ناک کے ذریعے دیے جانے والی اسپرے ویکسین کا استعمال شروع ہو گیا

چین کے شہر شنگھائی نے بدھ کے روز سے کویڈ* 19 کی ناک کے ذریعے لی جانےوالی ویکسین کی فراہمی شروع کر دی ہے جو دنیا میں بظاہر ایسی پہلی ویکسین ہے۔

شہر کے ایک سرکاری سوشل میڈیا اکاونٹ پر پوسٹ کیے گئے ایک اعلان کے مطابق اسپرے کے ذریعے منہ کےراستے دی جانے والی اس ویکسین کو پہلے سے ویکسین شدہ لوگوں کو ایک بوسٹر ڈوز کے طور پر فری دیا جا رہا ہے۔

سوئی کے بغیر دی جانے والی ویکسینز ان لوگوں کوویکسین کی جانب راغب کر سکتی ہے جوٹیکے لگوانا پسند نہیں کرتے ، جب کہ یہ غریب ملکوں میں ویکسی نیشن کی توسیع میں بھی مدد گار ہو سکتی ہیں کیوں کہ ان کا انتظام کرنا زیادہ آسان ہوتا ہے ۔

چین کے پاس ویکسین کا عالمی اجازت نامہ نہیں ہے لیکن وہ چاہتا ہے کہ زیادہ سے زیادہ لوگ اس کے بوسٹر شاٹس لگوا لیں۔ اس سے قبل کوویڈ-19 کی سخت پابندیوں کے باعث چین کی معیشت متاثر ہو چکی ہے۔

معدنی ایندھن کا بڑھتا ہوا استعمال مزید لوگوں کو بیمار کر رہا ہے، عالمی ادارہ صحت

ڈاکٹروں اور صحت کے دوسرے ماہرین کا کہنا ہے کہ معدنی ایندھن کے استعمال کی عادت دنیا کو مزید بیمار اور لوگوں کو ہلاک کر رہی ہے ۔

منگل کے روز کے طبی جریدے لینسیٹ میں شائع ہونے والی ایک رپورٹ میں کہا گیا ہے کہ آب وہوا کی تبدیلی کی وجہ سے پیدا ہونے والے شدید موسم نے لگ بھگ 100 ملین لوگوں کو بھوک میں مبتلا کر دیا ہے ۔

رپورٹ میں یہ بھی کہا گیا ہے کہ کمزور گروپس میں 68 فیصد لوگ گرمی کی وجہ سے ہلاک ہو جاتے ہیں اور ہر سال کوئلے ، تیل اور قدرتی گیس جلانے سے پیدا ہونے والی آلودگی سے دنیا بھر میں 12 لاکھ لوگ لقمہ اجل بن جاتے ہیں۔

لینسیٹ کی رپور ٹ میں صحت کے 43 مختلف اشاریوں کا جائزہ لیا گیا ہے ۔

رپورٹ کے مصنفین کا کہنا ہے کہ گلوبل وارمنگ کی وجہ سے صحت کے عالمی مسائل بد تر شکل اختیار کر رہے ہیں۔

اسرائیلی صدرآئزک ہرزوگ بدھ کو امریکی صدر جو بائیڈن سے ملاقات کے دوران یوکرین میں روسی افواج کی جانب سے استعمال کیے جانے والے ایرانی ڈرونز کے بارے میں انٹیلیجنس کی معلومات شیئر کرنے کا ارادہ رکھتے ہیں۔

ہرزوگ کے دفتر نے کہا کہ اسرائیل کے پاس ایسی تصاویر ہیں جن سے ظاہر ہوتا ہے کہ یوکرین میں گرائےجانے والے ڈرونز اور ایران کے 2021 میں تجربہ کیے گئے ڈرونز کے درمیان مماثلت موجود ہے۔

ایران نے روس کو ان ڈرونز کی کی ترسیل کی تردید کی ہے اور روس نے انہیں یوکرین میں استعمال کرنے سے انکار کیا ہے۔

روس کی جوہری مشقوں میں ایٹمی آبدوز، طیارے اور مختلف اقسام کے میزائل شامل

کریملن نے کہا ہے کہ روسی صدر ولادی میر پوٹن نے بدھ کے روز اپنے ملک کی اسٹریٹجک نیوکلیئر فورسز کی مشقوں کا دور سے مشاہدہ کیا جن کا مقصد کسی بڑے جوہری حملے کے ردعمل کی کمپیوٹر پر نقل تیار کرنا تھا۔

روسی سرکاری ٹیلی ویژن نےپوٹن کی وہ ویڈیو دکھائی جس میں وہ ایک بڑی ٹیلی ویژن اسکرین پر مشقوں کا مشاہدہ کررہے تھے جن کے ساتھ فوجی رہنماؤں کے تبصرے شامل تھے ۔

نشریات میں روسی وزیر دفاع سرگئی شوئیگو نے کہا کہ مشقوں میں ایک جوہری آبدوز، طویل فاصلے تک مار کرنے والے طیارے اور بیلسٹک اور کروز میزائلوں کی متعدد مشقیں شامل ہیں ۔

وائٹ ہاؤس نے منگل کو کہا کہ روس نے نوٹس دیا تھا کہ وہ سالانہ مشقیں منعقد کرنے جا رہا ہے، جسے "گروم" یا "تھنڈر" کہا جاتا ہے ۔ یہ مشقیں ایسے میں ہوئیں جب نیٹو نے پیر کو اپنی سالانہ جوہری مشقیں شروع کیں، جنہیں سٹیڈفاسٹ نون کہا جاتا ہے۔

کئی روز سے روسی عہدے دار یوکرین پر الزام عائد کر رہے ہیں کہ وہ روس کے ساتھ اپنے تنازعے میں ایک نام نہاد ڈرٹی بم بنانے اور استعمال کرنے کی تیاری کر رہا ہے۔

اقوام متحدہ کی سلامتی کونسل نے منگل کو ایک بند دروازوں کے پیچھے روس کے الزامات پر گفتگو کی ۔ یوکرین اور اس کے مغربی اتحادیوں نے ان الزامات کی سختی سے تردید کی ہے اور یہ شبہ ظاہر کیا ہے کہ یہ الزامات اس لیے لگائے جا رہے ہیں تاکہ یوکرین میں جنگ میں اضافے کی کسی قسم کا کوئی بہانہ بنایا جاسکے۔