کینیڈین پولیس دو افراد کی تلاش کر رہی ہے جن پر ایک مقامی کمیونٹی اور قریبی قصبے میں 10 افراد کو چاقو کے وار کر کے ہلاک کرنے کا شبہ ہے۔ بڑے پیمانے پر اس تلاش کا پیر کو دوسرا دن تھا۔

حکام نے کہا ہے کہ کچھ افراد کو حملے کا نشانہ بنایا گیا تھا اور دیگر ان کی زد میں آگئے۔ یہ حملے ملک کی مہلک ترین اجتماعی ہلاکتوں میں سے ایک تھے۔

یہ واقعہ صوبہ ساسکچیوان کے گاؤں ویلڈن اور جیمز اسمتھ کری نیشن پر پیش آیا۔ حکام نے جرائم کی کوئی وجہ نہیں بتائی ہے، لیکن ایک سینئر مقامی رہنما کا خیال ہے کہ یہ منشیات کا استعمال کرنے والوں کی کارروائی ہو سکتی ہے۔ پولیس نے شبہ ظاہر کیا ہے کہ مشتبہ افراد کو آخری بار اتوار کی دوپہر صوبائی دارالحکومت ریجینا میں دیکھا گیا تھا۔ یہ اس جگہ سے تقریباً 335 کلومیٹر جنوب میں ہے جہاں چاقو کے حملے ہوئے۔

جرمنی اس سال مزید تین جوہری بجلی گھر بند کر دے گا

جرمنی میں عہدے داروں نے پیر کو بتایا کہ جرمنی اس سال ملک کے تین باقی ماندہ جوہری پاور پلانٹس کو بند کرنے کے اپنے پرانے منصوبے پر قائم ہے لیکن آنے والے مہینوں میں توانائی کی کمی کی صورت میں ان میں سے دو کو دوبارہ فعال کرنے کا آپشن اپنے پاس رکھے ہوئے ہے۔

یہ اعلان ایک انتہائی متوقع دباؤ کے ٹیسٹ کی اشاعت کے بعد کیا گیا ہے جس میں اس بات کا جائزہ لیا گیا تھا کہ یورپ میں درپیش توانائی کے بحران کی وجہ سے جرمنی کا پاور گرڈ بجلی کے ممکنہ دباؤ سے کیسے نمٹے گا۔

دوسرے یور پی ملکوں کی طرح جرمنی بھی یہ یقینی بنانے کی کوشش کر رہا ہے کہ یوکرین کی جنگ کے دوران روس سے قدرتی گیس کی ترسیل میں کمی کے باوجود اس موسم سرما میں بجلی کی فراہمی جاری اور گھر گرم رہیں۔

حکومت پہلے ہی متعدد اقدامات کے اعلان کر چکی ہے جن میں دوسرے سپلائرز سے مائع قدرتی گیس کی درآمد شامل ہے جب کہ جرمنی اپنے شہریوں پر زور دے رہا ہے کہ وہ توانائی کو ہر ممکن بچانے کی کوشش کریں۔

جرمنی کا پاور گرڈ، جو کہ یورپی نیٹ ورک کا مرکزی مقام ہے، اس صور ت میں بہت زیادہ دباؤکا شکار ہو سکتا ہے اگر صارفین موسم سرما میں الیکٹرک ہیٹر استعمال کرتے ہیں اور پڑوسی ملکوں کی جانب سے توانائی کی سخت مانگ کا مطلب ہے کہ توانائی کی برآمدات میں اضافہ ہو گا ۔

یوکرین جنگ: روس شمالی کوریا سے بڑی مقدار میں گولا بارود خرید سکتاہے

امریکی انٹیلی جنس کی ایک نئی میں کہا گیا ہے کہ روسی وزارت دفاع یوکرین میں جاری اپنی لڑائی کے لیے شمالی کوریا سے لاکھوں راکٹ اور توپوں کے گولے خریدنے کے مرحلے میں ہے ۔

ایسو سی ایٹڈ پریس کے مطابق ایک امریکی عہدے دار نے اپنا نام ظاہر نہ کرنے کی شرط پر بتایا کہ یہ حقیقت کہ روس کا شمالی کوریاکی جانب راغب ہونا یہ ظاہر کرتا ہے کہ اس کی فوج کو یوکرین میں گولابارود کی سپلائی کی شدید قلتوں کا مسلسل سامنا ہے جس کی وجہ برآمدات پر کنٹرول اور پابندیاں بھی ہیں۔

امریکی انٹیلی جنس کے عہدے داروں کا خیال ہے کہ روس شمالی کوریا سے اضافی فوجی ساز و سامان خریدنے پر غور کر سکتا ہے ۔

زمبابوے میں خسرے کی وبا پھوٹ پڑی، 700 بچے ہلاک

زمبابوے کی وزارت صحت نے کہا ہے کہ ملک میں اپریل سے شروع ہونے والی خسرہ کی وبا سے اب تک تقریباً 700 بچے ہلاک ہو چکے ہیں، جب کہ چار ستمبر تک ریکارڈ کیے جانے والے کیسز کی تعداد 6291 ۔

حکومت نے چھ ماہ سے 15 سال کی عمر کے بچوں کے لیے بڑے پیمانے پر حفاظتی ٹیکوں کی ایک مہم شروع کے ہے او روائتی اور مذہبی راہنماؤں کو اس مہم میں ساتھ لے کر چل رہی ہے ۔

زمبابوے کی میڈیکل اینڈ ڈینٹل پرائیویٹ پریکٹیشنرز ایسو سی ایشن کے صدر ڈاکٹر جوہانس مریسا نے پیر کے روز ایسو سی ایٹڈ پریس سے بات کرتے ہوئے کہا کہ حکومت کو بڑے پیمانے پر جاری ویکسی نیشن کی اپنی مہم کو تیز کرنا چاہئے اور ویکسی نیشن کے خلاف مذہبی گروپس میں خاص طور پر آگاہی پیدا کرنے کے پروگرام شروع کرنے چاہئیں۔

پیر کے روز یونیسیف نے کہا کہ اسے بچوں میں خسرہ کے کیسز اور ان کی اموات کی تعداد پر گہری تشویش ہے ۔ ادارے نے کہا کہ وہ حفاظتی ٹیکوں کے پروگراموں کے ذریعے حکومت کو اس وبا سے نمٹنے میں مدد کر رہا ہے ۔