امریکہ تانیوان کی آزادی کے حامیوں کو غلط اشارے نہ بھیجے، چین

صدر جو بائیڈن کی انتظامیہ مسلسل زور دے رہی ہے کہ تائیوان کے لیے امریکی پالیسی میں کوئی تبدیلی نہیں آئی ہے ۔ امریکی صدر اور اعلیٰ عہدے دار متعدد بار یہ کہہ چکے ہیں کہ امریکہ تائیوان پر چین کے حملے کی صورت میں اس کا دفاع کرے گا۔بہت سوں کے لیے ان یقین دہانیوں کو قبول کرنا مشکل ہو رہا ہے ۔

اتوار کے رات سی بی ایس نیوز کے پروگرام " 60 منٹس" میں بائیڈن نے 2021 میں عہدہ سنبھالنے کے بعد سے چوتھی بار کہا کہ چین کی جانب سے تائیوان پر طاقت کے ذریعے اسے اپنے قبضے میں لینے کی کسی کوشش پر امریکہ فوجی رد عمل ظاہر کرے گا۔

چینی وزات خانہ کے ترجمان ماؤ ننگ نے کہا کہ چین اس(بیان) کی سختی سے مذمت کرتا ہے اور اسے مسترد کرتا ہے ۔ ترجمان نے کہا کہ بیجنگ نے امریکہ سے اس معاملے پر شدید شکایت کی ہے۔

چینی وزارت کے ترجمان ماؤ نے امریکی بیان کے ردعمل میں واشنگٹن سے مطالبہ کیا کہ وہ تائیوان سے متعلقہ مسائل سے سمجھداری سے نمٹے اور تائیوان کی آزادی کے حامیوں کو "کوئی غلط اشارے نہ بھیجے" تاکہ چین-امریکہ تعلقات اور آبنائے تائیوان میں امن و استحکام کو مزید نقصان سے بچا جاسکے۔

یوکرین روسی فوج سے چھینے ہوئے ٹٰینک روس کے خلاف استعمال کر رہا ہے

واشنگٹن میں قائم انسٹی ٹیوٹ فار دی اسٹڈی آف وار کے مطابق، یوکرین اب قبضے میں لیے گئے روسی ٹینکوں کو شمال مشرق میں روس کے خلاف جاری ایک کارروائی میں بھیج رہا ہے ۔

انسٹی ٹیوٹ نے ایک روسی دعوے کا حوالہ دیتے ہوئے کہا ہے کہ یوکرین روسی زیر قبضہ علاقے لوہانسک میں داخل ہونے کی اپنی کوشش کے دوران روس کی جانب سے پیچھے چھوڑ دیے جانے والے 72 ٹینک استعمال کر رہا ہے ۔

اس ماہ کے شروع میں، یوکرین نے اپنے دوسرے سب سے بڑے شہر خارکیف کے مضافات میں داخل ہونے کے ساتھ اپنی جوابی کارروائی شروع کی تھی ۔

ویڈیوز اور تصاویر میں دکھایا گیا ہے کہ یوکرین کے فوجی ٹینکوں، گولہ بارود اور دوسرے ہتھیاروں پر قبضہ کر رہے ہیں جو ماسکو نے پسپا ہوتے ہوئے بظاہر افراتفری میں پیچھے چھوڑ دیے تھے۔

نیویارک: وزیرخارجہ بلاول بھٹو زرداری کی سربراہی میں ہونے والی نوجوان وزرائے خارجہ کی کانفرنس میں عالمی برادری کے مسائل اور ان کے حل پر بات چیت کی گئی۔

کانفرنس میں کینیڈا، چیک ری پبلک، ہنگری، قطر اور سربیا سمیت مختلف ممالک کے نوجوان وزرائے خارجہ نے شرکت کی۔

وزیر مملکت برائے امور خارجہ حنا ربانی کھر نے بھی نوجوان وزرائے خارجہ کی کانفرنس میں شرکت کی۔

وزیر خارجہ بلاول بھٹو زرداری نے دنیا کے نوجوان وزرائے خارجہ سے خطاب میں کہا کہ ’’ہمیں نہ صرف امن اور ترقی کے حوالے سے چیلنجز سے نمٹنا ہوگا بلکہ مستقبل کی نسلوں کے لئے مساوی معاشی حقوق کی بھی جدوجہد کرنا ہوگی۔‘‘

انہوں نے اپنے خطاب میں مزید کہا ’’آپ سب دنیا کے نوجوان وزرائے خارجہ ہیں اور آپ عالمی برادری کے ایک دوسرے سے تعاون کے حوالے سے اہم ترین کردار ادا کرسکتے ہیں۔‘‘

بلاول کا کہنا تھا کہ دنیا کے نوجوان وزرائے خارجہ کی ایک دوسرے سے ملاقات کا مقصد دنیا کے مستقبل کے لئے ایک لائحہ عمل تشکیل دینا ہے۔

اس موقع پر بلاول بھٹو زرداری کے ہم منصبوں نے ان کے دنیا کے مختلف نوجوان وزرائے خارجہ کو اکھٹا کرنے کے اقدام کو سراہا اور انہوں نے وزیرخارجہ بلاول بھٹو زرداری کا ساتھ دینے کا عزم کیا۔

آسٹریلیا کے ساحل پر 230 وہیلز پھنس گئیں، بچانے کی کوششیں جاری

آسٹریلیا کے ایک جزیرے تسمانیہ کے مغربی ساحل پر تقریباً 230 وہیل مچھلیاں پھنسی ہوئی ہیں جب کہ دو دن پہلے بھی 14 سپرم وہیلز ایک اور قریبی جزیرے کے ساحل پر پھنس گئی تھیں۔

یہاں کے ساحلی تفریحی علاقے اوشن بیچ پر وہیلز کی ایک اور قسم پائلٹ وہیلز کو پھنسا ہوا دیکھا گیا ہے۔

ایسو سی ایٹڈ پریس کے مطابق تسمانیہ کے قدرتی وسائل اور ماحولیات کے ڈپارٹمنٹ نے بدھ کو کہا کہ ان میں سے کم از کم نصف وہیلز کے بارے میں خیال ہے کہ وہ اب بھی زندہ ہیں۔ محکمے کا کہنا ہےکہ وہیلز کو بچانے کے لیے ایک امدادی ٹیم کو روانہ کر دیا گیا ہے۔

دو سال قبل لمبے پنکھ والی لگ بھگ 470 پائلٹ وہیلز تسمانیہ کے مغربی ساحل پر پھنسں گئیں تھیں جو آسٹریلیا کے ساھلوں پر پھنس جانے کےحوالے سے ایک ریکارڈ تعداد تھی۔ انہیں بچانے کی کوششیں ہفتہ بھر جاری رہی تھیں، لیکن ان میں سے صرف 111 وہیلز کو ہی زندہ بچایا جا سکا تھا۔