برطانیہ: لز ٹرس نے وزیر اعظم کا عہدہ سنبھال لیا
لز ٹرس، بورس جانسن کی جگہ منگل کے روز سرکاری طور پر برطانیہ کی نئی وزیر اعظم بن گئیں۔ بورس جانسن اپنے عہدے سے مستفی ہو گئے تھے۔
منگل کے روز بالمورل ، اسکاٹ لینڈ میں ، برطانیہ کی ملکہ الزبتھ کے ساتھ ایک نجی ملاقات میں ان سے ایک نئی حکومت بنانے کے لیے کہا گیا۔ یہ ملاقات ، جو ایک رسمی تقاضا تھی، اسکاٹ لینڈ میں ہوئی کیوں کہ 96 سالہ ملکہ صحت کے مسائل کی وجہ سے لندن کا سفر نہیں کر سکتی تھیں۔
ٹرس ، ملکہ الزبتھ کی جانب سے مقر رہونے والی 15ویں وزیر اعظم اور صرف سات سال میں قدامت پسند پارٹی کی چوتھی لیڈر ہیں جو برطانوی سیاست میں بادشاہت کی طوالت اور حالیہ انتشار کی ایک علامت ہے ۔
ٹرس کی ملاقات اس کے چند گھنٹے بعد ہوئی جب جانسن نے ملکہ سے ملاقات کے لیے اسکاٹ لینڈ کا سفر کیا ۔
وہ لندن واپس جا چکی ہیں ، جہاں شام کو انہوں نے 10ڈاوننگ اسٹریٹ میں واقع وزیر اعظم کی رہائش گاہ کے باہر ٹیلی ویژن پر ایک خطاب میں حکومت کی ترجیحات کا خاکہ پیش کیا۔
کینیڈا نئے تارکین وطن کی بڑی تعداد کو قبول کرنے کے لیے تیار ہے
ایک ایسے وقت جب بہت سے ترقی یافتہ ملکو ں کو امیگریشن کے خلاف شدید رد عمل کا سامنا ہے ، کینڈا میں بیرون ملک سے مزید نئے رہائشیوں کےلیے دروازے کھولنے کی حمایت میں اتفاق رائے دکھائی دے رہا ہے ۔
گزشتہ دو برسوں میں کینڈا میں تارکین وطن کی ایک ریکارڈ تعداد داخل ہوئی ہے ، اور تینوں بڑی سیاسی جماعتوں نے اس پالیسی کی حمایت کی ہے اور امیگریشن کی رفتار سست کرنے والی بیورو کریٹک رکاوٹوں کی مذمت کی ہے ۔ اسی طرح بڑے نیوز میڈیا میں آنے والی خبریں یہ نہیں ہیں کہ امیگریشن آسان ہے بلکہ یہ ہیں کہ امیگریشن بہت مشکل ہے ۔
امیگریشن کے وزیر شان فریزر نے گزشتہ ماہ ایک پریس کانفرنس میں فخر سے کہا تھا کہ کینیڈا "2022 میں چار لاکھ 30 ہزار سے زیادہ لوگوں کو مستقل رہائش دینے کے اپنے امیگریشن ہدف سے تجاوز کرنے کی راہ پر گامزن ہے ۔" سن 2021 میں چار لاکھ ایک ہزار تارکین وطن کو کینیڈا کی امیگریشن دی گئی تھی۔
اس کے مقابلے میں ، ریاستہائے متحدہ امریکہ نے جس کی آبادی کینیڈا سے نو گنا زیادہ ہے ، 2021 میں صرف 245,000 تارکین وطن کو داخل کیا، جو ایک سال کی گنتی 477,000 سے کم تھا۔
سابق صدر ٹرمپ کے گھر چھاپے میں اہم دفاعی دستاویز برآمد
واشنگٹن پوسٹ نے منگل کو خبر دی کہ گزشتہ ماہ سابق صدر ڈونلڈ ٹرمپ کے فلوریڈا کے گھر کی ایف بی آئی کی تلاشی کے دوران غیر ملکی حکومت کی جوہری صلاحیتوں سمیت فوجی دفاع کو بیان کرنے والی ایک دستاویز ملی۔
پوسٹ کی رپورٹ میں، جس میں اس معاملے سے واقف لوگوں کا حوالہ دیا گیا، دستاویز میں زیر بحث غیر ملکی حکومت کی شناخت نہیں کی گئی ، اور نہ ہی اس بات کی نشاندہی کی گئی کہ آیا غیر ملکی حکومت امریکہ کے لیے دوست جیسی ہے یا دشمن۔
ٹرمپ کے نمائندوں اور محکمہ انصاف نے فوری طور پر رائٹرز کی جانب سے تبصرےکی درخواستوں کا جواب نہیں دیا
امریکی محکمہ انصاف جنوری 2021 میں جب ٹرمپ کی روانگی کے وقت وائٹ ہاؤس سے سرکاری ریکارڈ ہٹانے اور انہیں مار-اے-لاگو میں محفوظ کرنے کے لیے تحقیقات کر رہا ہے۔
پیر کے روز، ایک وفاقی جج نے ایف بی آئی کی تلاش میں ضبط کیے گئے ریکارڈز کا جائزہ لینے کے لیے ایک خصوصی ماسٹر مقرر کرنے کے لیے ٹرمپ کی درخواست پر اتفاق کیا۔
روس کو دہشت گردی کی سرپرستی کرنے والی ریاست نامزد نہیں کیا جائے گا، بائیڈن
صدر جو بائیڈن نے روس کو دہشت گردی کی سرپرستی کرنے والی ریاست کے طور پر نامزد نہ کرنے کا حتمی فیصلہ کر لیا ہے۔وائٹ ہاؤس نے منگل کو کہا کہ اس طرح کے کسی اقدام سے روس کے حملے کے دوران یوکرین کی امریکی حمایت کے لیے الٹے اور غیر ارادی نتائج نکل سکتے ہیں۔
بائیڈن نے اپنا ایک لفظی جواب - "نہیں،" اس وقت دیا ، جب نامہ نگاروں نے ان سے پوچھا، " کہ کیا روس کو دہشت گردی کا ریاستی سرپرست قرار دیا جانا چاہیے؟" - اس جواب سے کیپیٹل ہل پر اور غیر ملکی دارالحکومتوں میں مہینوں کی سنجیدہ، پرجوش بات چیت کا اختتام ہوتا ہے کہ آیا روس کو اس مختصر، سنگین فہرست میں شامل کرنا ہے جس میں فی الحال کیوبا، ایران، شمالی کوریا اور شام شامل ہیں۔
امریکی وزیر خارجہ کا خیال ہے کہ قوموں پر یہ لیبل اس وقت لگایا جاتا ہے جب کوئی ایک غیر ملکی حکومت "بار بار بین الاقوامی دہشت گردی کی کارروائیوں کی حمایت کر رہی ہو۔" اس نامزدگی کے بعد متعلقہ ہدف کے خلاف امریکی امداد پر موثر پابندیاں ؛ دفاعی برآمدات اور فروخت پر پابندی؛ ان اشیاء پر کنٹرول جو فوجی اور غیر فوجی دونوں مقاصد کے لیے استعمال ہو سکتے ہیں، اور دوسری بہت سی پابندیاں عائد کی جاتی ہیں۔