صدر جو بائیڈن کا لیبر ڈے پر وسکانس کا دورہ
امریکی صدر جو بائیڈن لیبر ڈے کی اپنی تقریبات کا آغاز ایک اہم ترین انتخابی میدان جنگ، ریاست وسکانسن کے اپنے ایک دورے سے کر رہے ہیں ، جس کے بعد وہ ایک اور ریاست ، پنسلوینیا کا ایک ہفتے سے بھی کم عرصے میں اپنا تیسرا دورہ کریں گے۔
ایسو سی ایٹڈ پریس کے مطابق پیر کے روز بائیڈن اپنے دوروں میں اس موضوع پر لوٹتے ہوئے نظر آئیں گے جو 2020 کی ان کی انتخابی مہم کا مرکز تھا۔ اور وہ یہ ،کہ مزدور یونینوں نے ایک ایسے متوسط طبقے کو اجاگر کیا جس نے جدید امریکی معاشرے کو بنایا اور مضبوط کیا۔
صدر بائیڈن کا پنسلوینیا کا یہ دورہ اس کے صرف چند روز بعد ہو رہا ہےجب ان کےپیشرو ڈونلڈ ٹرمپ نے وہاں اپنی ریلی منعقد کی تھی جس سے دونوں جماعتوں کے لیے پنسلوینیا کی انتخابی میدان جنگ کے طور پر اہمیت کی عکاسی ہوتی ہے۔
یوکرین اور یورپ میں توانائی کا بحران مزید گہرا ہو گیا
یوکرین اور یورپ توانائی کے مسائل کی لپیٹ میں آچکے ہیں کیوں کہ روس کے زیر قبضہ علاقے میں واقع، ایک پاور پلانٹ ، جس کے ایک بڑے حصے کو نقصان پہنچ چکا ہے، اطلاعا ت کے مطابق اتوار کو عارضی طور پر بند ہو گیا ۔ زاپوریژیا کے چھ میں سے صرف ایک ری ایکٹر الیکٹرک گرڈ سے منسلک تھا اور جرمنی تک قدرتی گیس پہنچانے والی روس کی مرکزی پائپ لائن بند رہی۔
یوکرین میں لڑائی اور پائپ لائن پر تنازعات ، بجلی اور قدرتی گیس کی قلتوں کے پس پشت کار فرما ہیں، جنہیں یوکرین میں سات ماہ تک جاری جنگ نے مزید بدتر کر دیا ہے ۔
ایسو سی ایٹڈ پریس کے مطابق جوہری توانائی سےمتعلق اقوام متحدہ کے معائنہ کار سلامتی کونسل کو منگل کے روز زاپورژیا پاور پلانٹ کے اپنے دورے کے بارے میں بریفنگ دیں گے۔ یورپی یونین کے وزرائے توانائی بلاک کی مسائل سے دوچار بجلی کی مارکیٹ پر گفتگو کے لیے جمعے کو برسلز میں ملاقات کریں گے۔
یوکرین کو ایندھن کی قیمتوں میں اضافے کے ساتھ ہلاکتوں کی بڑھتی ہوئی تعداد کا بھی سامنا ہے، اولینا زیلنسکی
یوکرین کی خاتون اول نے بی بی سی کو دیے گئے ایک انٹر ویو میں جو اتوار کو نشر ہو ا ، کہا کہ یوکرین پر وس کے حملے سے یورپ بھر میں توانا ئی کی قیمتوں میں اضافہ ہوا ، لیکن یہ ان کی سر زمین میں ایک اضافی قیمت کے ساتھ آیا۔
اولینا زیلنسکی نے لورا کوینس برگ کو بتایا ، میں سمجھتی ہوں کہ صورت حال بہت سخت ہے ۔ یوکرین میں قیمتیں بلند ہو رہی ہیں۔ لیکن اس کے علاوہ ہمارے لوگ ہلاک ہوئے ہیں اس لیے جب آپ اپنے بینک اکاونٹ یا اپنی جیب میں پیسوں کو گننا شروع کرتے ہیں ، ہم بھی اسی طرح گنتی کرتے ہیں اوراپنے ہلاک شدگان کو گنتے ہی۔
برطانوی وزیر دفاع نے اتوار کے روز ٹوئٹر پر ایک اپ ڈیٹ میں کہا ، " روسی فورسز یوکرین میں مسلسل اخلاقی اور نظم ضبط کے مسائل کا شکار ہیں ۔ جنگی تھکان اور ہلاکتوں کی بلند شرح کے علاوہ متعین روسی فوجیوں کی ایک بڑی شکایت ، جو غالباً مسلسل جاری ہے وہ ان کی تنخواہوں کے مسائل ہیں۔
ایران میں بہائی اقلیت کے خلاف پکڑڈھکڑ جاری
ایران نے بہائی شہریوں کے خلاف اپنی کارروائیاں تیز کر دی ہے اور 12 بہائیوں کو ،جن پر وہ بدعتی ہونے اور اسرائیل کے ساتھ رابطے رکھنے کا الزام عائد کرتا ہے ،پکڑ دھکڑ کی اس جاری کارروائی میں گرفتا کر لیا ہے، جس کی ایرانی اور انسانی حقوق کے گروپس مذمت کر چکے ہیں۔
اتوار کے روز ایران کے سرکاری میڈیا نے کہا کہ یہ گرفتاریاں صوبہ مازندران کے مختلف شہروں میں ہوئیں، اسی علاقے میں جہاں 31 اگست کو ایران کی سب سے بڑی غیر مسلم مذہبی اقلیت کے 14 ارکان کو گرفتار کیا گیا تھا۔ بہائی اراکین نےایرانی حکام کے الزامات کو مسترد کرتے ہوئے کہا ہے کہ ایران میں اراکین ملک کی بھلائی کے لیے کام کرنے کے لیے پرعزم ہیں۔
بہائی ، جن کی تعداد ایران میں تقریباً 300,000 ہے اور دنیا بھر میں ان کے 50 لاکھ پیروکار ہیں - کہتے ہیں کہ انہیں ایران میں منظم مظالم کا سامنا ہے، جہاں آئین میں ان کے عقیدے کو سرکاری طور پر تسلیم نہیں کیا گیا ہے۔
ایسو سی ایٹڈ پریس کے مطابق ، سپریم لیڈر آیت اللہ علی خامنہ ای کئی مواقع پر بہائی عقیدے کو ایک فرقہ قرار دے چکے ہیں اور 2018 میں جاری ہونے والے ایک مذہبی فتوے میں اس مذہب کے پیروکاروں کے ساتھ تجارتی معاملات سمیت ، رابطوں سے منع کیا گیا ہے ۔1979 میں اسلامی جمہوریہ ایران کے قیام کے بعد سے اب تک سینکڑوں بہائیوں کو ان کے عقائد کی وجہ سے گرفتار کر کے جیلوں میں ڈال دیا گیا ہے۔ کم از کم 200 کو پھانسی دے دی گئی ہے یا انہیں گرفتار کر لیا گیا ہے اور پھر کبھی ان کے بارے میں کچھ نہیں سنا گیا۔