افغان طالبان کا روس کے ساتھ تیل، گیس اور گندم خریدنے کا معاہدہ
طالبان نے روس کے ساتھ ایک عبوری معاہدہ کیا ہے جس کے تحت روس، افغانستان کو تیل، ڈیزل، گیس اور گندم فراہم کرے گا۔
خبر رساں ادارے رائیٹرز سے بات کرتے ہوئے طالبان کے قائم مقام وزیر تجارت و صنعت حاجی نورالدین عزیزی نے کہا کہ ان کی وزارت اپنے تجارتی پارٹنرز میں تنوع پیداکرنا چاہتی ہے۔ ان کا یہ بھی کہنا تھا کہ روس نے ان کی حکومت کو کم قیمت پر تیل دینے کی پیشکش کی تھی۔
رائیٹرز کے مطابق طالبان کے اگست 2021 میں اقتدار میں لوٹنے کے بعد یہ پہلا موقع ہے کہ ان کی حکومت نے کوئی اہم بین الاقوامی اقتصادی معاہدہ کیا ہے۔
ابھی تک طالبان کی حکومت کو ، روس سمیت کسی بھی ملک نے باضابطہ طور پر تسلیم نہیں کیا ہے تاہم روس ان معدودے چند ملکوں میں شامل ہے جن کے سفارت خانے اب تک کابل میں کھلے ہوئے ہیں۔
عزیزی کا کہنا تھا کہ اس معاہدے کے تحت روس افغانستان کو سالانہ دس لاکھ ٹن تیل ، پانچ لاکھ ٹن ایل پی جی, دس لاکھ ٹن ڈیزل اور بیس لاکھ ٹن گندم فراہم کرے گا۔
رائیٹرز کے مطابق روس کی توانائی اور زراعت کی وزارتوں کی جانب اس خبر پر تبصرے کی درخواست پر فوری طور پر کوئی ردعمل نہیں دیا گیا۔
نورالدین عزیزی کا کہنا ہے کہ اس معاہدے پر فریقین غیر معینہ مدت تک آزمائشی طور پر عمل درآمد کریں گے جس کے بعد فریقین کے انتظامات سے مطمئن ہونے کی صورت میں ایک طویل مدت کے معاہدے پر دستخط متوقع ہیں۔
انہوں نے اس سلسلے میں نرخوں اور ادائیگی کے طریقے کار کی تفصیلات بتانے سے انکار کر دیا۔ ان کا کہنا تھا کہ روس نے یہ اشیا عالمی منڈی سے کم قیمت پر دینے پر رضامندی ظاہر کی ہے۔
یہ معاہدہ طالبان کی ایک تکنیکی ٹیم کے ماسکو میں کئی ہفتے گزارنے کے بعد کیا گیا ہے۔ اس سے پہلے عزیزی نے بھی ماسکو کا دورہ کیا تھا۔
ایران میں مظاہرین کے خلاف کریک ڈاؤن پر انسانی حقوق کے عالمی ادارے کی مذمت
اقوام متحدہ کےانسانی حقوق سے متعلق عہدے داروں نے ایران کے لباس سے متعلق سخت کوڈ کی تعمیل کرنے میں ناکامی کے الزام میں ایک نوجوان خاتون کی ہلاکت پر مشتعل مظاہرین کے خلاف ایرانی سیکورٹی فورسز کے پرتشدد کریک ڈاؤن کی مذمت کی ہے۔
پولیس کی حراست میں 22 سالہ مہسا امینی کی ہلاکت کے بعد ایران کے 15 صوبوں میں مظاہرے شروع ہو گئے ہیں ۔ مہسا امینی کو 13 ستمبر کو نام نہاد اخلاقیات پولیس نے مبینہ طور پر حجاب صحیح طریقے سے نہ پہننے پر گرفتار کیا تھا۔
اقوام متحدہ کے انسانی حقوق کے دفتر کا کہنا ہے کہ ایران کی سیکیورٹی فورس کے ہاتھوں ہلاک، زخمی اور گرفتار ہونے والے مظاہرین کی صحیح تعداد کا پتا لگانا مشکل ہے۔ اس کی وجہ ٹیلی کمیونیکیشن پر پابندیاں ہیں۔ سرکاری میڈیا نے ہلاکتوں کی تعداد 41 بتائی ہے۔
تاہم، اقوام متحدہ کی انسانی حقوق کی ترجمان روینہ شامداسانی نے کہا ہے کہ صورت حال پر نظر رکھنے والی غیر سرکاری تنظیموں نے ہلاکتوں کی تعداد اس سے زیادہ بتائی ہے۔
انہوں نے کہا کہ ایک مستند ذریعے نے خبر دی ہے کہ خواتین اور بچوں سمیت 76 افراد ہلاک ہوئے ہیں جب کہ کم از کم 11 صوبوں میں سینکڑوں لوگ زخمی ہوئے ہیں۔
امریکہ کمپیوٹر چپ پراجیکٹ میں جاپان کے تعاون کا خواہاں
امریکی نائب صدر کاملا ہیرس نے بدھ کےروز ٹوکیو میں ٹیکنالوجی کے شعبے کے اعلیٰ جاپانی عہدے داروں کے ساتھ اجلاس میں انہیں کمپیوٹر چپ بنانے کے لیے امریکی تعاون کےمنصوبوں اور اس کے فروغ سے متعلق ایک نئے قانون سے آگاہ کیا ۔
ٹوکیو میں اپنے قیام کے آخری دن ٹیک کمپنیوں کے عہدے داروں سے کاملا ہیرس کی ملاقات سیمی کنڈکٹر چپ بنانے اور اہم مواد کے لیے سپلائی چین کی توسیع پر انتظامیہ کی توجہ مرکوز ہونے کی عکاسی کرتی ہے ۔
اس کے ساتھ ساتھ جاپان اپنی کمپیوٹر چپ انڈسٹری کو بحال کرنے کی کوشش کر رہا ہے جس سے نئی شراکت داریوں کے مواقع پیدا ہو سکتےہیں کیوں کہ اتحادی ممالک چین کی ٹیکنالوجی کے اپنے شعبے میں سرمایہ کاری کا مقابلہ کرنے کے مل کر کام کر رہے ہیں۔
ایسو سی ایٹڈ پریس کے مطابق ہیرس نے امریکی سفیر کی رہائش گاہ پر ایک میٹنگ کے دوران کہا کہ امریکہ جانتا ہے کہ کوئی ملک اس سلسلے میں عالمی مانگ کو پورا نہیں کر سکتا اور یہ بات اہم ہے کہ ہم اور ہمارے اتحادی شراکت دار اس طریقے سے تعاون کریں جس سے ہم اس شعبے میں آگے بڑھ سکیں اور ایک بہت عملی سطح پر کام کر سکیں ۔
یوکرین اور قدرتی آفات سے متاثرہ کمیونیٹیز کی مدد کا بل امریکی کانگریس میں پیش
امریکی ڈیمو کریٹک قانون سازوں نے اخراجات کاایک بل پیش کیا ہے تاکہ وفاقی حکومت 16 دسمبر تک یوکرین کو اضافی مدد اور حالیہ قدرتی آفات سے متاثرہ کمیونٹیز کو مدد فراہم کرسکے ۔
کانگریس کے دونوں ایوانوں سے، جمعے تک اس بل کی منظوری لازمی ہے ، جو اس مالی سال کا اختتامی دن ہے، تاکہ ایک جزوی حکومتی بندش کو روکا جا سکے ۔
یہ بل یوکرین سے منسلک تربیت، آلات ، ہتھیار اور براہ راست مالی امداد سمیت ، معاونت کے لیے تقریباًً 12 اعشاریہ تین ار ب ڈالر فراہم کرتا ہے ۔
یہ معاونت ان 53 ارب ڈالر کے علاوہ ہو گی جس کی کانگریس پہلے ہی دو بلوں کےذریعے منظوری دے چکی ہے ۔
اس بل میں سےی کووڈ۔ 19 سے نمٹنے کے لیے 22 ارب ڈالر اور مونکی پوسک وائرس کی وبا کے مقابلےکے لئے تین اعشاریہ نو ارب ڈالر کے وائٹ ہاوس کے مطالبے کو خارج کر دیاگیا ہے ۔
یوکرین کی امداد میں اضافے کو دونوں جماعتوں کی طرف سے بہت زیادہ حمایت حاصل رہی ہے ۔ اس بل میں یوکرین کی حکومت کو شہریوں کی بنیادی سہولیات کی فراہمی کے لیے چار اعشاریہ پانچ ارب ڈالر اور صدر کو یوکرین کی مسلح فورسز کی مدد کے لیے ا تین اعشاریہ سات ارب ڈالر کی مالیت کا سامان حاصل کرنے کا اختیار شامل ہے ۔