بائیڈن کی برطانوی وزیر اعظم ٹرس سے ملاقات، عالمی مسائل کے لیے مل کر کام کرنے کا عہد

صدر جو بائیڈن نے نیو یارک میں اقوام متحدہ کی جنرل اسمبلی کے موقع پر، برطانیہ کو دنیا میں اپنا قریبی اتحادی قرار دیتے ہوئے ، اور یوکرین کے تنازعے سے نمٹنے سے لے کر شمالی آئر لینڈ میں امن برقرار رکھنے تک کے مسائل پر مل کر کام کرنے کا عہد کرتے ہوئے،اپنی برطانوی وزیر اعظم کے ساتھ پہلی بار بدھ کے روز الگ سے ملاقات کی۔

بائیڈن نے ملاقات سے قبل کہا ، " عالمی اثرات سے متعلق ایسا کوئی مسئلہ نہیں ہے جس کے بارے میں یہ سوچ سکوں کہ ان پر امریکہ اور برطانیہ تعاون کے ساتھ کام نہیں کر رہے ۔ اور مجھے توقع ہے کہ ہم ایسا کرنا جاری رکھ سکیں گے۔ اور ہمارے پاس آج ایک پورا ایجنڈا ہے جس میں یوکرین کو روس کے خلاف اپنے دفاع کے لیے مدد سے لے کر ، پوٹن کے چیلنج ، چین کے ساتھ معاملات اور ایران کو جوہری ہتھیاروں کے حصول سے روکنے تک کے موضوعات شامل ہیں ۔"

ٹرس نے بھی کہا کہ ان کا ملک یوکرین پر روس کے حملے سے لاحق چیلنجوں سے نمٹنے کے لیے دفاعی اخراجات میں اضافہ کرے گا۔

ان کا کہنا تھا کہ یہی وجہ ہے کہ ہم امریکہ کے ساتھ مزید قریبی طور پر کام کرنا چاہتے ہیں، خاص طور پر توانائی کے تحفظ پر، اپنی اقتصادی سلامتی پر، بلکہ دنیا بھر کی ساتھی جمہوریتوں تک پہنچنے کے لیے بھی تاکہ اس بات کو یقینی بنایا جا سکے کہ جمہوریتیں غالب رہیں ، اور ہم آزادی اور اپنے شہریوں کے مستقبل کی حفاظت کریں"۔

نیویارک میں سابق صدر ٹرمپ اور ان کی کمپنی کے خلاف مقدمہ دائر

نیویارک کے اٹارنی جنرل نے سابق صدر ڈونلڈ ٹرمپ اور ان کی کمپنی کے خلاف مقدمہ دائر کیا ہے، جس میں ان کی مین ہٹن، شکاگو اور واشنگٹن کی جائیدادوں سمیت کچھ انتہائی قیمتی اثاثوں میں کاروباری فراڈ کا الزام لگایا گیا ہے۔

ڈی سی کے اٹارنی جنرل لیٹیا جیمز کا مقدمہ بدھ کو نیویارک کی ریاستی عدالت میں دائر کیا گیا۔

ایسو سی ایٹڈ پریس کے مطابق یہ ٹرمپ اور ٹرمپ آرگنائزیشن کے بارے میں ڈیموکریٹ کی تین سالہ سول تحقیقات کا خاتمہ ہے۔

ٹرمپ کے تین بالغ بچوں، ڈونالڈ جونیئر، ایوانکا اور ایرک ٹرمپ کو بھی مدعا علیہ کے طور پر نامزد کیا گیا تھا، ان کے ساتھ کمپنی کے دو دیرینہ ایگزیکٹیو ایلن ویسلبرگ اور جیفری میک کونی بھی شامل تھے۔

ٹرمپ کی وکیل علینہ حبہ نے کہا کہ مقدمہ نہ تو حقائق پر اور نہ ہی قانون پر مرکوز ہے ۔

نائیجیریا میں اسکول کا نیا سال ستمبر میں شروع ہوا تھا ، تاہم حکام کے مطابق شمالی نائیجیریا میں چھ سو سےزیادہ ا سکول سیکیورٹی کے خدشات کے باعث بند پڑے ہیں۔ حکام کے مطابق اِس کی وجہ مسلح گینگز کی جانب سے اغوا اور تاوان کی بڑھتی ہوئی وارداتیں ہیں ۔

اقوام متحدہ کے تعلیم، سائنس اور ثقافت کے ادارے یونیسکو کے مطابق، نائیجیریا کے دو کروڑ سے زیادہ بچےاسکول نہیں جاتے۔ یہ تعداد اِس سال مئی کے اعداد وشمار سے بیس لاکھ زیادہ ہے ۔

تاہم نائیجیریاکے حکام اس تعداد سے متفق نہیں۔ وہ کہتے ہیں کہ صورت حال بہتر ہوچکی ہے اور حکومت تعلیم پر زیادہ خرچ کر رہی ہے۔ حکام کا یہ بھی کہنا ہے کہ یونیسکو کے اعداد و شمارمیں وہ بچے شامل نہیں کیے گئے ،جو شمالی نائیجیریا کے غیر روایتی اسکولوں میں زیر تعلیم ہیں ۔

نائیجیریا میں یونیسکو کی "ریڈ اینڈ اَرن"فیڈریشن کے سربراہ، عبدالسلامی نے وائس آف امریکہ کو بتایا کہ ا سکول نہ جانے والے بچوں کی اس بلند شرح کے ذمے دارکئی پیچیدہ عوامل ہو سکتے ہیں، جیسےعسکریت پسندی، اسکولز میں اُن کی ٹیوشن کی ادائیگی کے ذمے دار والدین یا سرپرست کی موت یا بچیوں کے لیے ایک اہم وجہ اُن کی کم عمری کی شادیاں۔

نائیجیریا میں ایسے بچوں کی شرح پہلے ہی دنیا کی بلند ترین شرح میں سے ایک ہے جو اسکول نہیں جاتے تھے ۔ اقوام متحدہ کے مطابق اب صورت حال مزید خراب ہوگئی ہے ۔

سعودی عرب کی وزارت خارجہ کے مطابق روس نے بدھ کے روز سعودی ولی عہد محمد بن سلمان کی ثالثی کے بعد یوکرین میں پکڑے گئے 10 غیر ملکی جنگی قیدیوں کو رہا کر دیا۔

وزارت کے بیان میں کہا گیا کہ متعلقہ سعودی حکام نے ایک طیارے کے ذریعے اِن قیدیوں کو روس سے سعودی عرب میں منتقل کیا اور اب اُنہیں اُن کے ملکوں میں واپس بھیجنے کے لیے سہولت فراہم کر رہے ہیں۔

وزارت نے اِن قیدیوں کی شناخت نہیں کی، تاہم ایک سعودی اہلکار نے بتایا کہ اِن میں 5 برطانوی، 2 امریکی، 1 کروشین، 1 مراکشی اور 1 سویڈش شہری ہے۔

برطانوی وزیر اعظم لز ٹرس نے ٹویٹر پر برطانوی شہریوں کی رہائی کو مہینوں کی غیر یقینی صورت حال اور مصائب کے بعد ’’انتہائی خوش آئند خبر‘‘ قرار دیا۔

خبر رساں ادارے رائٹرز کے مطابق روس نے امریکی شہریوں 39 سالہ الیگزینڈر ڈروک اور 27 سالہ اینڈی ہیون کو بھی رہا کیا۔

بڑی تعداد میں غیر ملکی، روس کے حملے کے خلاف مزاحمت کرنے والے یوکرینی فوجیوں کی حمایت کے لیے وہاں جاتے ہیں، اِن میں سے کچھ کو روسی افواج نے ملک میں موجود دیگر غیر ملکیوں کے ساتھ پکڑا ہے، جن کا کہنا ہے کہ وہ جنگجو نہیں تھے۔