یوکرین کے جوابی حملے روس کو پریشان کر رہے ہیں

یوکرین کی فوج کی جنوبی محاز پر جاری اور مستقل کامیابیاں کریملن کو پریشان کر رہی ہیں اس کی ایک علامت یہ ہے کہ روس جزوی طور پر زیر قبضہ علاقےکھیرسن کے ان رہائشیوں کو جو روس جانا چاہتے ہیں مفت رہائش فراہم کرنے کاا وعدہ کیا ہے ۔

روس کے نائب وزیر اعظم نے یہ اعلان اس کے تھوڑی دیر بعد کیا جب گزشتہ ماہ ماسکو کی جانب سے غیر قانونی طور پر الحاق کیے گئے یوکرین کے چار علاقوں میں سے ایک کھیرسن کے روسی حمایت یافتہ لیڈر نے کریملن سے کہا کہ وہ علاقے کے چار شہروں سے انخلا کا بندو بست کرے ۔

جمعے کی صبح روس نے پورے یوکرین میں اہم انفرا اسٹرکچر پر اپنے حملے جاری رکھے ۔

روس کے میزائل حملوں سے زاپوریژیا ہل کر رہ گیا جب کہ یہ شہر ، یوکرین کی فوجوں کی کامیابیوں کے بعد سے روسی حملوں کا مسلسل ایک مرکزی مقام بنا ہوا ہہے۔

چین کی کمیونسٹ پارٹی اتوار کو بیجنگ میں ایک اہم سیاسی اجلاس منعقد کر رہی ہے جہاں متوقع طور پر ملک کے سربراہ شی جن پنگ کی پارٹی میں مزید پانچ سال کی تیسری ، غیر معمولی، مدت کے لیے جنرل سیکریٹری کے عہدے کے لیے توثیق کی جائے گی۔

حکام نے دس سال کے عرصے میں ہونے والے پارٹی کی قیادت کے دوسرے اجلاس کی وجہ سے بیجنگ میں سکیورٹی سخت کر دی ہے۔ کئی سڑکوں کو بند کر دیا گیا ہے اور گشت بڑھا دیا گیا ہے تاکہ یقینی بنایا جا سکے کہ کسی طرح کا کوئی خلل نہ پڑے۔

لیکن اس کے باوجود یہ اقدامات بعض چینی شہریوں کو بولنے سے نہیں روک سکے ہیں اور کئی ایک نے طویل قید کے خطرات مول لیتے ہوئے لب کشائی کی ہے۔

جمعرات کو بیجنگ میں شہر کے بڑے بائی پاس کے نزدیک بڑے سفید بینر دیکھے گئے جن پر صدر شی جن پنگ کو ’ ڈکٹیٹر ‘ یعنی مطلق العنان کہہ کر مخاطب کیا گیا تھا۔ اور طالبعلموں اور ورکروں پر زور دیا گیا تھا کہ وہ ہڑتال کریں۔ دیگر بینرز پر چین کی زیرو کووڈ پالیسی پر تنقید کی گئی تھی۔

اس کے علاوہ ایک جگہ پر آگ لگنے دھواں اٹھتا بھی نظر آیا۔ یہ آگ بظاہر بینر کو لگائی گئی تھی تاکہ اس پر لکھے پیغام کی طرف توجہ دلائی جا سکے۔ اس طرح کی وڈیوز سوشل میڈیا پر شئر کی گئیں لیکن ان کو فوری طور پر بلاک کر دیا گیا۔ تاہم پرائیویٹ چیٹ گروپس سے چین کی سوشل میڈیا ایپلی کیشن ’ وی چیٹ‘ پر وڈیوز اور تصاویر شئر ہوتی رہیں۔ اور ایسا مواد ٹوئٹر پر بھی شئر کیا جاتا رہا جو چین میں بلاک ہے۔

نائیجیریا میں سیلابوں سے ہلاکتوں کی تعداد 600 سے تجاوز کر گئی : حکومت

نائیجیریا میں ایک دہائی کے بدترین سیلابوں کے بارے میں اتوار کو جاری نئے اعداد و شمار کے مطابق، اب تک 600 سےزیادہ لوگ افراد ہلاک ہو چکے ہیں۔

نائیجیریا کی وزارت برائے انسانی امور کی جانب سے ٹویٹر پر جاری ایک بیان میں کہا گیا ہے اس آفت کے نتیجے میں 1.3 ملین سے زیادہ لوگ کو اپنے گھر بار چھوڑ کر نقل مکانی پر مجبور ہو چکے ہیں۔

انسانی امور کی وزیر سعدیہ عمر فاروق نے کہا کہ ،بدقسمتی سے، آج 16 اکتوبر 2022 تک 603 سے زیادہ جانیں ضائع ہو چکی ہیں۔
وزیر نے کہا کہ گزشتہ ہفتے یہ تعداد 500 تھی، لیکن اس میں جزوی طور پر اس لیے اضافہ ہو ا کیونکہ کچھ ریاستی حکومتوں نے سیلاب کے لیے تیاری نہیں کی تھی۔

انہوں نے کہا کہ سیلاب سے 82,000 سے زیادہ مکانات اور تقریباً 110,000 ہیکٹر زرعی زمین بھی تباہ ہو چکی ہے۔

یوکرین کی جنگ نے چالیس لاکھ بچوں کو غربت میں دھکیل دیا ہے: اقوام متحدہ

بچوں کے امور سے متعلق اقوام متحدہ کے ادارے نے پیر کے رو ز کہا کہ یوکرین پر روس کے حملے اور اس کے نتیجے میں پیدا ہونے والے اقتصادی بحران کے باعث مشرقی یورپ اور وسطی ایشیا میں چالیس لاکھ بچے غربت کا شکار ہو چکے ہیں۔

یونیسیف نے یہ نتائج 22 ملکوں کے اعداد و شمار کے ایک مطالعاتی جائزے سے اخذ کئے ۔

فروری میں اپنے پڑوسی پر حملے کے بعد سے روسی او ر یوکرینی بچے سب سے زیادہ متاثر ہوئے ہیں۔

یونیسیف کو معلوم ہوا کہ یوکرین کی جنگ اور خطے بھر میں مہنگائی کی وجہ سے روس میں غربت کا شکار ہونے والے بچوں کی کل تعداد میں لگ بھگ تین چوتھائی اضافہ ہوا، جب کہ مزید 28 لاکھ بچے اس وقت غربت کی لکیر سے نچلی سطح کے حامل گھرانوں میں رہ رہےہیں۔

یورپ اور وسطی ایشیا کے لیے یونیسیف کی ریجنل ڈائریکٹر افشاں خان نے کہا کہ ،پورے خطے کے بچے اس جنگ کی خوفناک لپیٹ میں آ رہے ہیں۔

ان کا کہنا ہے کہ اگر ہم اس وقت ان بچوں اور خاندانوں کی مدد نہیں کرتے ، توبچوں کی غربت میں تیزی سے اضافے کا نتیجہ تقریباً یقینی طور پر زندگیوں ، تعلیم اور ان کے مستقبل کے زیاں کی صورت میں سامنے آئے گا۔