نیویارک کی اشرافیہ کو دھوکہ دینے والی اینا سوروکین جیل سے رہا
روسی نژاد اینا سوروکین، جن پر الزام تھا کہ انہوں نے جرمن جائیداد کی وارث ہونے کا دعویٰ کر کے نیویارک شہر کی اشرافیہ کو دھوکہ دیا اور اس الزام میں انہیں سزا بھی سنا دی گئی، اب انہیں وفاقی جیل سے رہا کیا جا رہا ہے۔
ایک امیگریشن جج نے بدھ کے روز انہیں رہا کرنے کا حکم دیا۔
اس حکم کے تحت انہیں 10 ہزار ڈالر کی ضمانت ادا کرنے اور الیکٹرانک نگرانی کے ساتھ 24 گھنٹے گھر میں قید رہنا ہوگا۔ انہیں انسٹاگرام، ٹویٹر، فیس بک اور ٹک ٹاک سمیت کسی بھی سوشل میڈیا پلیٹ فارم تک رسائی سے بھی روک دیا گیا ہے۔
31 سالہ اینا نیٹ فلکس کی سنسنی خیز سیریز "انوینٹنگ اینا" کی ریلیز کے بعد بین الاقوامی گفتگو کا موضوع بن گئی تھیں۔
اینا سوروکین، جو اپنا نام اینا ڈیلوی بتاتی ہیں، اپنے ویزا سے زائد قیام کے باعث 17 ماہ سے امریکی امیگریشن اور کسٹمز انفورسمنٹ کی تحویل میں تھیں۔
2019 میں انہیں 4 سے 12 سال قید کی سزا سنائی گئی تھی تاہم گزشتہ سال اچھے برتاؤ کی وجہ سے عدالت نے انہیں جلد رہا کرنے کا حکم دیا تھا۔
ایک کروڑ 15 لاکھ امریکیوں نے کووڈ۔19 ویکسین کا اپ ڈیٹڈ بوسٹر لگوا لیا
بیماریوں کے کنٹرول اور روک تھام کے مراکز نے جمعرات کو کہا کہ امریکہ میں تقریباً 3.9 ملین لوگوں کو گزشتہ ہفتے کے دوران کووڈ۔19 کے اپ ڈیٹڈ بوسٹر شاٹس لگے ہیں ۔
سی ڈی سی نے کہا کہ 5 اکتوبر تک، پہلے پانچ ہفتوں میں جب اپ ڈیٹڈ بوسٹرز دستیاب تھے،کل ایک کروڑ 15 لاکھ امریکی شاٹس لگوا چکے تھے ۔ جب کہ 28 ستمبر تک شاٹ لگوانے والوں کی تعداد76 لاکھ تھی ۔
ایک کروڑ 15 لاکھ کی تعداد 12 سال یا اس سے زیادہ عمر کے ان 21 کروڑ 55 لاکھ افراد میں سے صرف 5.3٪ کی نمائندگی کرتی ہے جو بوسٹر شاٹس لگوانے کے اہل ہیں کیونکہ انہوں نے اپنی بنیادی ویکسینیشن سیریز مکمل کر لی ہے۔
ایک غیر منافع بخش ادارے کائزر فیملی فاونڈیشن کے ایک سروے سے ظاہر ہوا کہ امریکہ میں لگ بھگ دو تہائی بالغ افراد اپ ڈیٹد کووڈ۔ 19 بوسٹرز جلد لگوانے کا ارادہ نہیں رکھتے۔
اوپیک پلس کا تیل کی یومیہ پیدوار میں 20لاکھ بیرل کمی کا فیصؒلہ، صدر بائیڈن کی مایوسی
امریکی صدر جو بائیڈن نے اوپیک پلس ملکوں کی جانب سے تیل کی پیدوار کے اہداف میں20 لاکھ بیرل یومیہ کمی کے ارادے پر مایوسی کا اظہار کیا لیکن کہا کہ امریکہ کے پاس متبادل ہیں اور وہ انہیں تلا ش کررہا ہے۔
بائیڈن نے وائٹ ہاؤس میں نامہ نگاروں کو بتا یا کہ ،" بہت سے متبادل ہیں ۔ ہم نےابھی تک اپنا ذہن نہیں بنایا ہے" انہوں نے اس بارے میں وضاحت نہیں کی ۔
23ملکوں کے اتحاد ،اوپیک پلس نے کہا ہے کہ تیل کی پیداوار کو 43 اعشاریہ 8 ملین بیرل سے کم کر کے 41 اعشاریہ 8 ملین بیرل یومیہ کر دیا جائے گا اور اس پر نومبر سے عمل درآمد ہو گا۔ مارچ 2020 میں کرونا وائرس کے آغاز سے یہ پہلا موقع ہے کہ اوپیک نے تیل کی پیداوار کے اہدا ف میں کمی کی ہے ، اگرچہ تیل پیدا کرنے والے ملکوں کا اتحاد اس سال تین ملین بیرل کے اپنے اہداف سے کم تیل پیدا کر رہا تھا۔
بائیڈن: اس وقت عالمی جنگ کا خطرہ سب سے زیاد ہ ہے
ایسے میں کہ جب یوکرین میں روسی نقصانات پر روسی عہدے دار وں کو حکمت عملی سے متعلق جوہری ہتھیاروں کے استعمال پر بات کرنا پڑی ، صدر جو بائیڈن نے جمعرات کی شب کہا کہ عالمی جنگ کا خطرہ 1960 کی دہائی کے اوائل کے بعد سے اب سب سے زیادہ ہے۔
صدر نے نیو یارک میں ڈیمو کریٹک سینیٹرز کی انتخابی مہم کی کمیٹی کے لیے ایک فنڈ ریزنگ تقریب میں کہا کہ،"ہمیں کینیڈی اور کیوبا کے میزائل بحران کے بعد سے عالمی جنگ کے امکانات کا سامنا نہیں ہوا ہے،" ۔
اکتوبر 1962 میں امریکہ اور سوویت یونین اس وقت بظاہر جوہری تنازعے کے دہانے پر تھے جب امریکہ کی جانب سے ترکی اور اٹلی میں بیلسٹک میزائلوں کی تعیناتی کے جواب سوویت یونین نے کیوبا میں اسی طرح کے میزائل نصب کر دیے تھے۔
صدر نے کہا کہ میں روس کے صدر ولادیمیر پوٹن کو اچھی طرح جانتا ہوں جب وہ "جوہری یا حیاتیاتی یا کیمیاوئی ہتھیاروں" کے استعمال کی بات کرتے ہیں تو وہ مذاق نہیں کر رہے ہیں۔