اوپیک پلس تیل کی پیداوار میں کٹوتی کر سکتا ہے
اوپیک پلس بدھ کو اپنے اجلاس میں تیل کی پیداوار میں بڑی کٹوتیوں کے لیے تیار نظر آتا ہے، جس سے ریاست ہائے متحدہ امریکہ اور تیل استعمال کرنے والے دوسرے ملکوں کی جانب سے مزید تیل نکالنے پر دباؤ کے باوجود پہلے سے ہی دباؤ کی شکار مارکیٹ میں سپلائی میں کمی واقع ہوگی۔
اوپیک پلس کی جانب سے پیداوار میں کمی سے تیل کی قیمت پر دباؤ پڑ سکتا ہے جو کہ عالمی اقتصادی کساد بازاری، امریکی شرح سود میں اضافے اور مضبوط ڈالر کے خوف کی وجہ سے تین ماہ قبل 120 ڈالر سے کم ہو کر تقریباً 90 ڈالر پر آ گئی ہے۔
ذرائع نے اس ہفتے رائٹرز کو بتایا کہ اوپیک +، جس میں سعودی عرب اور روس شامل ہیں، روزانہ ایک ملین بیرل سے زیادہ کی کمی پر کام کر رہا ہے۔ اوپیک کے ایک ذریعہ نے منگل کو کہا کہ یہ کمی مقدار 2 ملین بیرل یومیہ تک ہوسکتی ہے۔
قیمتوں میں اضافےکی ایک وجہ روس کی یوکرین کے خلاف جنگ ہے ۔
پوٹن نے چار یوکرینی علاقوں کے روس سے الحاق کے قانون پر دستخط کر دیے
روس کے صدر ولادی میر پوٹن نےیوکرین کے علاقوں کو روس میں ضم کرنےسےمتعلق قوانین پر دستخط کر دئے ہیں۔
یہ ایک ایسا اقدام ہے جو بین الاقوامی قانون کی خلاف ورزی کرتے ہوئے الحاق کو حتمی شکل دیتا ہے ۔
اس ہفتے کے شروع میں، روسی پارلیمنٹ کے دونوں ایوانوں نے ڈونیٹسک، لوہانسک، کھیرسن اور زاپورژیا کے علاقوں کو روس کا حصہ بنانے کے معاہدوں کی توثیق کی۔
یہ رسمی کارروائیاں کریملن کی طرف سے چار خطوں میں اس "ریفرنڈم" کے بعد ہوئیں جنہیں یوکرین اور مغرب نے ایک دھوکا قرار دے کر مسترد کر دیا ہے۔
فلوریڈا: صدر بائیڈن کا سمندری طوفان ایان سے متاثرہ علاقوں کا دورہ
امریکی صدر جو بائیڈن اور خاتون اول جل بائیڈن نے بدھ کے روز فورٹ مائرز، فلوریڈا کا دورہ کیا اور صدارتی ہیلی کاپٹر میرین ون میں سمندری طوفان ایان سے ہونے والے نقصانات کا فضائی جائزہ لیا اور مہلک، طاقتور طوفان سے متاثر ہونے والے حکام، رہائشیوں اور کاروباری مالکان سے ملاقات کی ۔
ایان سے امریکی ہلاکتوں کی تعداد کم از کم 109 ہو گئی ہے،جن میں سے 105 اموات فلوریڈا اور باقی شمالی کیرولائنا میں ہوئیں۔ فلوریڈا کی لی کاؤنٹی میں 50 سے زیادہ اموات کی اطلاع ملی ہے۔
بائیڈن نے بحالی کی کوششوں پر گفتگو کےلیے ریاستی اور مقامی رہنماؤں سے ملاقات کی جن میں ری پبلکن گورنر ران ڈیسینٹس اور سینیٹر مارکو روبیو اور رک اسکاٹ شامل ہیں۔
انہوں نےکہاکہ فلوریڈا کےلوگ سانحے کی انشورنس کے بغیر اپنے گھروں اور گاڑیوں کی مرمت یا تبدیلی کے یئےوفاقی فنڈز سے 80 ہزار ڈالر تک کے اہل ہوں گے۔ انہوں نے کہا کہ میں فلوریڈا کے لوگوں کو بتانا چاہتا ہوں کہ آپ جان لیں کہ میر ا آپ سے اور امریکہ کے ساتھ وعدہ ہےکہ ہم آپ کا ساتھ نہیں چھوڑیں گے ۔ ہم پورے پراسس میں آپ کو دیکھیں گے"۔
ایان 28 ستمبر کو زیادہ سےزیادہ 240 کلومیٹر فی گھنٹہ کی رفتار کی ہواوں کے ساتھ کیٹیگری چار کے خطرناک طوفان کےطور پر فلوریڈا سے ٹکرایا تھا اور ریاست بھر کے بیس لاکھ لوگوں کو بجلی سےمحروم کر دیا۔ یوٹیلیٹی کمپنیوں کے عہدےداروں کا کہنا ہے کہ وہ اپنے کم از کم 95 فیصد صارفین کےلیےممکنہ طور پر جمعےیا ہفتے کو بجلی بحال کر سکیں گے۔ تباہ شدہ گھروں اور عمارتوں سے1500متاثرین کو بچایا جا چکا ہے۔
یونان: سمندر میں کشتی ڈوبنے سے کم ازکم 16 تارکین وطن ہلاک
یونان کے پانیوں میں دو الگ الگ واقعات میں دو کشتیوں کےڈوب جانےسے کم از کم 16 تارکین وطن ہلاک ہو گئے ہیں اور امدادی کارکن ابھی تک درجنوں لا پتہ افراد کو تلاش کر رہےہیں۔
ایسو سی ایٹڈ پریس کے مطابق یونان کے ساحلی محافظوں کا کہنا ہے کہ بدھ کے روز مشرقی جزیرے لیسبوس کے قریب ایک کشتی کے ڈوبنےکےبعد جس پر 40 مسافر سوار تھے 16 نعشیں نکالی کی جا چکی ہیں جو سب کی سب نوجوان افریقی عورتیں ہیں۔
ایسوسی ایٹڈ پریس کے مطابق ساحلی محافظوں نے پانچ افراد کوزندہ بچا لیا۔
رات کے وقت کئی سو کلومیٹر دور کیتھیرا جزیرے کے قریب ایک اور امدادی کوشش شروع کی گئی، جہاں تقریباً 100 تارکین وطن کو لے جانے والی ایک بادبانی کشتی چٹانوں سے ٹکرانے ے بعد ڈوب گئی تھی۔