بورس جانسن وزارت اعظمیٰ کی دوڑ سے باہر ہو گئے

برطانیہ کے سابق وزیر اعظم بورس جانسن نے اتوار کے روز اعلان کیا کہ وہ قدامت پسند پارٹی کی قیادت کے لیے انتخاب نہیں لڑیں گے ، جس سے ان کی واپسی کے بارے میں شدید قیاس آرائیاں ختم ہوگئی ہیں۔

جانسن ، جنہیں جولائی میں اخلاقیات کے اسکینڈلز کے دوران معزول کیا گیا تھا ،ان کے بارے میں بڑے پیمانے پر توقع کی جارہی تھی کہ وہ لز ٹرس کی جگہ لیں گے جنہوں نے گزشتہ ہفتے استعفی دیا تھا۔

انہوں نے اختتام ہفتہ اپنے ساتھی قانون سازوں کی حمایت حاصل کرنے کی کوشش میں گزارا ، اور کہا کہ انہوں نے 100 سے زیادہ ووٹ اکٹھے کیے ہیں جو انتخاب لڑنے کے لیے درکار حد ہے ۔

لیکن وہ حمایت میں سابق وزیر خزانہ رشی سناک سے کافی پیچھے ہیں۔

جانسن نے کہا کہ انہوں نے یہ نتیجہ اخذ کیا ہے کہ آپ اس وقت تک مؤثر طریقے سے حکومت نہیں کر سکتے جب تک آپ کے پاس پارلیمنٹ میں ایک متحدہ پارٹی نہ ہو ۔

ان کی دست برداری نے سناک کوبرطانیہ کےاگلے وزیر اعظم کے طور پر سب سے مضبوط امیدوار بنا دیا ہے ۔ وہ پیر کے روز ہی مقابلہ جیت سکتے ہیں۔

امریکہ میں کووڈ-19 سے ملک بھر میں بچوں کا تعلیمی میعار پست ہوا ہے

امریکہ میں نئے قومی ٹیسٹ کے نتائج سے ظاہر ہوتا ہےکہ پینڈیمک نے ملک کے ہر حصے کے بچوں کی تعلیم کو تاریخی نقصان پہنچایا ہے ۔

تعلیمی ترقی کے قومی اندازے کے تازہ ترین نتائج کے مطابق ہر ریاست میں ریاضی اور پڑھنے کے اسکورز میں کمی دیکھی گئی ۔

ریا ضی کے اسکورز میں تاریخی کمی دیکھی گئی اور پڑھائی کے اسکورز گر کر 1992 کی سطح پر واپس چلے گئے ۔

2019 کے بعد سے اس سال پہلی بار ٹیسٹ دیے گئے اور اسے تعلیم پر پینڈیمک کا قومی سطح کا پہلا نمائندہ جائزہ خیال کیا گیا ہے ۔

وزیر تعلیم میگوئل کارڈونا نے ان نتائج کو نا قابل قبول قرار دیا اور کہا کہ اسکولوں کو بچوں کی تعلیمی بحالی میں مدد کے لئے اپنی کوششوں میں دوگنا اضافہ کردینا چاہئے ۔

‘روس کے ساتھ امن کے وقت اور شرائط کا فیصلہ یوکرین کو کرنا ہے’

فرانسیسی صدر ایمینوئل میکراں نے کہا ہے کہ روس کے ساتھ امن کے وقت اور شرائط کے فیصلے کا انحصار یوکرین پر ہے ۔

اتوار کو روم میں ایک امن کانفرنس سے خطاب کرتے ہوئے میکراں نے کہا کہ جب وہ وقت آئے گا تو بین الاقوامی برادری اس کے ساتھ ہو گی۔

اس بارے میں تشویش پائی جاتی ہے کہ اب جب موسم سرما قریب ہے ، توانائی کی بڑھتی ہوئی قیمتوں کی وجہ سے یورپ میں یوکرین کے اتحادیوں کی مدد میں کمی ہو سکتی ہے ۔

ایسو سی ایٹڈ پریس کے مطابق ایک کیتھولک فلاحی ادارے کے زیر اہتمام امن کانفرنس میں میکراں نے کہا کہ غیر جانبدار رہنے کا مطلب ہے کہ دنیا میں اسی کا حکم چلے گا جو سب سے زیادہ طاقتور ہو گا اور میں اس سے اتفاق نہیں کرتا۔

میکراں پیر کو پوپ فرانسس سے ملاقات کر رہے ہیں ۔ میکرا ں نے جو ایک اعتدال پسند ہیں ، روم میں نجی طور پر اٹلی کے نئے وزیر اعظم، انتہائی دائیں بازو کے راہنما جیورجی میلونی سے ملاقات کی

امریکی حکومت آب و ہوا کی تبدیلی سے نمٹنے کے لیے کافی کچھ نہیں کر رہی: سروے رپورٹ

ایسو سی ایٹڈ پریس اور نیشنل اوپینئن ریسرچ سینٹر کی جانب سے کرائے گئے رائے عامہ کے ایک جائزے سے ظاہر ہوا ہے کہ امریکیوں کی ایک تہائی تعداد کا خیال ہے کہ وفاقی حکومت آب و ہوا کی تبدیلی سے نمٹنے کے لیے خاطر خواہ اقدامات نہیں کر رہی ۔

رائے عامہ کا یہ جائزہ ایسے میں ہوا ہے جب اس میں شامل افراد اس نئے قانون سے زیادہ واقف نہیں ہیں جو گلوبل وارمنگ سے نمٹنے کے لیے امریکہ کو اس کی اب تک کی سب سے بڑی سرمایہ کاری کا پابند کرتا ہے ۔

صدر جو بائیڈن اور کانگریس میں ڈیموکریٹس نے اگست میں منظور کیے گئے مہنگائی میں کمی کے قانون کو ایک سنگ میل کی کامیابی قرار دیا ہے جس سے انہیں امید ہے کہ ان کی پارٹی کو نومبر کے انتخابات میں ایوان اور سینیٹ میں اپنی اکثریت برقرار رکھنے کے امکانات کو تقویت ملے گی۔

اس کے باوجود ایسوسی ایٹڈ پریس-این او آر سی کے سینٹر فار پبلک افیئر ریسرچ کے سروے سے پتا چلتا ہے کہ 61 فیصد امریکی بالغوں کا کہنا ہے کہ وہ اس کے بارے میں کچھ بھی نہیں جانتے ۔