چین میں زلزلے سے 74 افراد ہلاک، 26 لاپتا
چین کے مغربی حصے میں آنے والے زلزلے میں ہلاکتوں کی تعداد 74 ہو گئی ہے جب کہ 26 افراد ابھی تک لاپتہ ہیں۔ اس کے ساتھ ساتھ کویڈ 19لاک ڈاؤن کے غیر مفاہمتی اقدامات سے مایوسی بڑھ رہی ہے جس نے صوبہ سیچوان میں پیر کے 6.8 شدت کے زلزلے کے بعد رہائشیوں کو اپنی عمارتیں چھوڑنے سے روک دیا۔
زلزلے نے تبتی خود مختار علاقے گانزے میں گھروں کو بڑے پیمانے پر نقصان پہنچایا اور چینگڈو کے صوبائی دارالحکومت میں عمارتوں کو ہلا کر رکھ دیا، جس کے 21 ملین شہری کویڈ 19 کے سخت لاک ڈاؤن کے تحت ہیں۔
حکام نے اپارٹمنٹ عمارتوں کے پریشان رہائشیوں کو باہر جانے کی اجازت دینے سے انکار کر دیا، جس سے لاک ڈاؤن، قرنطینہ اور دیگر پابندیوں کو لازمی قرار دینے والی صفر- کویڈ پالیسی پر عوام کے غصے میں اضافہ ہوا، جب کہ باقی دنیا بڑے پیمانے پر دوبارہ کھل گئی ہے۔
ایران جوہری بم بنانے کی قریب پہنچ گیا
جوہری توانائی کے بین االاقوامی ادارے کی بدھ کے روز جاری ایک رپورٹ میں کہا گیا ہے کہ ایران کا افزودہ یورینیم کا ذخیرہ اس درجے کے قریب پہنچ رہا ہے جہاں مزید افزودگی ایک جوہری بم بنانے کے لیے کافی ہو سکتی ہے۔
اس نے یہ بھی کہا ہے کہ تہران تین غیر اعلان شدہ مقامات پر پائے جانے والے یورینیم کے ذرات کی اصلیت کے بارے میں قابل اعتماد جواب دینے میں ناکام رہا ہے جن کی اقوام متحدہ کا جوہری نگراں ادارہ برسوں سے تحقیقات کر رہا ہے۔
رپورٹ میں کہا گیا ہے کہ اس کا مطلب یہ ہے کہ آئی اے ای اے یہ یقینی دہانی فراہم کرنے کی پوزیشن میں نہیں ہے کہ ایران کا جوہری پروگرام صرف پر امن مقاصد کے لئے ہے۔
عراق کی اعلیٰ عدالت کا کہنا ہے کہ وہ بحران کے دوران پارلیمنٹ کو تحلیل نہیں کر سکتی
عراق کی اعلیٰ ترین عدالت نے بدھ کو فیصلہ سنایا کہ اسے پارلیمنٹ کو تحلیل کرنے کا قانونی حق حاصل نہیں ہے۔ سپریم فیڈرل کورٹ کے فیصلے میں کہا گیا ہے کہ عدالت کو عراق کے آئین کے تحت مقننہ کو تحلیل کرنے کا اختیار حاصل نہیں ہے جو کہ بااثر شیعہ عالم مقتدیٰ الصدر کا ایک اہم مطالبہ تھا۔
الصدر کے اتحاد نے گزشتہ اکتوبر میں ہونے والے پارلیمانی انتخابات میں سب سے زیادہ ووٹ حاصل کیے تھے لیکن وہ اکثریتی حکومت بنانے میں ناکام رہے ہیں۔ ان کے پیروکاروں نے جولائی کے آخر میں پارلیمنٹ پر دھاوا بول دیا تاکہ ایران کے حمایت یافتہ شیعہ گروپوں کے اپنے حریفوں کو حکومت بنانے سے روکا جا سکے۔
اس فیصلے کے بعد، عراقی سیکورٹی فورسز نے بغداد میں سخت قلعہ بند گرین زون کے دروازے بند کر دیے - جو حکومت کی نشست اور عراق کے سیاسی بحران کا مرکز ہے –فیصلے کے نتیجے میں ہونے والی ریلیوں، سیکیورٹی فورسز کے ساتھ جھڑپوں، جوابی ریلیوں اور پارلیمنٹ کے باہر ایک دھرنے سے حکومت سازی کا عمل تعطل کا شکا رہو گیا ہے۔ الصدر کے پیروکاروں کی جانب سے ردعمل کی توقع ہے۔
روس یوکرین میں انسانی حقوق کی پامالی کر رہا ہے
انسانی حقوق سے متعلق اقوام متحدہ کی ایک سینئر اہلکار نے بدھ کو کہا کہ ان کے دفتر نے تصدیق کی ہے کہ روسی فوجی اور اس سے منسلک گروپ یوکرینی شہریوں کو "فلٹریشن" نامی جارحانہ عمل کا نشانہ بناتے ہیں اور انہوں نے روس کے زیر حراست افراد تک رسائی کا مطالبہ کیا ۔
اسسٹنٹ سیکرٹری جنرل برائے انسانی حقوق، ایلز برانڈز کیہرس نے اقوام متحدہ کی سلامتی کونسل کو بتایا کہا کہ "ایسے معاملات میں جو ہمارے دفتر نے دستاویزی طور پر بیان کِیے ہیں ، دیکھا گیا ہے کہ 'فلٹریشن' کے دوران ، روسی مسلح افواج اور اس سے منسلک مسلح گروہوں نے لوگوں کی جامہ تلاشی لی ، جس میں کبھی کبھی جبری عریانیت ، اور ذاتی پس منظر، خاندانی تعلقات، سیاسی نظریات اور وفاداریوں کے بارے میں تفصیلی پوچھ گچھ شامل تھی ۔
انہوں نے کہا کہ روسی فلٹریشن کا نشانہ بننے والے تمام افراد تک اقوام متحدہ اور انسانی ہمدردی کے اداروں کی رسائی ہونی چاہئے تاکہ ان کی خیر و عافیت کی تصدیق کی جا سکے ۔