برطانوی وزیر اعظم لز کو عہدہ سنبھالتے ہی بحرانوں کا سامنا

برطانوی وزیر اعظم لز ٹرس کو اپنا عہدہ سنبھالے ابھی صرف چھ ہفتے ہوئے ہیں لیکن ان کی آزاد معاشی پالیسیوں نے ایک مالیاتی بحران، ہنگامی مرکزی بینک کی مداخلت، متعدد یوٹرن اور ان کے ٹرژری چیف کی برطرفی کو جنم دیا ہے۔

اب ٹرس کو حکمران کنزرویٹو پارٹی کے اندر بغاوت کا سامنا ہے جس نے ان کی قیادت کو انتہائی کمزور کر دیا ہے ۔

ایسو سی ایٹڈ پریس کے مطابق قدامت پسند قانون ساز رابرٹ ہفان نے اتوار کو حکومت پر الزام لگایا کہ وہ ملک کے ساتھ لیبارٹری کےچوہوں کی طرح کاسلوک کر رہی ہے جن پر الٹرا، الٹرا فری مارکیٹ تجربات کیے جا سکتے ہیں۔

قدامت پسند اس بات پر غور کر رہے ہیں کہ آیا ان کے رہنما کو زبردستی نکالنے کی کوشش کی جائے۔

اسی دوران ، ٹرس نے ایک نئے وزیر خزانہ، جیریمی ہنٹ کو مقرر کیا ہے، جو 31 اکتوبر کو بجٹ بیان دیتے وقت ٹرس کے بیشتر معاشی منصوبے ختم کرنے کا ارادہ رکھتے ہیں ۔

ترکیہ نے یونان کا برہنہ تارکین وطن بھیجنے کے الزام کو جھوٹ قرار دے دیا

ترک عہدے داروں نے اتوارکے روز یونان کے ان الزامات کوجھوٹ قرار دیا ہے کہ ترکی نے 92 برہنہ تارکین وطن کو یونان بھیجا ہے۔

یونان کے تارکین وطن سے متعلق وزیر ، نوٹس مٹاراچی کی جانب سے ہفتے کے روز ٹویٹر پر لباس سے محرم تارکین وطن کے فوٹوپوسٹ کیے جانے کے بعد ترکی کے کمیونی کیشن ڈائریکٹر فاہریٹین التون، نے ٹوئٹر پر کہا کہ مٹاراچی غلط معلومات شئیر کر رہے تھے ۔

انہوں نے ترکی اور انگریزی زبان میں لکھا کہ اس کا مقصد ہمار ے ملک کے بارے میں شبہات پیدا کرنا ہے جب کہ انہوں نے ایتھنرز سے پناہ گزینوں کے خلاف بد سلوکی ترک کرنے کا مطالبہ کیا ۔

انہوں نے لکھا کہ یونان نے ان مظلوم لوگوں کی تصاویر پوسٹ کر کے پوری دنیا کو ایک بار پھر دکھا دیا ہے کہ وہ ان مہاجرین کے وقار کا احترام نہیں کرتا جنہیں اس نے ان کی املاک ضبط کرنے کے بعد ملک سے نکال دیا ہے۔

اقوام متحدہ کے پناہ گزینوں سے متعلق ادارے نے کہا ہے کہ اسے ان افسوسناک خبروں پر شدید مایوسی ہوئی ہے اور اس نے اس توہین آمیز سلوک کی مذمت کرتے ہوئے اس کی تحقیقات کا مطالبہ کیا ہے۔

ورلڈ کپ پاس کے لیے 15 لاکھ سے زیادہ شائقین کی درخواستیں

قطر نے اتوار کو کہا کہ 20 نومبر سے شروع ہونے والے فٹ بال ورلڈ کپ کے لازمی پاس کے لیے 15 لاکھ سے زیادہ لوگوں نے درخواست دی ہے۔

حیا پاس سروس کے سربراہ سعد السویدی نے کہا کہ اب تک 15 لاکھ سے17 لاکھ کے درمیان افراد اس کارڈ کے لیے درخواست دے چکے ہیں، جو کہ ویزا، میچ ٹکٹ، ٹرانسپورٹ ٹکٹ کے طور پر کام کرتا ہے اور کچھ فین زونز تک رسائی فراہم کرتا ہے۔

قطر جانے والے تمام مسافروں کو یکم نومبر سے داخلے کے لیے پاس کی ضرورت ہوگی، چاہے وہ کوئی گیم دیکھنا چاہیں یا نہ چاہیں ۔

قطر نے کہا ہے کہ اسے توقع ہے کہ میچ دیکھنے کے لیے 10 لاکھ سے زیادہ غیر ملکی اور لاکھوں ملکی شائقین آئیں گے ۔

بین الاقوامی شائقین کو ٹکٹ خریدنے اور رہائش حاصل کرنے کے بعد پاس کے لیے درخواست دینی ہوگی۔حکام نے بتایا کہ دوحہ کے2 بین الاقوامی ہوائی اڈے روزانہ ڈیڑھ لاکھ افراد کے اندراج کی تیاری کر رہے ہیں۔

سعودی عرب سے زمینی راستے کے ذریعے دوحہ جانے والوں کولازمی طور پر بس سے سفر کرنا ہوگایا اپنی گاڑی سے جانے کے لیے 1375 ڈالر فیس ادا کرنا ہوگی۔

حکام کا کہنا ہے کہ ابو سمرہ لینڈ کراسنگ پر سرحدی اہلکار فی گھنٹہ 4000 افراد کی کاغذی کارروائی مکمل کر سکیں گے۔

نیٹو نے شمال مغربی یورپ میں سالانہ جوہری مشقیں شروع کر دیں

نیٹو نے پیر کے روز شمال مغربی یورپ میں اپنی ایک عرصے سے منصوبہ کی گئی سالانہ جوہری مشقیں شروع کر دی ہیں جب کہ یوکرین میں جنگ اور صدر ولادی میر پوٹن کی جانب سے روسی علاقے کے دفاع کے لیے کسی بھی طریقے کے استعمال کی دھمکی سے کشیدگیوں میں اضافہ ہو رہا ہے ۔

نیٹو کے 30 رکن ملکوں میں سے 14 کو ان مشقوں میں حصہ لینا تھا جن کے بارے میں فوجی اتحاد نے کہا ہے کہ ان میں لڑاکا جیٹ اور نگرانی اور ایندھن دوبارہ بھرنے والے طیاروں سمیت 60 ائیر کرافٹ شامل ہوں گے ۔

بیشتر جنگی مشقیں روس کی سرحدوں سے کم از کم ایک ہزار کلومیٹر کے فاصلے پر ہوں گی ۔

امریکہ کے طویل فاصلے پر مار کرنے والے بی -52 بمبار طیارے بھی ان مشقوں میں حصہ لیں گے۔ یہ مشقیں 30 اکتوبر تک جاری رہیں گی ۔

نیٹو کسی میڈیا کو رسائی کی اجازت نہیں دے رہا ہے۔

نیٹو نے کہا ہے کہ تربیتی پروازیں اس سال کی مشقوں کے میزبان ملک بلجیم اور شمالی سمندر اور برطانیہ کی فضا پر ہوں گی ۔

ان مشقوں میں جوہری ہتھیار لے جانے کی صلاحیت کے حامل لڑاکا جیٹ طیارے حصہ لیں گے لیکن اصلی بم شامل نہیں ہوں گے ۔