یوکرین کے اہداف پر ڈرون حملوں کے لیےایرانی فوجی روس کی مدد کر رہے ہیں: امریکہ

وائٹ ہاؤس نے کہا ہے کہ امریکہ کے پاس اس بارے میں شواہد ہیں کہ ایرانی فوجی یوکرین کے بجلی گھروں اور دوسرے اہم انفرا اسٹرکچر پر روسی ڈرون حملوں میں کرائمیا کی براہ راست زمینی مدد کر رہے ہیں ۔

قومی سلامتی کے ترجمان جان کربی نے جمعرات کو نامہ نگاروں کوبتایا کہ ایران نے نسبتاً کم تعداد کا عملہ کرائمیا بھیجا ہے جو یوکرین کا وہ حصہ ہے جس سے روس نے بین الاقوامی قانون کی خلاف ورزی کرتے ہوئے 2014 میں اپنے ساتھ الحاق کر لیا تھا۔

ایسو سی ایٹڈ پریس کے مطابق انہوں نے کہا کہ ایرانی ٹرینرز اور ٹیکنیکل ماہر روسی فوجیوں کو یوکرین کے خلاف ایرانی ساختہ ڈرونز لانچ کرنے میں مدد کر رہے ہیں لیکن یہ سب کام روسی خو دسر انجام دے رہے ہیں۔

امریکی انٹیلی جینس کی یہ معلوما ت ایک ایسے موقع پر سامنے آئی ہیں جب روس ایرانی ساختہ ڈرونز سے یوکرین کے شہری اہداف پر بم برسا رہا ہے اور بائیڈن انتظامیہ تہران کو روس کی مدد کرنے سےروکنے کے لیے اس پر بین الاقوامی دباؤ بڑھانے کی کوشش کر رہی ہے۔

صدر اردوان نے ترکیہ کو قدرتی گیس کا مرکز بنانے کے روسی معاہدے پر دستخط کر دیے

ترک صدر رجب طیب اردوان نے ترکیہ کو روس کی قدرتی گیس کے ایک مرکز میں تبدیل کرنے سے متعلق روسی صدر ولادی میر پوٹن کے منصوبے پر دستخط کر دیے ہیں۔ بدھ کے رو ز پارلیمنٹ کے نائبین سے خطاب کرتے ہوئے اردوان نے کہا کہ ترکی نے پوٹن کے منصوبے سے متفق ہو کر ایک اہم موقع حاصل کر لیا ہے۔

انہوں نے کہا کہ یورپی ملک اس وقت اس تلاش میں ہیں کہ قدرتی گیس کی رسدیں کہاں سے حاصل ہوں۔ خدا کا شکر ہے کہ ترکی کا ایسا کوئی مسئلہ نہیں ہے، امید ہے کہ ہم جلد ہی قدرتی گیس کے لئے ایک مرکز بن جائیں گے۔

پوٹن کا یہ منصوبہ ا یسے میں سامنے آیا ہے جب انقرہ یورپ کے لیے روسی توانائی کا ایک متبادل بننے کی کوشش کررہا ہے۔

ترک صدارتی ترجمان ابراہیم کالین نے بدھ کے روز کہا کہ پوٹن کی پیش کش بہت اہم ہے، لیکن اگر یورپ روسی گیس کے متبادل کی تلاش میں ہے تو وہ دو جگہوں سے اسے حاصل کر سکتا ہے، آزر بائیجان سے ترکی کے راستے گزرتی ہوئے ایک پائپ لائن اور مستقبل میں ممکنہ طور پر ایرانی گیس، ایک بار پھر ترک پائپ لائنوں کے ذریعے سے۔

کچھ تجزیہ کاروں کا کہنا ہے کہ اردوان پوٹن کی مدد کی کوشش اس لیے کریں گے کیوں کہ وہ روسی گیس کی قیمت میں کمی اور ادائیگیوں کو اگلے سال ترک صدارتی انتخاب تک موخر کرنے سے متعلق گفت و شنید کی کوشش کررہے ہیں ۔

ایران کی بہادر خواتین ہماری مدد کی حق دار ہیں: کینیڈا کی وزیر خارجہ کا ورچوئل کانفرنس سے خطاب

کینڈا کی وزیر خارجہ نے جمعرات کو دنیا بھر سے اپنی ہم منصب خواتین کے ایک گروپ کے ساتھ ورچوئل اجلاس کے دوران کہا کہ ایران کی انتہائی بہادر خواتین ہماری مدد کی حقدار ہیں۔ ایران کی خواتین واضح طور پر کہہ رہی ہیں کہ وہ اب زیادہ دیر تک معاشرے میں خواتین کے بارے میں حکومت کے وژن کو برداشت نہیں کریں گی ۔

رائٹرز کے مطابق اجلاس میں ایران میں مہسا امینی کی پولیس کے زیر حراست ہلاکت کے بعد ایک ماہ سے جاری مظاہروں پر گفتگو ہوئی ۔

جولی نے کہا کہ اجلاس سے ایرانی خواتین کے ساتھ عالمی یک جہتی کا اظہار ہوتاہے یہ ایرانی حکومت کو یہ پیغام دیتا ہے کہ دنیا نظر رکھے ہوئے ہے ۔ انہوں نے کہا کہ ہماری یہ زمہ داری ہے کہ ایران کی خواتین کی اواز کو پھیلانے میں مدد کریں۔

ایران نے ان ملکوں پر اس کے اندرونی معاملات میں مداخلت کا الزام عائد کیا ہے جنہوں نے مظاہروں کی حمایت کا اظہار کیا ہے ۔

شمالی اور جنوبی کوریا کے درمیان انتباہی گولیوں کا تبادلہ

شمالی اور جنوبی کوریا نے کہا ہے کہ انہوں نے اپنے مغربی ساحل سے پرے ایک متنازع علاقے کے قریب انتباہی گولیوں کا تبادلہ کیا ہے ، جو جزیر ہ نما کوریا میں فوجی کشیدگیوں میں اضافے کی تازہ ترین علامت ہے ۔

جنوبی کوریا کی فوج نے کہا ہے کہ اس نے شمالی کوریا کے ایک تجارتی بحری جہاز پر انتباہی فائر کئے جس نے شمالی کوریا کی حد یعنی کوریائی سمندر کی فی الواقع سرحد کو پیر کے روز مقامی وقت کے مطابق صبح تین بجکر بیالیس منٹ پر عبور کیا۔

سرکاری میڈیا پر پوسٹ کیے گئے شمالی کوریا کے ایک سرکاری بیان کے مطابق، تقریباً90 منٹ کے بعد شمالی کوریا نے جواب میں ایک سے زیادہ راکٹ لانچر سسٹم سے دس گولے داغے۔

کسی فریق نے پیر کو کسی قسم کی جھڑپوں کی اطلاع نہیں دی ہے ۔