عالم مقتدی الصدر سب سے بڑے فاتح تھے لیکن جو ایک حکومت کی تشکیل کے لئے حمایت حاصل کرنے میں ناکام ہو گئے تھے ۔
90 فی صد چینی نوجوان چین کو امریکہ اور مغرب سے برتر یا برابر سمجھتے ہیں
چین کےسرکاری میڈیا کے ایک ادارے کی جانب سے کرائے گئے ایک سروے سے پتا چلا ہے کہ ملک کے 90 فیصد نوجوان مغرب اور امریکہ کو چین کے برابر سمجھتے ہیں یا انہیں کمتر ہی سمجھتے ہیں ۔
کمیونسٹ پارٹی سے منسلک گلوبل ٹائمز کی جانب سے 100 سے زائد شہروں میں 14 سے 35 سال کی عمر کے 1,655 افراد کے سروے سے یہ بھی ظاہر ہوا ہے نوجوان پہلے سے زیادہ پر اعتماد ہو گئے ہیں۔
سروے اور اس سے منسلک خبر میں یہ بھی کہا گیا ہے کہ بیجنگ کی جانب سے سوشل سیکیورٹی ، تاریخ اور کلچر جیسے شعبوں کی بہتری نے بھی نوجوانوں کے ان رویوں میں ایک کردار ادا کیا ہے ۔
جائزے کے نتائج حالیہ سماجی تبدیلیوں کے برعکس ہیں جیسے کہ شرح پیدائش میں کمی اور سماجی نقل و حرکت کی کمی کی وجہ سے نوجوانوں میں اتنی مایوسی کہ وہ شادی کرنے، بچے پیدا کرنے، گھر یا کار خریدنے سے گریز کر رہے ہیں اور صرف اور صرف پیسہ کمانے کی دوڑ میں مصروف ہیں ۔
اگلے ہفتے اسرائیل کے نئے انتخابات میں نتن یاہو کی جیت کے امکانات روشن
اسرائیلی اگلے ہفتے ایک ایسے انتخاب کے لیےووٹ ڈالیں گے جس میں سابق وزیر اعظم بنیامن نتن یاہو اقتدار میں واپس آسکتے ہیں۔
نتن یاہو نے، جو اسرائیل کے سب سے زیادہ عرصے تک خدمات انجام دینے والے وزیر اعظم رہ چکےہیں ، اپنی لیکود پارٹی کی حمایت حاصل کرنے کی مہم شروع کر دی ہے جب کہ انہیں بد عنوانی کے الزامات کا بھی سامنا ہے۔
منگل کے انتخابات اسرائیل میں چار سال میں ہونے والے پانچویں انتخابات ہوں گے ۔
وزیر اعظم یائر لیپڈن نے گزشتہ سال اس کے بعد نتن یاہو کی جگہ لی تھی۔ وہ آٹھ جماعتوں کی مخلوط حکومت کے مشترکہ امیدوار تھے۔
رائے عامہ کے جائزے پیش گوئی کر رہے ہیں کہ لیکود پارٹی اگلے ہفتے کی ووٹنگ میں لیپڈ کی یش عتید پارٹی سے آگے ہو گی لیکن یہ اس کی ضمانت نہیں ہے کہ سابق وزیر اعظم کو اپنا پرانا منصب خود بخود مل جائے گا۔
دونوں جماعتوں کو چھوٹی جماعتوں کو اپنے ساتھ اتحاد کے لیے قائل کرنا ہو گا جس کے نتیجے میں وہ اسرائیل کی پارلیمنٹ ، میں اکثریتی نشستیں حاصل کر سکیں گی ، جو ایک ایسا عمل ہے جس میں ہفتوں لگ سکتے ہیں۔
روسی حملوں سےیوکرین کے داراحکومت سیمت کئی شہروں میں پانی اور بجلی کی فراہمی منقطع
یوکرین کے عہدے داروں نے پیر کی صبح کیف ، خارکیف اور دوسرے شہروں پر روسی حملوں کے ایک بڑے سلسلے کی خبر دی ہے۔
کیف کے مئیر نے پیر کو کہا کہ اس کے نتیجے میں یوکرین کے دار الحکومت میں بجلی اور پانی کی رسدوں کا سلسلہ منقطع ہو گیا ۔
عہدے داروں نے حملوں کے نتیجے میں خارکیف اور زپاریژیا کے شہروں میں بجلی کی ممکنہ بندش کی بھی خبر دی۔
یہ حملہ روس کی جانب سے یوکرین پر اس الزام کے دو دن بعد ہوا ہے کہ یوکرین نے روس کے الحاق کیے گئے جزیرہ نما کرائمیا کےساحل کے قریب بحیرہ اسود کے روسی بحری بیڑے پر ایک ڈرون حملہ کیا ہے ۔
یوکرین نے اس حملے کی تردید کرتے ہوئے کہا ہے کہ روس نے خود اپنے ہتھیاروں کو غلط طریقے سے استعمال کیا ہے ۔ لیکن ماسکو نے پھر بھی اقوام متحدہ کی ثالثی میں یوکرین سے اناج لے جانے والے بحری جہازوں کو محفوظ راستہ فراہم کرنے کی اجازت دینے کے معاہدے سے اپنی شرکت روکنے کا اعلان کیا ہے۔