داعش کی معاونت پر کینیڈاکےایک شہری کو 20سال قید کی سزا
کینیڈا کے ایک شخص کو شام میں داعش کو معاونت فراہم کرنے کے جرم میں پیر کے روز امریکہ کے ایک جیل میں 20 سال قید کی سزا سنائی گئی۔
محکمہ انصاف نے ایک بیان میں کہا کہ ایڈمنٹن البرٹا کے 37 سالہ عبد اللہی احمد عبداللہی کو 2019 میں کینڈا سے سین ڈی ایگو منتقل کر دیا گیا تھا ، عبداللہی نے سین ڈی ایگو کی ایک وفاقی عدالت میں دسمبر 2021 میں تمام الزامات کے لیے اقبال جرم کر لیا تھا ۔
اس پر نارتھ امریکہ کے چھ شہریوں کے لیے شام کے سفر کی معاونت کا الزام تھا ، جہاں اس نے داعش میں شمولیت اختیار کی تھی ۔
فنڈز اکٹھے کرنے میں مدد کے لیے عبد اللہی نے اعتراف کیا کہ اس نے 2014 میں ایڈمنٹن کے ایک جیولری اسٹور پر ایک مسلح ڈاکہ ڈالا تھا۔
جسٹس ڈپارٹمنٹ نے کہا کہ وہ تمام چھ امریکی داعش کے لیے لڑتے ہوئے آخر کار مارے گئے تھے۔
آئندہ برسوں میں امریکہ کو چین سے چیلنجز کا سامنا ہو سکتا ہے
امریکی وزیر خارجہ اینٹنی بلنکن نے کہا ہے کہ امریکہ کو آنے والے برسوں میں جمہوریہ چین سے چیلنج لاحق ہیں، لیکن واضح معاندانہ پہلووں کے ظاہر ہونے کے باوجود دو طرفہ تعلقات میں تعاون کے کچھ پہلو بھی ہیں مثلاً آب و ہوا کی تبدیلی کے خلاف لڑائی اور عالمی صحت کا فروغ ۔
بلنکن نے تائیوان کی جانب چین کے تبدیل ہوتے ہوئے رویے کے دوران پورے آبنائے تائیوان میں امن اور استحکام کے ساتھ امریکی عزم کی بھی تجدید کی ۔
ان کے یہ تبصرے ایسے میں سامنے آئے ہیں جب چین کی کمیونسٹ پارٹی کانگریس اس ماہ سی سی پی کے جنرل سیکرٹری زی جن پنگ کو پانچ سال کی تیسری مدت کے لئے اقتدار حوالے کرنے کے لئے تیار ہے ۔
صدر بائیڈن تیل کے امریکی ذخائر سے ایک کروڑ 50 لاکھ بیرل فراہم کرنے کا اعلان کریں گے
صدر بائیڈن اوپیک پلس ملکوں کی جانب سے تیل کی پیداوا ر میں کمی کے حالیہ اعلان کے ایک رد عمل میں بدھ کے روز امریکی حکمت عملی کے ریزرو سے 15 ملین بیرل تیل نکالنے کا اعلان کریں گے ۔
ایسو سی ایٹڈ پریس کے مطابق منگل کے روز انتظامیہ کے ایک سینئر اہلکار نے اپنا نام ظاہر نہ کرنے کی شرط پر منگل کے رو ز بائیڈن کے منصوبوں پر بات کی ۔
اہلکار کے مطابق صدر یہ بھی کہیں گے کہ اس موسم سرما میں تیل کی مزید فروخت ممکن ہے جب کہ ان کی انتظامیہ اگلے ماہ مڈ ٹرم الیکشنز سے قبل گیس کی قیمتوں سے نمٹنے کی کوشش کررہی ہے۔
اس وقت حکمت عملی کے ذخائر میں لگ بھگ 400 ملین بیرل تیل موجود ہے جو 1984 کے بعد سے کم ترین سطح ہے ۔
نیویارک میں تارکین وطن کے لیے نیا عارضی شہر
امریکہ کی جنوبی ریاستوں سے نیو یارک بھیجے جانے والے بین الاقوامی تارکین وطن کے ایک بڑے گروپ کے لیے ایک نیا عارضی سینٹر کھولا جا رہا ہے۔
بڑ ے بڑے خیموں پر مشتمل یہ کمپلیکس شہر ایک جزیرے رینڈلز آئی لینڈ میں بنایا گیا ہے۔
ایسو سی ایٹڈ پریس کے مطابق عہدے داروں نے بتایا ہے کہ اس سینٹر کا مقصد ان اکیلے، بالغ مردوں کو ایک عارضی پناہ گاہ فراہم کرنا ہے ، جن میں سے اکثر کا تعلق وینزویلا سے ہے۔
ان میں سے زیادہ تر پناہ گزین ٹیکساس سے چارٹرڈ بسوں کے ذریعے نیویارک پہنچے ہیں۔
انہیں فراہم کی گئی سہولتوں میں پانچ سو لوگوں کے لیے چار پائیاں ، لانڈری کی سہولتیں ، ایک ڈائننگ ہال اور بین الاقوامی کالز کے لیے فونز شامل ہیں۔
بچو ں کے ساتھ آنے والے خاندانوں کو ہوٹلوں میں رکھا جا رہا ہے۔